正如大家所知道，我曾經係一個公屋仔，努力考上大學讀BBA，畢業去左IBANK做，係2020年一次金融地震，我投機股票市場，大市回升，一躍成為有錢人。
之後係一次中同聚會入面，我遇番舊情人張芷怡，得悉佢同男朋友Martin冇樓結婚既困境，我用左幾乎全部身家去買必中六合彩，最後比左頭獎八百萬佢去買樓，但因為Martin既不信任，芷怡毅然離開，同左我一齊。
本來一切都係咁美好，我同芷怡感情路上既難關就只係剩番佢個位眼角高既老豆，為左成為番一個有錢人去證明我有能力，有能力去照顧芷怡，我鋌而走險，向貴利借左幾百萬去炒股票，最終破產收場。
本來我以為同芷怡再無辦法行落去個陣，因為一段網上流傳既馬會錄音，芷怡知道左我當初係點樣為左佢既幸福，由天堂跌落凡間，佢最後無放棄到我，願意同番我一齊，去共同面對眼前所有既難關。
人生有如過山車，起起跌跌，尤其身處香港，一個遍地黃金而又遍地陷阱既社會，今日你可以係千萬富翁，聽日你可能就要破產坐監。而呢架過山車幾時會停？無人會知道。
芷怡同番我一齊之後，我即刻就同屋企人講番，等佢地可以開心下，知道呢一杯未來新袍茶仲有著落。呀爸比較少表達情感，幾乎係喜怒不形於色，只係點點頭，講左個「好」字。
而呀媽就較眼淺，眼濕濕咁同我講，話好彩芷怡唔介意，如果唔係你個衰仔點算，仲叫我以後有咩事一定要同屋企人商量左先，唔可以自己去問財仔借錢。我笑左一笑，叫佢放一百二十萬個心，我唔至於會蠢到重蹈覆轍。
但係呀哥個邊，就因為呢件事而嘈左一場大交。當呀哥知道芷怡番左黎，本來只係幾開心，都冇乜野講，之後就出左街。但隔左幾日，佢突然比左一張二百五十萬既支票我，叫我去取消破產，有多既用黎結婚。
係個一刻，我呆左，原來呀哥一知道芷怡番黎之後，就去按左層樓，一世人兩兄弟，呢句說話真係無講錯，二人之間一切心照無需多話，我接左張支票，就去左申請取消破產。
但有一次成家人食完飯，呀嫂突然拎左張供款表出黎，係到鬧我︰「細佬自己貪心去炒股票炒到破產，點解要我地承受？老爺你黎評下理，個衰人瞞住我去按左層樓，唔係寄左張還款表黎我都唔知咩事呀！」之後嗚嗚嗚咁喊左出黎。
我係個一刻先知道，原來大嫂係咩都唔知道，呀哥平日好錫大嫂，雖然層樓係呀哥個名，但今次去按樓咁大件事居然瞞住佢，實在令人意想不到，亦令我好慚愧。
呀哥火氣都有D重︰「上次我話要幫細佬你已經話唔比，搞到芷怡走左，佢地冇得結婚，今次我一定要幫番呀歸架啦，你記唔記得當初我地嘈無錢結婚又係邊個買層樓比我地？做人要飲水思源呀！」
之後就開始嘈交，呀嫂話︰「佢個陣咁有錢，比幾百萬出黎又唔係冇左忽肉，但我地而家係有錢人呀？一個月燈油火蠟，兩邊家用，你估少呀？而家仲要還款。」呀哥面色沉左一沉︰「同屋企人係咪要咁計？」「佢係你屋企人咋，唔係我架！」呀哥聽到呢句，即刻拍枱起身，一言不發，出左門口。
D人成日話︰「有錢又煩，冇錢又煩。」其實呢句說話只不過係用黎安慰窮人，事實上有錢人既煩惱對窮人黎講，只不過係一種奢侈。
