今日有想同老闆講想早少少放工，因為屋企隻狗病咗。
　
「藍橙仔，你已經日日遲到，仲想早退？不如你將你遲到嘅時間去帶隻狗睇醫生，咁咪唔洗早退囉～就係你呢啲冗員，對公司毫無歸屬感！」
「其實好似打機咁，老闆你可以課金去令我歸屬感解鎖。」
「咁洗唔洗帶埋你隻狗返工囉。」
「老闆其實你已經養咗好多隻狗，你試下而家大喝一聲Come。」
　
「Come！」
唔洗幾秒，Marketing 阿Adam就走咗入黎，其他人就口擘擘咁望入黎，八卦吓發生咩事。
　
「老闆你係咪叫我？」Adam磨擦雙掌。
「畀隻手我！」老闆。

「我不嬲都係你嘅左右手黎啦老闆～」
「…」
　
老闆可能覺得咁樣好有趣，就召晒所有人入黎，商討吓辦公室應唔應該帶寵物返黎。由於大家都未GET到老闆點解問呢條問題，無辦法擦鞋，老闆只好講出自己意見先。
　
「我就鍾意貓多過狗嘅。」
　
結果，收集到嘅意見如下：
　
「係啦！公司人已經夠多，仲帶隻狗入黎阻住晒做嘢。」Mary姐每日都OT到九點，唔知點解佢會覺得人夠多。
「請工人囉笨！」
「無錢咪學人養狗啦！」
「係啦～自己都未養掂，學咩人養狗！」
　
其實我發現，每次討論呢類話題，例如寵物車廂啦，增設單車徑啦，樂器能否入地鐵之類…最後答案都會去咗「無錢就咪學人乜乜啦！」。
　
無錯，香港無錢，係乜都唔鼓勵你去做，正因為咁，香港人就只能夠搵更多錢去做更多嘅事。
但當佢哋不停工作時，就發現，佢哋根本乜都做唔到…
　
「老闆啊，其實呢…你可以課多啲金畀我，升夠Lv可以轉職做你隻狗，點睇？」
「我都話我鍾意貓啊！」
「咁就啱晒喇～喵！啲貓好有性格，叫佢埋黎佢就走，叫佢走佢就行埋黎。老闆你頭先唔畀我早退，意思我get到了！」
　
Ig：BlueGodZi