前幾日網上睇到條短片，諗住考考自以為聰明嘅女朋友。
　
「哥哥4歲，弟弟只得哥哥一半歲數，咁弟弟幾歲？」
「2歲囉！」女朋友豎起兩隻手指。
「好勁喎，咁當個哥哥100歲，弟弟幾歲？」
「50歲～」女朋友答得好快。
「錯！」
「吓？」女朋友皺一皺眉，遲疑一陣，諗清楚。
「點會錯啊？100一半唔係50咩？」
　
「妳諗真啲，哥哥4歲，弟弟2歲。哥哥100歲，弟弟幾歲？」
「…50！」
「錯啊…」
「100 除2，咪50囉！」
「妳計得啱，不過答案錯！」
　

每次我見到乜嘢謎語，都好鍾意考女朋友。
因為佢次次都估唔到，然後我就可以笑佢蠢！
　
女朋友唔止「腦筋大直路」唔識轉彎，平時生活都笨笨哋。
戴頸巾永遠夾住啲頭髮，買完雪糕就100%專注去食，完全唔睇路。成日見到喺街嘅垃圾畀風吹起，就會以為係老鼠或者屍體，然後尖叫。
　
「好蠢啊妳！」我摸一摸佢個頭。
「最蠢咪識到你囉！再笑擰甩你個頭！」女朋友畀我笑兩笑就會嬲。
「成世人最聰明就係識到我！」
　
女朋友笨嘢數都數唔晒，諗深一層，如果女朋友唔係識到我，佢會唔會都係咁蠢呢？
會唔會過馬路唔睇車？
會唔會拎住部手機周圍搵手機？
　
唔會！
佢只係鍾意我幫佢整返好啲頭髮，
鍾意我幫佢磨木筷子，
鍾意我拖實佢過馬路，
鍾意我笑住咁摸佢個頭，再鍚佢一啖。
　
所以女朋友一直都係喺我面前扮蠢，我又繼續照顧佢。
一個扮蠢，另一個唔悉穿佢扮蠢…
真係情侶之間，最肉麻又有趣嘅遊戲～
　
就算女朋友真係咁蠢，又遇唔到你。
佢都會有其他人頂替你個位去照顧佢，
而你只係咁幸運地遇到佢。
　
（有冇笨豬仲未諗到答案？問男朋友啦！）
－－－－－－－－
ig：BlueGodZi
專頁：http://www.facebook.com/blueGodZi