我叫啊明，係一個悲觀既人。身邊既朋友成日都話我諗野太負面太消極。不過，無論係任何情況下都凈係諗最差既結果係我既作風。
幾年前，我係網上識左一個女仔，佢叫Kelly。
Kelly係我一個同學既朋友。事關我個同學果陣係網上搞活動，我同佢都有份幫手，之後私底下傾下傾下就識左。
就咁，我地傾左一年。呢一年黎無約過出黎見面，只係透過whatsapp黎吹水。
講笑咩，約女仔出街，我不如約我班fd好過啦。
雖然無見過面，但係一年黎既吹水令到我地都幾熟悉對方。至少我覺得係囉，雖然我連佢咩樣都唔知。
我地間唔中講下笑，有咩唔開心都會搵對方傾訴下。
至於調戲搞曖昧？我真係無諗過。
慢慢咁，係呢一年入面我發覺自己好似對佢有左好感。
下？唔係掛？連樣都唔知就有左好感？搞笑咩！
我知道果下都真係嚇一跳。
但係有時候唔係話睇樣先知自己中唔中意一個人。從一個人講既野，係可以知道佢既性格同埋特別之處。而我就係佢既一言一語之中，徹底咁淪陷左。
佢既一句說話，可以令我就算幾唔開心都好，都可以即刻笑番。
佢既一句說話，可以令我上一刻係天堂，下一刻已經到左地獄。
但係我一直都唔敢表白。
無錯。我認我淆底，但我唔係驚食檸檬。食檸檬最多都係柒姐。我最驚既係，衰左之後連朋友都無得做。
直到有一日，佢好似知道左。
「你係咪中意我？」我第一時間諗到既係我個死黨出賣左我。
係呢個情況之下，我得兩個選擇。一係就承認，一係就否認。承認左有機會衰，但係否認左就真係永遠都無機會。
「係。我中意你。」
我選擇左搏一鋪。
「係又唔追我！」
下？下？下？咁係咩意思啊？大佬你講野咁隱晦，我唔係幾明喎。
於是，我呢個感情白癡問左個好白癡既問題。
「咁姐係Yes定No啊？」
「Yes啊！得未啊！」
呢一刻，我覺得人生已經無憾。後來我先知道原來佢都中意我。
係埋一齊之後，我地如膠似漆，D甜蜜對話真係我自己睇見都覺得想嘔。
有人話，感情咁好，等睇你地結婚果日啊。而我自己亦都有諗過，同佢有結婚果日。我個死黨亦都話:「全靠我你地先可以一齊炸！唔好浪費我既苦心啊！」
但係現實同理想真係差好遠。
因為我份人實在太悲觀，我好驚有一日佢會突然離我而去，好驚會突然失去左得來不易既幸福。所以我成日都好頹，好容易就焦躁。本來由一件好小既事引發既小摩擦，開頭大家都忍讓，體諒。但係越積越多，去到後來超過左臨界點果陣，終於爆發左。三日一小吵，五日一大吵。
最後，我地冷戰左一個月。
係呢一個月入面，我開始冷靜左落黎，去思考到底我地係埋一齊既決定係咪啱。我諗左好多好多。
可能係我地一齊得太早，我對佢既了解未夠。
可能係我份人太易呷醋，令到佢唔舒服。
可能係我太悲觀，令佢頂唔順。
可能係......
我諗左一大堆既「答案」。
最後，我作出左一個選擇。我決定改變自己，我唔可以再令到我地之間既感情出現多一條裂痕。一條都唔得。
當我諗住搵佢，講我既諗法話佢知既時候。
「分手啦。」
佢已經早我一步。
「點解。」
「我覺得我地做番朋友會好D。」
朋友......
「好，我尊重你既決定。咁我地做番朋友啦。」隔左半個鐘，我先回過神。講出呢句既時候，我感覺到自己既心好似被絞碎左咁。講完之後，我已經脫力咁跌坐係張沙發上面。
唔係我唔想挽回，相反，我好想挽回佢，好想繼續一齊。但係我知道，佢係作出呢個決定既時候係經過左幾多既痛苦，流過幾多既眼淚。
如果做番朋友可以令佢解脫，我痛又有咩所謂。
最緊要佢開心。
但係分左手真係可以做朋友咩？除非，佢根本唔愛你。
分手之後，佢無再搵過我。我亦都唔敢搵佢。
「做番朋友」呢四個字好似只係口頭上既一句客套說話。
直到依家，每當我睇番我當日既回答，我都好後悔。
我後悔既，唔係唔識做佢男朋友，唔係太遲鈍，唔係無挽回佢，而係......我同佢一齊。
假如時光可以重黎，我唔會再承認我中意佢。
至少，我可以繼續做佢既朋友，係佢既身邊，睇住佢幸福......
咁就夠......
.
.
.
.
.
「你係咪中意我？」
「傻架咩你，我點會中意你。」
..............................................................................................................................
「話你知啦，我拍拖啦！」
「係咩，你都有人要？哈哈，恭喜曬。」
