香港人嘅壓力有幾巨大，由細細個揹起有十本書嘅書包開始，已經一清二楚。
每件事，唔係因為「想做」，而係「有目的而做」。
習慣咗呢種思維，每個行為都多咗好多考慮，連帶同人與人之間嘅關係，都違抗唔到呢種本質。
有一本我好鍾意嘅漫畫講過
「人同人之間之所以不斷尋求了解，係因為人類根本冇可能完全了解對方。」
喺呢個咁大壓力嘅社會之中，大家都好強，扮到好強。
其實累鬥累。
唔同制度都話你聽，你要叻啲、你要勁啲、你要超越啲咩咩咩，
你唔想逼自己，但發現身邊所有人都Push緊自己。
每個人彷彿都已經接受，你又仲點敢拒絕？
唔想被淘汰，唯有努力去適應世界。

好多嘢，我都唔敢講畀人聽。
因為大家都已經咁強，都死撐緊，你點好意思講啲咩？
唔講，就唯有忍，不斷吞落肚，用麻醉當解決方法。
你唔想示弱。
但呢個世界好奇妙。
有幾位朋友，之所以會進展成密友，
正正因為我對佢哋示弱過。
試過將自己最不堪嘅一面釋放，
你以為會形象盡毀？你以為人哋會覺得你7？
其實相反，你示弱因為你真心，肯對佢示弱係一種信任。
好多時，你示弱之後對方都會同你盡訴心中情。
雖然大家都明白，互相安慰並唔等於解決問題，
但人之人之間嘅支持，先畀到力量你去諗解決方法。
偶爾嘅示弱，係人類嘅必需品。
就算你覺得身邊冇對象，都有好多機構可以幫你。
香港比從前冷漠，但人情味依然未散，
有啲咩講出嚟，大家會扶住你。
或者到最後，人之人都唔會完全了解。
但冇所謂，至少拉近咗距離，近到你可以將屈喺心中嘅說話，慢慢講出嚟。
呢幾年一有強大壓力，我就會感覺到呼吸困難，
但依然撐住，因為知道仲有好多朋友都願意聽我廢蹹，
知道自己仲可以去示弱。
所以，有咩事我哋都可以捱過去！