有人話男人會避開衝突，又或者係怕麻煩，所以會愈嚟愈冷淡等個女人自己走去引發分手。我想講咁樣真係好仆街好仆街好仆街。
（夜闌人靜，好需要發洩下，原諒我）
有時我真係好想捉返佢出嚟鬧佢點解要咁仆街。點解要玩失聯、裝聾扮啞一兩個月直到我就嚟痴線先終於send個message嚟講分手？我真係以為就算有一日到分手嘅時候，我應該會得到最起碼嘅尊重，係我其實唔配定我真係諗多咗？
件事確實係過咗去，我亦都無再留戀，不過我心底裡真係好嬲好嬲。我好想去體諒但真係好難呀，我諗到自己被無視仲擔心緊你係咪唔舒服或者情緒出現問題，嘩我簡單弱智到無可救藥啦。無面對過呢種情況嘅人好難去想像比當時自己好在乎好信任嘅人完完全全咁無視係咩感受。人有聚有散真係唔係問題，問題係點解唔處理好散嘅過程，一句交代可能太少但都可以接受。而一個月以上嘅放置play？我相信其實最後終於send出嚟嘅message根本唔係有預備，只係發現原來呢條友真係無放棄仲癲到適應緊。
諗返都真係好傷心
然後既然都講咗分手，我亦無咩好挽留。只不過，我連打過電話過嚟想講返點拎返自己啲嘢比返啲嘢你之類啫，你都唔聽。我真係嬲到不能自已，喺街度喊到比人圍觀我真係第一次。
幾多情歌幾多小說都唔能夠令我喺呢一次分手之前明白到嗰種撕心裂肺嘅痛。原來死別令人傷心，但都未係最痛，最痛係兩個曾經好親密嘅人都健在但從此形同陌路。而更難受嘅係，其中一個連原因都唔知道，你可以搵到呢個人但佢唔會講比你知。
如果係因為我嘅不足或者過錯所以導致呢一次分手，呢種結局大概係對我最大最深嘅報復。
「想起跟你嘅history 或會抑鬱一世」
其實有過經歷嘅人會明白呢句一啲都唔誇張
唔明白嘅人我覺得好幸福
忘記唔係失憶
一不小心諗起
真係隔幾耐都覺得個心會痛
