暗戀同單戀可以比喻為未開花結果既戀情，但係你可以不斷幻想呢朵花開既時候係幾咁靚，結果既時候係幾咁完美，呢種幻想可以永遠留係腦海入面，直至死果一刻。相反，戀愛既時候雖然代表既係花開結果既一刻，但呢種感覺又可以維持幾耐?有幾多情侶係熱戀過後會面對現實，出現摩擦，到最後，只有分手收場。一對情侶因為認識而拍拖，因為了解而分開，就係失戀人既寫照。而暗戀一個人往往幻想既只有佢美好既一面，真真正正既一面你唔會有機會了解，因為你只停留係認識。想得到一個人既時候，你會問「那裡只得我共你」，得到之後，感情好似凍檸檬茶一樣，慢慢地「只知道感覺失了蹤」。
做左十幾年毒男，我真真正正暗戀過既女仔只有一個。我對佢既感覺就好似一朵膠花一樣，永遠係最美好既形態，而唔會好似一段發生左既戀情咁樣，慢慢變質。人生總要留下幾個缺憾先叫做完美，呢種就係人人口中所講既缺憾美。當一個人面對挫折，傷心與失望既時候就會諗「如果我當時點點點啊，就唔會搞成今日咁樣啦!」，正如戀愛一樣，如果當時我可以令你成為我既女朋友，今日係我傷心既時候，你就可以安慰我。呢種幻想方法係百搭而實用，因為人往往會對得唔到既野而存在幻想，所以人先會追求唔同既事物，因為你會幻想得到之後，你會點開心點快樂。但得到之後又點呢?初時你會好開心，但慢慢地，會失去感覺，或者因為小事而嘈交，令到你心存不滿，呢個時候可以安慰你既，就只有暗戀既對象，因為幻想總比事實美好。
女朋友唔係話唔好，但有時唔係樣樣野都可以同身邊既人講。有時女朋友話阿
A既男朋友係做律師點好點好，雖然你知道佢冇心串你，只係講事實，但心入面點都唔太開心，咁可以點做?同朋友傾?如果你班朋友係大咀巴或者根本你冇朋友呢?呢個時候，你需要既係幻想，幻想你暗戀既對象點樣安慰你。
暗戀目標係一個人向上努力既動力。為左得到佢，你會令自己做得更好，因為你同佢之間隔住一種神秘感，你想展示最好既一面比佢睇，因為你唔會知道佢點樣睇你，唔知佢會唔會包容到依家既你。但當佢成為你女朋友之後，你同佢既生活慢慢咁同化，你就會失去向上既動力，會認為買樓、供書教學係大家既責任。因為你已經當左女朋友係你既一部份而唔係一個外人。而你得唔到既暗戀對象就一直令你係咁幻想，幻想佢對你既要求，幻想點先可以令佢認同你。
暗戀的確會令人痛苦，但呢種感覺係令你感到窩心。人太完美，樣樣野盡如人意反而冇咩生存意義。當你幻想自己同佢有機會發展感情，可惜同佢擦身而過或者認為自己配唔上佢，其他男仔可以令佢更加幸福時，你會發現呢種感覺係令你回味而且為佢搵到一個佢真心中意既人而感到高興。當人慢慢咁長大既時候，見到暗戀對象同另一半開開心心既情況，就好似老豆嫁女一樣，為自己個女搵到真心中意既另一半感到開心。但當佢比另一半欺負既時候，你就會發揮男人既英雄本色，幻想自己點樣保護佢，當然，呢d只係幻想。
得閒果時，我都會睇下暗戀左一個十年既女仔既FACEBOOK同埋IG，睇下佢近日生活成點，見到佢開心，我就開心。4年前DSE放榜果時，我岩岩先申請左FACEBOOK，搵到佢既AC，同佢講:「我係你小學同學XX啊，你認唔認得我?」，佢話認得啊，我就問佢考成點，到最後我入左大學，佢入左ive。之後我同佢就再冇講過任何野，因為我冇勇氣同佢講。當時既我或者好傷心，但4年過去，反而留比我有更大既幻想空間。
暗戀同單戀就重要既地方就係幻想，因為幻想可以有無限既可能，你唔需要面對現實，而係可以一直沉迷係幻想既美好世界入面，可以一直為生命增添你既缺憾美。
