「我係一個好無安全感既人。如果你真係想同我一齊，要俾到安全感我。」

我同啊Kay表白之後，佢同我講左D咁既野。

下？咪玩啦，咩黎架？

對於我呢個毫無拍拖經驗既人黎講，根本就唔知安全感係乜。

所以，我分別打俾三個死黨求救。

啊俊:「夠大隻，保護到佢，咁咪有安全感囉。」

啊文:「最緊要你有錢。有錢就有安全感。」

啊超:「俾曬你所有賬號既密碼佢。」

屌！三個答案都唔同，ABC選擇題咩！

為左搵出真相，我決定問我唯一既女性朋友啊May。

「到底乜野係安全感？」

..................................................................................................................................................................................................

「嗱，俾你既。」

藍剔左我幾個鐘之後，啊May終於覆番我。

「......」

望住佢打既清單，過百項條件列曬出黎，仲要每條都輔以詳細既解釋，驚死我睇唔明咁。我諗分分鐘仲長過基本法。

我轉過頭，望見枱面上既孔子木雕，深深咁哀嘆左一聲。

就算係被稱為至聖先師既孔子復活都未必答到我。我心諗。

不過唔緊要，我同佢都係一齊左。

一黎我由細到大都好相信一句說話——船到橋頭自然直。到出事既時候我自然會明白係咩意思。

二黎我相信就算出左事我都可以解決到。

一齊之後，我事無大小都對佢噓寒問暖，每日幾百條whatsapp亦不在話下，直頭拋棄埋我既前度女友——打機。

「今日凍啊！記得著多件衫啊！<3」

「唔好咁夜訓啊，第二日會無精神架！」

「你唔舒服有無去睇醫生啊？休息多D啦！」

我認我煩，直頭仲煩過佢老豆。不過佢好似又幾中意我既煩。

「你覺得呢條裙好唔好睇？」

「唔準食咁多熱氣野啊！」

「我今日俾人鬧，好唔開心。」仲加左個喊既emoji。

日子風平浪靜咁過去，而我亦都慢慢咁鬆懈左。

由每日幾百條whatsapp，去到得番唔過百條，仲要有六成都係毫無意義既純emoji。

「你覺唔覺得我地好似無乜話題傾？」

「唔覺啊！」我一心掛住打機，邊得閑理佢。

「你諗下我地可以傾D咩啦。 :(」

「好好好。」之後我就繼續打機，無理到佢。

傻架咩！咁我係諗唔到啊嘛！

偏偏最仆街既事發生左，跟住落黎既幾個星期我突然忙左好多。

由每日唔過百條whatsapp，去到得番幾條，甚至我試過兩三日無搵佢。

「其實我想講，不如我地分手。」

「下？做咩啊？我係咪做錯野啊？對唔住啊！」我呢一刻先意識到自己似乎衰左。

「唔係你既錯，只係我地根本就唔適合。」

「到底係因為咩事？」我追問。

一方面係想知道死因，唔想死得不明不白。另一方面係我真係中意佢，唔係玩玩下。

「你俾唔到安全感我。」

一句說話，我即刻五雷轟頂。

我沉默左，無挽回佢。

因為我知道，今次我真係抵死。

我將自己鎖係間房度諗左三日，先至明白。

原來女仔想要既安全感，好簡單。並唔係要你有幾大隻，唔係要你有幾多錢，唔係要你俾曬所有賬號既密碼佢。

所謂既安全感，其實只係想你證明俾佢睇佢係你心入面佔既份量有幾重，只係要你緊張佢、在乎佢。

真係好簡單。

原來我曾經做到。

可惜，到我明白既時候一切都已經太遲。