更衣室係一個好特別嘅地方。
你行得入去，就好似掉低現實人生，投入另一個身份。
所以更衣室嘅話題，唔係咩功課測驗、業務成績，大家都只會講下「陣間場波點踢」。
「呢排練咗招新嘢喎！一陣表演你哋睇。」
「開盤！邊個入第一粒！」

上面呢堆對話，至少都七、八年前，早就成為絕唱。
而家嘅對話變成下面呢堆。
「點呀，上次整傷隻腳好啲未呀？」
「好似仲有啲水喺入面。你呢？個膝頭痛唔痛？」
我已經唔太記得由幾時開始，我冇再喺更衣室討論「一陣點踢」、「自己幾勁」；
同時都冇印象，喺邊個時間線上，大家都變得「傷痕累累」。
當年行出更衣室，個個雄心；今日行入球場，個個小心。
比數已經唔重要，冇傷冇扭親都當贏。
明明係同一對腳、同一種運動、同一個球場，點解變咗咁多。
終於明白點解日本動漫嘅主角都係細路仔，因為年紀愈細大，個膽愈大。
呢份衝動先可以拯救世界。
而成長帶畀我哋嘅經驗，往往就係令大家細膽嘅原因。

IG: cheungson88