我叫阿Joe，姓胡，讀中六。不過我無畀人笑英文名叫「污糟」，因為我有另一隻嘢畀人笑。
就係我有好大粒突起嘅墨，生咗喺我耳珠上面…
喺我細個嗰陣，粒墨仲係細細粒，阿媽見到仲好開心話耳珠生墨係聰明。但當我個人愈大，粒墨亦由成長期進化變成熟期，最後仲進化做完全體，多咗條毛喺墨頂。
我阿媽份人好迷信，我話我想去脫墨，佢死都唔畀，話呢粒墨好可能係我死鬼阿爺嘅靈魂，投胎做粒墨去保佑我哋全家，一定唔可以脫走。
喂大佬啊，唔好咁痴線啦！我無法想像阿爺喺地獄點樣同閻羅王講，話「我好愛我屋企人，我想投胎做粒墨！」咁啊？
於是，我就諗住去穿隻耳環，試圖遮住粒墨…
點知去到旺中搵個阿姐穿耳，佢笑鳩我話：「你咪穿咗囉，仲穿？！」
但咁都未算慘，最近我夜晚溫書，手痕痕咁不停捽粒墨，點知捽吓捽吓…成粒墨甩咗！！！
我望住手上粒完好無缺嘅墨，即刻沖入廁所照鏡，耳珠有個傷口，只係流咗少少血，我懷疑粒墨應該係壞死咗甩咗出黎。
第日，我即刻拎粒阿爺靈魂畀阿媽睇，佢好認真咁講阿爺應該去咗投胎，粒墨要用黃紙包住，然後燒咗佢，痴線…
過幾日，傷口結咗焦，我開始覺得唔對路，因為塊焦突起咗一粒嘢！心諗唔係嘛，唔通又生返粒墨出黎？！於是我咬緊牙關，忍痛將塊焦挖甩咗。
結果，裡面係一塊粉紅色嘅肉粒！我喺廁所度大嗌咗出黎！
我阿媽聽見我大叫，走咗入黎…
「咁夜嘈乜啊？」
「你睇…」
阿媽指住我隻耳仔笑鳩我：「你做乜貼粒Lin落隻耳仔度！」
「係我粒墨黎嫁！」我哭崩住離家出走。
可能係我太激動嘅原故，隻耳仔粒墨不停流血，我唯有去樓下間便利店買塊膠布痴一痴先，以免失血過多。
點知入到七仔，見到個店員忍笑忍得好辛苦咁問我：「先生，你要乳貼定膠布啊～」
最後，我痴住張乳貼，買咗罐啤酒離開七仔。
喺呢個寂靜嘅深宵，我望住冷清清嘅街道，偶爾只得幾架的士駛過。
我企喺路旁，一啖一啖咁將涼掉嘅啤酒灌入肚。
呢一刻，我覺得好似畀個世界拋棄咗咁…
我亦終於明白到，點解家燕媽媽唔走去脫咗額頭粒墨。
因為你永遠唔會知道，當粒墨無咗，會生返咩野出黎…
最新出版：《同病唔使相憐，有病睇醫生》
Ig：BlueGodZi
