我叫阿橙，中六雞。同阿風由同小學升上中學都係同一間，又撞啱幾年都係同班，所以我同佢由細到大都好好兄弟。不過最近，我同阿風之間就發生咗少少問題。
　
因為我同佢都鍾意同一個女仔。佢叫雅文，原本我唔想為咗個女仔而傷咗兄弟情。女啫，至多咪追過另一個囉。但好衰唔衰，喺我同雅文拍拖無耐先知道呢件事。
　
12:40PM（午）
　
午飯時間鐘響起，我哋三個多數都會坐埋一齊食飯…吖！係四個先啱！因為最近仲加多咗個人。
　
「你哋有冇聽過whatsapp有個都市傳聞？」細蚊係插班生，佢性格開朗，細細粒，臉蛋可愛，唔夠一個月已經同同學打成一片。
　
「恐怖嘢黎嫁？唔好講啦！」雅文縮起膊頭挨近我。
「係咪啲咩傳畀二十人會帶黎好運，唔傳就死嗰隻啊？old school嘢黎喎。」我。
「喂！雅文驚就唔好再講啦！」阿風喝止我。
　
「唔係啊～我最近上網睇，話近期好多人都收到好奇怪嘅號碼send 黎嘅whatsapp。」
「係咪速遞叫你收貨或者帶點數卡騙案咋！」我。
「仲講！我走啦！」雅文起身離開。
　
「呃…？」細蚊。
「妖，妳搞到乜氣氛都無晒。」阿風都跟住離開課室　
「我去追佢返黎先…」我即時追出去補鑊。
　
本來呢個鐵三角關係已經夠煩，最近仲加入埋細蚊，煩上加煩。
夜晚，我去咗雅文屋企，利申只係做功課…
佢手機突然收到一個訊息。
　
『請攜帶童年心愛的玩具，
明天前到以下地址將玩具埋葬，
並拍下照片傳送給我，
否則埋葬的會是你身邊最愛。』
　
「邊個黎？」
「無聊嘢囉…」雅文畀我睇個訊息。
「邊個玩嘢啊？」
「係咪細蚊？」雅文連手都震埋。
「唔洗驚，我打畀佢問吓。」
　
當我一拎起電話，個電話咁啱就響…
我同雅文互望咗眼。我畀個電話來電佢睇，打黎嘅人…係細蚊。

　
「喂？你哋有冇收到訊息？」細蚊把聲聽落有啲奇怪。
「原來真係妳玩嘢！」
「唔係啊，其實我尋日都收到訊息，以為係惡作劇，所以今日先問你哋。點知頭先返到屋企，就發現…我隻狗畀人活埋咗！」
　　
「無相妳話隻狗雙腳企同妳傾計都得嫁啦！」
　
其實我無心串細蚊，我只係好嬲佢連續兩次玩埋啲咁嘅惡作劇。
點知，隔咗一陣，我手機就收到細蚊傳過黎，佢隻狗全身都係泥，軟癱咗喺地下嘅屍體相。
　
「我絕對唔會拎自己隻狗黎開玩笑！你哋唔信就算！」細蚊講完就CUT咗我線。的確佢係愛狗之人，再加上幅相…真係喺佢屋企影。
　
「痴線！」我即刻刪除咗幅相，費事嚇親雅文。
「唔緊要啦，我屋企又無養寵物，父母喺外國，就算有詛咒啊都…」雅文見到我咁嬲，打算反過黎安慰我。講到一半就停咗。
　
「做咩啊？」我問。
「訊息話唔依照佢指示去做，身邊最愛就會被殺。細蚊最親嘅就係佢隻狗，所以隻狗被活埋…」
　
雅文全身已經震晒，面青口唇白…
「我最親嘅，唔係經常到外地工幹嘅父母。係你！」
　
「…」我聽到佢咁講，背脊即時飆晒冷汗。亦都解釋咗…點解淨係得雅文到訊息，我收唔到！
　
因為…我只係今次詛咒嘅籌碼！
我諗咗一陣，打電話畀阿風，想問佢有冇收到呢個訊息。
　
「有冇搞錯啊？你到底做過啲乜嘢啊？」阿風喺電話炮轟我。
「我點知喎，細蚊尋日都收到啦。」
「個地址喺邊？」
「係我哋間小學啊！個訊息要我喺學校後面個球場埋葬咗件玩具…」
　
電話傳黎阿風嘅沉重呼吸聲，幾秒之後，佢話：「學校門口等，我即刻過黎。」
　
　
11:30PM（夜）
　
我陪雅文返到黎小學，既然個訊息無指定要一個人去完成，我當然無可能丟低雅文一個人，萬一呢個唔係惡作劇，係啲變態佬嘅陷阱就大件事。
　
就算…呢個真係詛咒，籌碼係我條命，我梗係要黎幫手。
　
當我同雅文去到學校附近，離遠已經見到阿風喺學校門口等緊。
　
「多謝你黎幫手…」我走過去搭一搭阿風膊頭。
「我為咗雅文咋！」阿風笑一笑，拍拍我背脊。
　
唔知點解，我個人定咗好多。可能係阿風嘅關係，我霎時覺得好似返咗去以前小學時咁，兩個人乜都唔驚死。估唔到一個詛咒訊息，修補返我哋兄弟間嘅感情。
　
「記唔記得，小學時我哋都試過夜晚返黎學校探險？」阿風問我。
「記得啦，以前仲要無電筒。」
「最後因為太黑喺學校蕩失路，結果一直坐喺度等天光。你條友仔，著定校服！累到我要即刻趕返屋企換衫。」
　
「你傻仔啫！」
「唔好講咁多啦，快啲搞掂返屋企啦，好恐怖啊呢度。」雅文捉住我隻手臂。
　
「放心啦，今晚有我同阿橙兩個，乜鬼都唔驚！」阿風拍一拍胸口。
　
我同雅文因為太急，乜都無帶，好彩阿風有帶電筒。爬過學校大門，三個人就跑去學校側面穿去後門。
　
「咁耐無返黎，望落好似乜都縮晒水咁。」阿風用個電筒四圍照。
「唔好周圍照啦，照到其他嘢啊！」雅文愈行愈驚。
「唔洗怕，好快到，兜過咗呢個飛機場就到後門啦！」
　
我口中嘅飛機場，係學校側邊用油漆畫落地面嘅跳飛機。以前小學無乜玩意，一班學生可以為爭一個跳飛機而每日打交。　
　
「我以前細個跳飛機好勁㗎！」我單腳一下一下咁跳。
　
「嘩！！！」突然阿風大叫，我即刻望過去睇吓發生咩事。
　
我離遠見到一個人影企咗喺球場側邊，雅文嚇到即時縮住我背後。我同阿風都唔知應該點做好，而個人影似乎發現咗我哋，好快咁跑緊過黎。
　
阿風用電筒照實佢，當人影行近，望清楚啲…原來係細蚊。
　
「嘩畀妳嚇死啊，妳黎做乜啊？」
「埋葬玩具囉～」細蚊除低個背囊，放喺地下打開。
　
我探頭一望…
係細蚊隻狗嘅屍體！
　
下集: https://post.shikoto.com/posts/83424-有冇人試過收到不明來歷-whatsapp-訊息？-下集

ig：BlueGodZi