我曾經好討厭飲茶。
特別係細個畀屋企人逼去嘅時候。
讀小學嗰時，覺得飲茶等於親戚聚會。
圍繞自己嘅都係聽唔明嘅話題。
成個過程，除咗扭計買本漫畫之外再無其他。
覺得自己一旦大個仔，有話事權之後就可以同「飲茶」講byebye。
但有啲嘢就係咁奇怪，你曾經決絕咁話一刀兩斷；
最後又甘心同佢再續前緣。
大個之後，我竟然鍾意返飲茶。
中午會同同事去茶樓、同班朋友癲一晚會去飲早茶，忽然覺得點心呢樣嘢都幾偉大，蝦餃燒賣更為吸引。
廿幾歲嘅我，終於明白小學時代嘅父母，點解咁鍾意飲茶。
有啲嘢，未到嗰個年紀，始終唔會了解。
可能再等20年，我又可以體會到佢哋而家嘅諗法。
只係到時，七十幾歲嘅佢哋又未必明白我。
家長兒女，或者註定喺呢段年齡距離上有啲磨擦，但喺隙縫之中互相關心。

IG: cheungson88