Judith係我大學時識嘅朋友，佢果時喺研究院讀緊營養學，今時今時，已經係一個博士後營養學家，喺大學教書。
但佢每次識嘅男朋友都古古怪怪。
上次果個數學系嘅，去街市買棵菜唔知點解都要應用微積分。
前次識咗個中文系嘅，諗住會浪漫少少，但又成日掛住研究古文對佢愛理不理。
今晚，佢又喊住咁打俾我︰
「唉……我想要嘅幸福，係咪根本唔存在呢？」
學者即係學者，喊緊果時嘅疑問咁有哲學味。
「做咩咁講呀？」
「近幾年我唔係無拖拍，但唔知點解，總係好似差咗啲嘢咁……今次果個又……唉……」
「今次果個又點呢？」
「其實佢都算係咁，醫學院果邊做緊TA，都有長進心……只不過有啲壞習慣佢好堅持……」
「煙？酒」
「男朋友鍾意將副人骨放喺睡房入面望住瞓，嗌咗好多次交都唔肯改……」
我好辛苦先忍到唔笑。
兩個人嘅相處，講到尾都係你就下我，我就下你。
Judith嘅男友固然係古怪，但Judith自己都有營養學家嘅執著，要求嚴格控制飲食，要男朋友同佢餐餐都食三低一高、三份蔬菜兩份水果，講真都唔係個個凡人頂得順。

佢哋嘅心態都唔係玩玩下，但總係無辦法遷就對方，最後相處唔到唯有分手。
Judith只係想搵一個人可以開開心心咁一齊行落去。
但現實點解好似好難咁？
「次次都咁多問題，其實問題係咪喺我度呢？」
「有無諗過，你會唔會根本同佢哋唔夾呢？」
「可能係嘅……但係……其實我真係無乜選擇囉。」
「點會呀？」
「自己知自己事，其實我……我都好揀擇。始終自己有返咁上下學歷，都希望對方係差唔多學歷嘅人……」
「咁你學歷又真係高啲。」
「然後我又接受唔到男仔太矮，又唔想同我年紀差太遠……唉，呢幾個條件加埋，仲要單身，剩低嘅真係唔多……」
Judith每日嘅生活都係對住啲膽固醇同卡路里，本身已經唔容易搵到啱條件嘅人。
所以偶然遇到一個，佢都唔想放棄。
每次見幾面覺得啱feel，都會一齊咗先。
但時間耐咗，就會發現問題越來越多。
結果越係心急，反而越嘥時間。
「不如試下改變方法，真係搵到啱嘅人先開始啦？」
「我都唔知點先叫啱……」
「有無諗過去Lunch Dating呀？」
「Speed Dating？」
「唔同，Lunch Dating係會有專人同你傾偈，分析問題，仲會有輔導。如果了解足夠後發現有合適嘅對象，先再幫你安排幫食Lunch，大家輕鬆啲，簡單啲。」
「有分析輔導都幾好……但係我擔心自己面對唔到自己嘅問題……」
「不如去聽下先啦，反正第一次去係免費嘅。同其他人傾下，話唔定你會更加了解自己需要乜嘢呢？」
「都係……不過，你可唔可以俾啲勇氣我？」
「勇氣勇氣勇氣勇氣勇氣！」
「哈哈哈，你真係呀！」
愛因斯坦話︰不斷去做同一件事而期待一個唔同嘅結果，就係瘋狂。
好多人每次都會同返同一類人拍拖，因為佢哋俾某類特質吸引。
但又因為果一類特質，令同樣嘅問題重覆出現。
講到尾，無限輪迴可能只係一個心結。
走出自設嘅圈套，對呢類人嚟講係一種解脫。
幸福存唔存在？形而上嘅層面嚟講，我相信存在。
只不過，俗世人想要得到幸福，就要需要付出比較多嘅努力。
呢個世界總會有人唔介意睡房入面有副人骨模型，亦會有人好鍾意俾另一半管住自己飲食習慣嘅。
Judith，加油呀！

又曦