上篇文章【分手咪分手囉,三口六面講清楚好難咩?】,提及一個人如果喺不明不白嘅情況下被分手,會成為「未完事項」,令人更執著於細節,難以遺忘。

但有人問,就算對方已經好明確同我講咗分手,我都仲係朝思暮想,好掛住對方。

縱然對方已講咗唔少狠心話,我亦都唔願意相信佢講嘅係真話。

點解會咁?點樣個人可以舒服啲?我唔知呀!我個心好混亂呀!

懂得問問題係好嘅開始。理解自己嘅情緒同諗法,其實你並不孤單。

我試下用一個學術少少嘅角度去解釋呢種行為 —— 反芻(Rumination)

.

【不是放不下,而是內心不想放下】

反芻係指不斷思索同一件事:小至一句話、一個眼神,大至一連串嘅事件。

適量嘅反芻係好事,因為人類會從思考嘅過程中反省過往做得唔好嘅地方,理解期望同現實嘅差異。

熱戀時鬼遮眼,塊面大大粒暗瘡都話睇唔到BB你係全世界最靚的。反芻令你後退一步,帶返副老花眼鏡客觀分析,搵到理由令自己接受被分手嘅事實。

微觀去睇,喺失戀嘅初期,反芻對我地心理係有回饋作用,我地喺回想舊事嘅時候會不自覺帶有期望,從中獲得快樂。

雖然我小說入面某啲角色係明知對面係火坑都要衝入去,但事實係佢地係享受呢種愛情上癮。

當一個行為完全無法為你帶來一點益處,係唔成立,你係絕對唔會去做的。見到癲佬斬人,你一定會避而唔係企起度俾佢斬。

我地對愛情上癮,而失去愛情就會令我地瘋狂想搵毒品去食一樣,想從瘋狂嘅想念、尋找對方嘅行為嚟止癮。我地唔係戒唔到,只係心入面下唔到決心去戒。
.

【反芻時間過長容易導致抑鬱,必需正視】

有研究指出,兩至三個月嘅傷心期係合理;亦有講法係,一個人需要用拍拖一半嘅時長去放下,接受對方離開嘅事實。需要嘅時長見仁見智。

但有一個講法係肯定,就係反芻時間過長容易導致抑鬱,係會令你出視情緒病嘅徵狀。

如果你長時間為同一件事而煩惱,去到茶飯不思、胃痛、日日喊、失眠嘅地步,就必需認真看待。感性影響到你嘅健康同埋日常生活,佢嘅作用要被暫停。讓我地用最大嘅努力抽離感性,以理智去處理你嘅問題。

挑,你心諗,講經咩,開心啲呀嘛,我夠識講啦。以下係一啲實質可實淺嘅方法。
.

【先處理心情,後處理事情】

  1. 社交連結

朋友係復原速度嘅關鍵。同朋友傾談、見面,陪伴嘅行為以及情緒支援會帶來快樂。朋友亦可以用最客觀嘅角度幫你分析事件。同朋友持續嘅互動亦可分散你嘅注意力,由十分關注前度變成八分關注;慢慢由八分關注變成六分關注,就好似戒毒一樣,隨時間減低劑量,到最後就會去到提起前度會接受佢係過去嘅一部分,唔再執著於細節。

  1. 調整生活

前度係你生活嘅一部分,所以無咗佢,感覺就好似無咗忽肉咁。但好多時候只係習慣作崇。當你能夠預早有系統咁安排節目,按功能性取代返以前嘅生活,就少啲無謂嘅無病呻吟。例如以前逢星期五、日都會約前度見面,你傷心嘅可能只係你咗隻腳陪你,而呢個功能性其實可以被朋友取代。

節目建議係做啲對自己有益嘅活動。酗酒(我住Hall酗酒最癲果期正正就係失戀果期,好在當時無好似啲Hallmate飲到入院。但當時每次戒酒,兩個星期唔掂酒我就會胃痛 LOL)、掂毒品、隨便同人瞓、荒廢學業呢啲會令你後悔嘅嘢就唔好啦。

最好就係狂做運動(可以釋出多巴胺,亦可以瘦身),投入工作;起碼呢啲付出必然有回報。可能你因為失戀全程投入副業賺到大錢添。

  1. 感恩

好老土,但每日寫底值得感恩嘅小事。可能係今日睇咗ERROR嘅節目,同朋友Signal,睇到花小姐呢個Post,或者可以返屋企食飯。愈小嘅事愈好。當你識得發掘生命中美好嘅小事,其實你擁有嘢有好多,你就唔會再執著喺得唔到嘅嘢。
.

【感性嘅心靈雞湯:已死的戀愛不必執著死因】

一個人因病死咗,其實你情緒化地,一味鑽牛角尖執著到底係因乜嘢病,為咗佢嘅死傷心三五七年係無意思的。死咗就係死咗。而理智嘅分析幾次就夠。同一件事你用N個角度去演繹十萬次,個結局都唔會改變。所以,放過自己,對自己好啲吧。

.

花小姐,連登甜故《一個書生既Player故事》、《一個普通女仔既大學故事》及愛情小說《只屬於我們的獨特戀愛關係》作者。喜歡發掘人性黑暗面。www.instagram.com/fuctoria

.

參考文章:
https://www.gvm.com.tw/article/46345
https://www.commonhealth.com.tw/article/70676
https://pansci.asia/archives/158586
Photo by Priscilla Du Preez on Unsplash