你有幾多個前度？又有幾多個同你做得返朋友？做唔成情侶嘅仲有需要做朋友咩？兩個人決定做朋友，但一個人就可以決定分手。人與人之間嘅距離好微妙，不進則退，同時太近又容易會受傷。

我有三個正式嘅前度，三個非正式嘅前度。咩叫非正式？我唔會認自己同呢個佢呢個佢呢個佢一齊過，佢哋都唔會認自己同我一齊過。但我哋嘅關係唔止係朋友或者炮友。當中真正做得返朋友嘅，只有一個，係非正式入面嘅其中一個。
當我面對一個前度，佢用謙厚有禮嘅態度應對我，我只係覺得有種詭異嘅距離感。我知道朋友當中嘅佢係咁樣，但過往幾年我識嘅佢唔係咁。當然我哋返唔到去，但我對佢嘅認知都一樣返唔到去，我好清楚呢個係面具，但面具底下嘅佢，我無資格去再見到。
另一個前度，我嘗試同佢做朋友，但佢不斷不斷講起以前嘅日子，我估佢並唔係有意思復合，但我聽到覺得自己當年一句分手就走咗去，我覺得自己唔應該再打擾佢嘅生活。

而做得返朋友嗰位，我相信正正係因為我哋從來都無過一個正式嘅開始，亦從來唔可能會有將來，即使到所謂分開我都只係要求佢當咩事都無發生過。所以，我哋真係當咩事都無發生過。能夠用一種抽離嘅方式去面對，可能係因為我一直都好清楚我同佢唔work，我同佢愈近我只係覺得關係愈緊張。

＂
明明知 斗膽脫口 反駁你 逐句都統計
猶如將 夭心夭肺 的芥蒂 培植於心底
＂

以前都唔覺得自己好勝，但我真係好唔想輸比佢，或者係輸比佢身邊嗰個，雖然我亦都唔想贏佢返嚟。我太清楚自己留唔住佢，而佢亦都信唔過我。然後我哋就做返朋友，因為呢個距離係最好嘅。