相信呢幾日大家打開Facebook或者Instagram比人洗得最多既就係：
“玩到喇” “我捉到XXX” 同埋 “咩咩地方有XXX呀”
之類既post。
當然，小弟都唔會放過呢一段熱潮，玩埋一份。但係，我用左三個鐘既時間放低左Pokemon Go，真真正正出去行一轉，比我發現，呢個城市，好似有番活力。
以下係我見到既幾個有趣既故事。

第一個故事發生係街上
出門口前，我以為我只會見到一堆人攞住佢地既手機“埋頭苦幹”，直到出lift我都係咁諗，結果，我大錯特錯。
的確，每個人既手上都有一部手機，開住Pokemon Go，但佢地唔係粒聲唔出，而係一班班人好激烈咁討論邊度有咩捉，點樣玩同應該點玩。再行遠d，我甚至見到兩堆完全唔識既陌生人因為呢隻game展開對話。
「你地係咪捉緊水箭龜呀？」
「係呀，你睇下佢，捉左幾十個波都未捉到，哈哈！」
「唔係呀，真係好難捉呢…」
「係呀，我都捉左好耐呀！」
「喂點解我仲未見到架…」
「哈哈哈哈！」笑聲不絕。
老實講，我好耐冇見過香港咁熱鬧。
走到公園，我又見到第二個小故事。
裡面同樣都有好多人，當中包括一家大細，唔同年齡層都有。
其中一個家庭令我印象都幾深刻，父母帶住一對仔女同佢地既爺爺，家姐睇落二十頭，細佬就十四五歲，一開始長輩只係企埋一邊睇望住d細路玩，到後黎佢地主動叫埋爸爸媽媽同爺爺一齊玩，一邊教佢地點玩，一邊傾計，成個畫面好溫馨，好幸福。
「唔係咁呀，要咁樣，劃上去就掉個波出去。」

「咁樣？（用手指係手機向上一劃）」
「好野！捉到喇！」
「哈哈，年紀大喇，邊得黎咁多力水通處去呀。」
「唔緊要，我地同你一齊去囉～平時同你飲茶個度都可能有架～」
我企左係度望左佢地好耐，而佢地都開始留意到我，當我想走個陣：
「哥哥仔，你係咪都有玩架？」
「不如一齊啦！」
「我…唔喇，我手機冇電喇，多謝你地。」
講左幾句，我就走左，唔知佢地會唔會睇到呢篇文。
最後一個故仔係巴士站發生。
行到咁上下，都係時候番屋企，係巴士站準備上車既時候，有對年輕既情侶以高速跑緊過黎。個女仔突然開口：
「喂等等等等等等等等…」
「做咩呀？上車啦！」
「喂唔係，好似有隻比卡超呀！」
呢個時候，好多玩緊Pokemon Go既人眼睛一亮，開始行去少女既位置。
「唔好捉住啦！上左車先啦！」
少年拉住少女，如箭一般衝上巴士。之後佢地坐左係我附近既位置。
「喂呀，做咩唔比人捉埋先喎！」
「下次先啦，班車走左冇架喇。」
「唔係呀，隻比卡超錯過左都冇架！」
「唔好咁啦，你想要我扮比卡超比你睇，好唔好？」
「唔制呀唔制呀！」
少女開始發脾氣，唔理少年。
過左一陣…
「最多咁啦，聽日我同一齊行，你想去邊就去邊，等你捉到為止。」
「咁如果都係冇呢。」
「咁…我陪你捉成世囉～」
「痴線，邊個話比你跟我成世。」少女開始露出笑容，又唔比少年見到。
「嘩，有人講過唔算數喎（從後抱住少女）。」
「（輕聲道）喂呀…好多人架…」
「咁你唔好嬲啦，好唔好？」
「嗯…好啦，不過你要一路陪住我架。」
「冇問題。」
睇到我墨鏡都閃爛幾副。

聽到有人話：「痴線架，個個都開住同一隻apps走黎走去。」
我就諗
如果，呢隻apps係可以令香港人有番活力既，係正面既，係健康既，係可以加強人與人之間既連繫既，我又唔介意佢地揸住手機走黎走去。

希望大家玩得開心，最緊要唔好玩物喪志，注意安全。