就好似我之前煩惱點樣比錢芷怡同Martin一樣，對窮人黎講係幾咁遙不可及既一件事。所以我諗如果呢一刻，我仲係有錢既話，大嫂同呀哥根本就唔會嗌交，呢D煩惱亦唔會出現。
見到佢地咁樣嘈法，我個心好不安，件事始終係我自己搞出黎，冇理由要其他人埋單，於是我同芷怡商量完之後就決定左，還完比債主，多左出黎既錢比番大嫂。
之後大嫂佢地每月要供幾多錢，我地都照比幾多佢，我份糧唔夠，芷怡就夾一半，咁我地每個月都仲可以儲到幾千蚊，只係結婚既計劃就要延遲。
雖然係咁，但自此之後，大嫂已經嬲左我地，怪我地破壞左佢兩公婆既關係，甚至話芷怡唔應該番黎我身邊。
隔左一排，事情漸漸穩定落黎。呢一晚，係我同芷怡既拍拖周年紀念，我地出左街食飯，雖然日子重大，但我地只係去左意粉屋，坦白講，呢間野唔算好貴，但食物都叫有保證，而且裝修同佈置有一定水準，可以話係價錢、質素同情調之間取得平衡。
食左一陣，突然有兩個人走埋黎打招呼，我當堂呆左一呆，原來係肥仔強同中學班花李卓玲，我記得肥仔強好似係有錢人，如果好似我地拍拖周年呢D日子，冇可能會黎呢到，但平時食餐飯黎呢到的確唔出奇。
佢地係拖著手行埋黎，肥仔強面有得色，笑笑口咁話︰「呀歸，芷怡，原來你地一齊左呀？」我知佢想講咩，唯有都配合下佢︰「係呀，你地都係啦。」
果然肥仔強愈黎愈開心︰「係呀，近排既事黎啫。」係我心目中，呢個肥仔可以講得上係無可取之處，莫講話外貌呢D天生既野，連內函都冇，極其量都只係一個土豪，李卓玲竟然會鍾意佢，真係令人有D意外。
講左兩句之後，佢地就坐開左。我搖搖頭，咬住舊炸雞翼︰「估唔到李卓玲會同左佢一齊。」芷怡哼左一聲︰「人地同邊個一齊又關你事，我知你當年曾經鍾意過佢，而家係咪想追番人呀？」
「咳咳咳！」我幾乎將舊雞翼骨都吞埋落肚，即刻澄清︰「咁佢個陣係班花，鍾意過都好正常啫，何況係咸豐年前既事，而家都冇野啦，我淨係鍾意你架咋。」之後芷怡先嘟住嘴咁「原諒」我。
但成晚我已經唔敢再望去肥仔強同李卓玲個張枱到，怕芷怡呷醋。雖然自從過左破產個件事之後，我地情比金堅，呢D少少野根本唔會有咩影響，但女人嘛，始終係鍾意耍性兒，作為男人，都唯有配合下，等佢感受一下我既愛意。
食左一陣，肥仔強同李卓玲走左埋黎say goodbye，就係呢個時刻，芷怡既電話響起，佢聽完個電話，皺哂眉頭，面色有D唔妥，話︰「呀爸係屋企暈低，而家入左醫院呀！」芷怡好快手拎起手袋，話︰「快快快，我地要快D撘的士趕去醫院。」
肥仔強突然話︰「你地冇揸車黎？附近好難截的士架喎，不如撘我車啦。」呢一刻，我真係對肥仔改觀，估唔到佢咁樂於助人，之後一齊埋單落到樓下，見到佢架車，我怔左一怔，架車得兩個位。
「係呀，唔記得講，我架車細呀，不如我車芷怡去醫院，呀歸你幫我送呀Ling番屋企？」芷怡見我面色有D唔妥，就話︰「你送完呀玲番屋企再黎醫院搵我好冇？」我點點頭，目送佢地上車離開。雖然我信唔過肥仔強，覺得佢係借D意去接近芷怡，但我信芷怡，肥仔強唔會玩得出咩花樣。
