上集: https://post.shikoto.com/posts/83390-有冇人試過收到不明來歷-whatsapp-訊息？-上集

「妳痴線嫁？帶隻狗出黎做乜？」我畀細蚊嚇咗嚇，雅文仲即刻嚇到喊咗出黎。
　
「陪你哋一齊埋葬玩具啊～行啦～」細蚊講完就自己一個衝咗去球場用手猛咁挖開塊地。
　
我同阿風都呆咗，唔知行唔行過去好。　
喺呢個咁嘅情況，細蚊竟然仲好似平時咁活潑開朗，反而有啲恐怖…
　
「無時間啦～你哋等咩啊？」細蚊喺遠處大嗌。
我望一望手錶，11:50PM，得返十分鐘就過咗今日。
　
「雅文，我哋快啲過去，如果遲到就大件事！」
「我、我好驚…細蚊佢…」
「我哋兩個男仔一齊過去，有咩事我哋會睇住你。」
　
雅文下定決心咁點一點頭，拎咗隻毛公仔出黎。呢隻毛公仔擺喺雅文床頭，佢話以前細個父母去親工幹，因為怕黑所以會摟住佢黎訓。我拖住雅文，同阿風三個人跑過去細蚊隔離。
　
細蚊已經徒手挖咗一個深坑，仲放咗隻狗屍體落去。我見佢挖到成手都係血，仲甩咗幾塊指甲，到底佢出現咗咩問題…？我拉住雅文唔畀佢行咁近，示意佢快手丟隻毛公仔落去，再用腳踢返啲沙去封住個坑。
　
「搞掂，我哋走啦。」我拖住雅文想即刻離開學校。
點合，雅文隻手畀細蚊一手捉住咗！
「仲要影相啊～」
「畀部手機我，我幫妳哋影。」阿風用眼神示意我企定定喺雅文隔離唔好走開。
　
「幅相唔可以有外人嫁！無時間啦！」細蚊好大聲咁嗌，好似精神失常咁。
　
「咁我…」我放開雅文隻手，退開兩步，諗住有咩事即刻衝過去。
　
「笑～」細蚊用隻沾滿泥同血嘅手搭住雅文膊頭。
　
阿風幫佢哋影咗幾幅相，相入面有雅文、細蚊、仲有一個埋葬咗狗屍體同毛公仔嘅坑。
　
「影完啦！我哋走！」正當我想衝過去拖走雅文，細蚊大叫。

　
「唔好走住，我哋自拍一幅先！」
「啊啊！好痛啊！」雅文表情痛苦，成個身都側埋一邊。
　
「你唔好行埋黎，幅相唔可以有外人嫁！」細蚊好用力捏實雅文膊頭，我即刻唔敢行埋去，驚細蚊會對雅文不利。
　
「咔嚓～」細蚊用佢部手機同雅文自拍。
我同阿風已經準備好有咩事即刻衝過去。
　
「完成～可以返屋企！」細蚊放開雅文，雅文即刻撲向我係咁喊。
　
「你send咗幅相回覆個詛咒訊息先啦。」阿風提示，雅文即刻拎部手機send幅相回覆個詛咒。
　
11:58PM
　
Send咗唔夠一秒，就見到兩個藍剔。
「咁…係咪即係完成？」
「唔知，不如離開呢度先講。」阿風。
　
沿途細蚊一直跟住我哋，一句嘢都無講，臉上面依舊掛住一副好燦爛嘅笑容。出到學校門口，望一望錶已過咗十二點，好慶幸我哋三個都平安無事。
　
「唉～咁搞一搞返到去都唔知訓唔訓得著。」阿風鬆一口氣，伸一伸懶腰。
「你搵返個女朋友，摟住佢就一定訓得著啦！」我搭住細蚊膊頭，將佢摟埋去我胸口。
　
「你做咩啊？」雅文尖叫。
「喂！你傻咗啊？」阿風問。
「咩事啊…」我唔知佢哋做乜咁驚。
　
「你睇吓～頭先我哋頭先張自拍靚唔靚？」細蚊畀部手機我睇。
「妳靚好多。」我答。
　
「你知唔知你自己做緊乜啊？」阿風將我推開。
「咩事啊咁大力…」
「你女朋友喺嗰邊啊！」阿風指住雅文。
「吓？阿風你係咪忽咗，我點會鍾意雅文？郁啲就喊驚咁…呢件都係留返畀你～」
　
雅文唔知做乜，捂住塊面喊。
「好鬼嘈啊，返屋企訓覺～」我搭住細蚊膊頭離開。
「阿橙！你唔好玩啦喂？」
「聽日學校見～」我頭也不回，都唔知佢哋發乜神經。
　
「點解佢會變成咁…」雅文把聲真係愈聽愈煩。
「我都唔知，我覺得係關個詛咒事…」阿風條友又陪佢癲。
　
「你睇～呢幅相係雅文SEND畀我嫁～」細蚊又畀另一幅相我睇。
「阿風條友仔，識唔識影相嫁？影到鬆郁濛咁！不如妳都係咁靚。」我鍚細蚊一啖。
「嘻～」
　
『這是連鎖詛咒，傳給一個人，
你心愛的人會愛上你。
請攜帶童年心愛的玩具，
明天前到以下地址將玩具埋葬，
並拍下照片傳送給我，
否則埋葬的會是你身邊最愛。
將詛咒傳給一個人，
你心愛的人會愛上你。』
　
鬼恐怖，人性更可怕。
細蚊活埋自己的狗，為了搶走心愛的阿橙。
也有人試過吧？傳十人，喜歡的人會愛上你。
你明知不會靈驗，但總會偷偷傳給別人。
　
（完）
ig：BlueGodZi