踢拖、眼鏡、唔整頭、就咁笠件褸，迷迷糊糊咁碌落街，呢啲可能就係街坊生活。
你嘅目的地唔會係銅鑼灣或尖沙咀，只會係一個最近屋企，而又滿足到你需求嘅地方。
即係樓下商場仔。
做一個街坊，明明係件好簡單嘅事，但已經好耐冇做過。
悠閒咁落去茶記，坐底食個公仔麵，再喺小商場兜幾個圈、買下日用品，最後喺麵包店搵啲5蚊有交易嘅腸仔包同吞拿魚包，20蚊一袋嘅手製曲奇。
呢段時間，公司所有wtsapp我都冇覆，冇咩理個世界發生啲咩、亦冇咩理其他路人做啲咩，大街之上，漫無目的。

突然間天降甘霖，我跑去附近瓦遮頭暫避。
殊不知短短廿幾米距離，已經令我上氣唔接下氣。
身體好似發出悲鳴一樣，唔知係咪因為通宵工作後嘅副作用。
不過都唔重要，喺瓦遮頭入面，望住人群同雨水嘅流動，身體潛藏嘅奴性又發作，話畀自己知已經浪費咗好多時間。
所謂「好多時間」就係30分鐘。
生活節奏嘅壓迫，令呢對拖鞋甚少落街、呢件舊風褸亦深深封印。
可惜諗諗下，30分鐘已經變成31分鐘。
「咁就返去啦。」
唔知幾時可以再做一次街坊，唔知下一次係幾時。
但應該唔止呢一次。
咁就心足啦。
ig: cheungson