若然你有一條絕世好橋、如果你有一班好強嘅同事、又加上你有一堆合理嘅資源，呢個Moment，或者你叫握緊拳頭，遙望星空，擺出一副Success Kid嘅表情，內心吶喊：「呢舖掂硬啦！」

而當然一秒之後你會收到電話，激烈討論完20秒之後你已經收檔。

你明白「呢舖玩完啦！」

原來你計漏咗一樣嘢，就係「客人」。而且你唔記得咗「客人永遠是對的」。

出嚟做嘢，有時你係客；有時人哋係客，視乎邊個畀錢、同邊個收錢。

係嗰20秒嘅對話之間，同事只係對你表示「你個Idea有啲嘢要改」，當佢知道要改啲咩，你愈諗愈唔對路。

正正喺你想反駁嘅時候，同事撻出一句「係個客要求」。

咇咇咇！！完場！！賽事已經結束，「客人隊」喺補時階段連入十九幾球。

你，已經輸了。

其實你好多時都唔明，佢做咩要係咁改你啲嘢？

搵得你做應該信你呀！唔信的話一早就唔應該搵你啦係咪？

好似係，但其實又唔係。

係「客」嘅眼中，佢咩都唔改，咁咪好冇用？

好似畀你威晒，點得呀？

而且件事出到嚟真係好惦嘅，佢都冇咩功勞喎，因為佢淨係做Approval，冇Input。

所以佢老虎蟹都要改，都要畀意見，啲咩「Logo大少少」、「可唔可以順便Sell埋另一個Function呀」、「個活動早15分鐘好啲」之類……

有意見有參與，出到嚟OK的話，佢會覺得「我啲意見救返件事」；

出到嚟唔OK的話，佢會認為「我啲意見已經盡量去救件事」；

千錯萬錯，你錯。

若然個Idea無懈可擊、石破天驚，真係改無可改咁點算？

佢都會改，亂Q咁改。

將「無懈可擊」，變成「不堪一擊」。

坦白講，Idea嘅嘢，多數第一下諗出嚟係最好。

愈改多數係愈差，甚至改到冇晒原來嘅味道。

有時一個細微改動，足足毀滅一個優良意念。

不過既然你出到「個客要求」呢招……咁就唔話可說。

做畀你囉，之後等衰囉。

有人話，好老闆難求；

其實，好客更難求。

假如你喺工作上，遇到一個肯找數，又任你發揮嘅客人，我建議你畀個折頭佢、或者專心地做好佢。

因為你要明白，客人永遠是對的，但同時，客人多數是好膠的。

IG:cheungson88