某晚深夜放工，帶著疲倦身體搭小巴返屋企時，發現身旁個男人竟然擁有超過三十幾把鎖喺身，望一望佢個樣，見到佢痛苦表情，嗰雙眼好似對人生充滿絕望般一樣，我完全想像唔到呢個人究竟內心存有幾多心事同唔開心從而生長咁多把鎖?
「先生，你有冇事?」我擔心地問。
佢望一望我，再望一望自己，拎起胸前數把鎖，苦笑地說:「又多咗幾把鎖......」
「其實你係咪有心事? 不如去睇上心理醫生好嗎?」
那男人苦笑地搖頭，然後說:「無用，如果醫生可以幫我解決，我一早已經解決左。」
「但係你咁樣......」
個男人閉上眼，我見佢好似想瞓陣於是就唔打擾佢。過咗陣，我要落車了，我八掛地再望一望個男人，發現佢無任何表情同呼吸，由於佢生左好多把鎖，上車時已經吸引車上好多人同司機注意。
司機從倒後鏡望一望，即刻爆哂粗咁講:「屌你老母.....要死就唔好死喺我架車到啦屌你!生咁多把鎖喺身把撚咩.......咁撚灰嘅話好心就自己屈埋一邊死咗佢算喇!」
車上頓時紛紛加入討論，有人報專屬「清理部門」執屍，亦有人同司機一樣認為呢類人應該滅絕，對社會無貢獻。
事後我就無再理會，我落車後一直係到沉思，腦海一直出現個男人嘅畫面，鎖鏈與鎖鏈之間嘅摩擦聲不斷係我耳邊出現。
好多年前，香港突然發生了一件怪事，就係有部份人身體上長出一把鎖，鎖鏈貫穿咗身體各部份，除咗影響外觀之外，竟然對身體結構無造成任何破壞，亦可以令身體各機能正常運作。唯一令人感到影響，就係部份人需要揹負住呢把沉重嘅鎖做人。
雖然政府同各醫學部門都紛紛研究同進行切除手術，但發現當強行切除鎖鏈時，該宿主便會立刻死亡，因此令政府等相關人員束手無策。
但有研究人員指出:「雖然把鎖唔可以強行切除，但有一點係不變，就係有鎖自然有鎖匙，而每個人所生出嘅鎖都有鎖口，姐係話可以有鎖匙可以解開把鎖，從而除下。」
亦有報告指出，所生出鎖嘅人大部份有長期情緒病，抑鬱等精神心理上病徵，令人聯想到呢部份人大概「屈病屈出鎖」，所以對呢部份人加以輔導。
事隔五年後，當日香港人反應好大，社會輿論激烈，現今香港人已經習慣了，而且愈黎愈多人生出把鎖，真係隨街都搵到幾個，而呢類人愈生愈多鎖，令身體非常沉重痛苦，有人選擇強行切除而死，有人選擇揹負呢堆鎖繼續痛苦地做人，亦有正常嘅人開始歧視呢類人，認為佢地「有病」。種種情況局面令社會上出現分化。
當我返到屋企後，寂靜家裡，枱上放住一碗湯。已經好耐無同屋企人坐低食餐飯，有時侯唔係無時間食，而係懶得去食，亦放工後唔想見任何人。入房後，稅務局又寄信黎，夾雜住一大堆信用卡月結單，仲有戶口無論點上都買唔到樓嘅數字，加上身體一直隱藏住某種病，種種因素加埋開始令我感到喘息。
拎起手機，從Whatsapp list上睇，發現無咩人可以傾談，而女朋友都懶得去搵。因為佢總會埋怨，認為我經常發出負能量，點解唔可以好似佢咁，開開心心返工，開開心心做人。
就好似佢界定咩係生活，我就係侮辱了生存。
而佢快樂過嘅就係生活 我為生存而拚命
諗諗下，不自覺地流下淚，好似感到十分屈悶似。於是早早瞓算。
一覺醒來，起身嗰刻突然聽到鎖鏈聲音，先發現自己生長左把鎖。呢刻冷汗直出，個心離一離，於是跑去廁所照鏡，無論點整都整唔走把鎖，最後我乖乖地忍受住街外人同埋同事目光，繼續生活落去。
「點解你會生鎖? 仲要唔只一把? 你攪咩黎呀?」女朋友見到我後又開始埋怨，好似生鎖係我自找麻煩咁。
由於外表受影響，女友拋棄了。家人都開始擔心我，亦累左佢地，令佢地過份擔心而生鎖。而我每日嘅鎖開始增加，身體開始沉重，舉步難行，開始感到生命走向盡頭，亦覺得無人可以幫到我，於是強行將身上嘅鎖拔除。
...............
「睇下前面，又一件喇。快啲打去叫人執屍。」路人甲說。
此時，手機上響了一個重要提示，原來係蘋果動新聞提示
「政府已經成功研發出如何解除身上的鎖........」
(完)
