當你揭發到「朝9晚5」只係一堆大話嘅時候，電視劇嘅「1pm準時放Lunch」自然都機會唔存在。
好多時打工仔(由其係前線員工)每日都上演住「肚餓遊戲」。
公司唔可以冇人睇住，或者爆場，佢哋就行唔開。
幾肚餓都好、胃痛都好，唔走得就係唔走得，仲要一路頂落去，保持笑面迎人。
有人話呢啲就係「香港精神」，我覺得似係「搵笨精神」多啲。

某年夏天，我都返過一份暑期工。
每日Lunch採用「輪更制」，即係A君食完到B君、再到C君。
有日異常多客，第一輪嘅同事都唔可以「準時出發」，一拖再拖……令原本3點食Lunch嘅我等到5點先行得。
餓到冇晒反應，攰到唔想講嘢，喺茶記嘅窗口位，我望住銅鑼灣嘅人潮，稍稍思考人生。
覺得有錢嘅人就食Set Lunch；
我呢啲奴工仔就食Sad Lunch…以前諗過咩人會喺5點食茶記，嗰日終於有答案。
雖然偶爾忙碌有助成長，但突然明白，原來「自主Lunch時間」已經係一種成就。
多得呢啲經歷，我冇一種「以為自己客係大晒」嘅心態。
因為我知道眼前呢位笑容十足嘅人，分分晏就都未食…
呢一餐可以做埋晚餐嘅Lunch，或者都係我哋無數人嘅寫照。
見到好多人會覺得自己做嘢辛苦就對入間舖頭，擺低幾百蚊大發脾氣。
不過自己點慘都好，轉個頭諗下，其他人都未必比你好過。

IG: cheungson88