表白、拍拖、食飯、行街、睇戲都無人管你。但好奇怪，你一結婚，就會自然變成一大班人嘅事。
　
無錯，你班親戚會彈出黎湊熱鬧。
　
你個二叔，你大學畢業佢無出現、你搵工佢無幫手、你失戀佢畀唔到意見…但你結婚，佢衝出黎第一個恭喜你，然後問你幾時擺酒！當然，仲有其他唔太熟，一年見得幾次，你都未搞得清佢哋點稱呼嘅親戚，佢哋都會出現喺你擺酒show上。
　
「雖然我結婚，但我唔擺酒！」當你向親戚宣佈，佢哋個樣仲震驚過世界要末日。
　
「吓？！人生大事點可以唔擺？」二叔啊，正因為係人生大事，我先唔想呢個咁美好嘅日子留下一個壞嘅回憶。
　
「過幾年你實後悔啊！」三姨太啊，如果擺酒我成世人都會後悔。做場馬騮戲，又播埋啲乜叉叉童年片段，仲要成舊木咁被你班人輪流影相，啲合照我唔會睇，你亦唔會睇…為乜？
　

「你結婚你屋企人都有份，呢啲錢唔慳得㗎一世人一次！」四姑媽，我會請家中兩老食飯，我慳返十幾萬去旅行兩個人食飯、啪啪啪、訓覺、食飯、啪啪啪、訓覺好過啦。
　
曾經一位朋友擺酒我做兄弟，佢為咗呢場show，搞到有情緒病，仲同老婆鬧過幾次交。
　
佢搵得唔多，座位有限，兩邊父母都要面子，爭幾多圍已經炒一次大鑊…到魚翅問題，我朋友覺得食翅好殘忍，但父母一句「結婚一生人一次，你無條翅畀人食，畀其他人背後講閒話啊！」
　
仲有日期、地點…雙方家長都各有要求，最終，經歷過無數次鬧交，呢場show終於都擺得成。
　
當日，我朋友見到班完全唔熟嘅親戚，到達酒樓一刻就興高采烈咁打麻雀，然後播濕鳩童年片段，玩埋啲無聊遊戲，證婚一刻台下大嗌「咀佢！咀佢！咀佢！」好似從未見過尺度咁大嘅場面咁。
　
我心諗…其實呢個年代，尺度更大嘅事喺結婚之前已經做過晒，無必要大驚小怪。
　
「旅遊巴黎咗喇～」喺大家爭執緊邊個拎啲食唔晒嘅伊麵炒飯返屋企嘅時候，酒樓侍應喺度大叫。
　
我朋友話，因為佢老婆有班親戚喺鄉下，要租架大巴落黎飲，食完飯送返佢哋上去…
重點係，租車錢由佢負責！
　
唔怪得當晚，我朋友完全無笑過啦…
見住呢班用你錢又食又拎嘅人，仲要做馬騮氹佢地開心，點笑得出？
　
結婚係一件甜蜜幸福嘅事。
但擺酒唔係…
　
ig：BlueGodzi