原來人生唔係如戲，人生係如遊戲。
《Divison》呢排好多朋友玩，連帶我都一齊玩埋。
咁Game入面有個地方叫「暗區」(簡單就係畀玩家互殺嘅地方)，有次老死阿強帶咗我入去，從此我就冇再出過嚟。
坦白講，即使係「暗區」，我都冇諗過要殺玩家。
打機啫，唔使咁絕嘅，所以我鍾意一個人入暗區。
有次見到一班人畀堆npc圍，我衝過去幫佢哋清咁啲，感覺大家都係戰友。
最後敵人清晒，佢哋四支槍對準我狂射，將我殺死，執晒我啲裝。
嗰一刻，我感受到好人，未必有好報。
今日，畫面再次係暗區，面對一個垂死嘅路人玩家，阿強同我講：「開槍啦。」

我承認自己猶疑咗一陣，但兩秒後我用把MP5衝鋒槍將佢了結。
殺完一次人，我就明白，自己當日點解會死。
殺人之後，頭頂會有個骷顱浮標，話畀其他人知呢班契弟啱啱「做完世界」，會畀其他玩家追殺。
但阿強一於小理，佢話：「怕條春咩，個骷顱浮標得幾廿秒，呢段時間匿埋，潛陣水，甩咗個浮標就可以行返出去，大大方方。」
唔單止咁，挨過呢段「骷顱浮標期」，仲會加你大量經驗值。
殺完人冇人捉到，逍遙法外之後竟然有獎勵，本身覺得「有冇搞錯！」
但諗深一層，現實咪又係一樣……
不過，「暗區」有冇好人？
有，仲好多。
遇過路人一齊打王，明明冇插咪，但大家心神領會左右互補，甚至主動救你，一齊拎獎勵。或者河水不犯井水，各有各打，唔會殘殺。
即使唔小心射中你，都會即時做「動作」道歉。
呢一班好人，成就你喺「暗區」拎咗唔少「好裝備」。
但諷刺嘅係，呢幾十分鐘，你可能遇到10個好人，成就一堆裝備，不過只要臨尾撞到一個衰人，將你殺死。
你啲裝備就會化為烏有。(隻Game設計喺「暗區」死會跌啲執返嚟嘅裝。)
就好似人生咁，往往我哋因為一大堆好人幫助，拎到少少嘢，但最後都敗晒喺一個衰人手中。
壞人唔使多，一個已經超錯。
所以，我寧願早啲遇晒所有壞人，至少損失有限。
不過，人生嘅嘢，邊有「寧願」？
IG: cheungson88