近年同唔少老死各有各忙,鮮有聚頭。
但估唔到阿強係繁忙嘅工作底下,依然冇放棄自己,堅持媾女呢個偉大事業。
不過,就連衰三次。
表白失敗猶如自殺成功。
呢12個月嚟強哥仔已經行過三轉奈河橋,轉生經驗豐富。
之但係,短短時間嘅多次失敗都令佢有一啲體會。
「次次啲女仔…都會塞啲優點畀我…再用呢個優點去拒絕我…」

就咁聽有啲虛,唯有叫佢「試用例子舉例說明之」。
「有個女仔話我個人好有計劃。不過佢未Ready...怕所有事太有Planning會好大壓力…」
「另一個女仔話我個人好率性,好真。但佢自己比較穩重…覺得大家唔夾。」
「最後一個女仔話我人品好,所以…值得獲得更好。」
阿強講完之後,嘆一口氣:「明顯係行嘢啦。冇理由我有Planning得嚟又率性而行下話,除非人格分裂嘅啫…」
坦白講我又明啲女仔點諗嘅,即係好似上司會同你講「今次做得幾好!不過呢…(之後開始小你)」
一樣,一開波讚下你,再兜巴昇落去必然更為順手。
但對當事人又係咪好事呢?
「我寧願佢直接講『唔鍾意我』。覺得係唔靚仔就唔靚仔,窮就窮。唔好喺度是Q爛但屈個優點畀我,作為拒絕我嘅武器。」
「一聽就知係吹水,愈聽愈痛。我覺得自己連畀你拒絕嘅資格都冇。」
「好似喺度可憐我,等我好受啲咁….其實更難受,我覺得自己成個人生都好可悲。」
做人真係好難,講嘢太直會Hurt到人、但兜太大個圈更傷人。
拒絕從來唔係一件易事,但直接啲,一刀過,可能更加痛快。
事已至此,我唯有安慰阿強:「唔好唔開心啦…自己一個又唔使死嘅。」
阿強冇抬高頭,但有回應我:「一個人係唔會死…但有時…死都唔想一個人…」

IG: cheungson88