之後我就同李卓玲撘的士番去，原來佢而家住係肥仔強屋企到，過千呎私人住宅，背山面海，我諗市價都要千幾二千萬……佢以前讀書麻麻，又成日比人串，而且冇父幹，估唔到可以撈到風山水起，真係三歳不可定八十，賺錢同讀書之間亦無必然關係。
我送到佢去門口，拎部手機出黎諗住打比芷怡，問佢而家情況點，點知電話已經0%，開都開唔到。我唯有問李卓玲借手機，點知極巧合之下，佢竟然又話手機無咩電，提議我入去用佢部家居電話……
講真，我第一時間心入面冒起既念頭，係諗佢係咪誘惑緊我，就好似戲入面D女仔成日叫男人上佢屋企飲咖啡一樣……你話我FF又好，小人之心度君子之腹又好，作為男人，聽到一個靚女叫你入去佢屋企，都實在好難唔胡思亂想。
但事實證明，只不過係我FF，我一入去，佢冇撲上黎搞我，只係拎左部電話比我，又去斟左杯熱檸檬水我飲，我暗暗呼左口氣，陳天歸呀陳天歸，你真係太自以為是，你估你吳彥祖咩，人地有男朋友架啦，洗引誘你？
我呢刻有D慚愧，芷怡老豆入左廠，我個心竟然係到諗李卓玲係咪想搞我，我唯有即刻將注意力集中番係呢件事上面，打電話比芷怡問下而家咩情況。
可能係醫院既關係，電話打左兩次先通，之後芷怡講左成件事比我聽，原來佢老豆高血壓，一時暈左，醫生話冇咩大礙，但所謂關心則亂，我都出言安慰︰「好小事啫，有醫生睇住，你唔洗擔心，我而家黎醫院搵你啦。」
我收左線，李卓玲走埋黎問我有冇事，我呆左一呆，佢換左套屋企衫，係好鬆身既無袖背心同沙灘褲，露出兩條bra帶同事業線，仲有一對雪白長腿……
我望左一眼已經唔敢再望，竭力淨係對住佢塊面講野︰「無事呀，芷怡個老豆高血壓啫。」但我已經偷偷起吞左啖口水，仲feel到下面有D生理反應，個人有D慶烚烚既感覺。
李卓玲︰「哦，冇事就好啦。」我點左點頭，唔敢再逗留，走去門口，一拉居然開唔到，原來肥仔屋企道大門居然有三個鎖。李卓玲笑笑口咁︰「做咩咁急呀？」走埋去開鎖，開到一半，突然捉住我隻手，成個人烘埋黎……
呢一刻，唔知點解，feel到好唔妥，我平時把持能力都幾高，但近距離望住佢既美貌面孔，吹氣如蘭，忍唔住錫左佢塊面一下，有左第一下就有第二下，我個心模模糊糊咁諗起芷怡，但實在敵不過眼前溫柔，我，同李卓玲上左床……
完事既一刻，我好似先回過神來，識得驚，知道自己闖左禍，如果你問我係咪愛上左李卓玲，所以咁易比佢誘惑到，我可以好肯定咁同你講無，但個一刻唔知點解真係忍唔住想搞佢。
望住李卓玲笑意盈盈既面孔，我怪佢唔落，就如法律都有話，女人係冇得強姦男人。我同自己講︰「冇事既，我地唔講根本冇人知，頭先只係一時痴左線，冇愛。」於是叫佢執好D野，我就離開左。
但其實我好清楚，雖然話冇愛，但唔代表我冇背叛到，更唔代表我冇對芷怡唔住，但實際D咁去睇，唔錯都錯左，我去自首，同芷怡講出黎，只會分手收場。我唔會咁做，而家唯一既辦法就係瞞住佢，當成件事冇發生過。
我深呼吸左一陣，又同自己講︰「陳天歸你要鎮定D，千其唔可以比芷怡發覺有唔妥，只要你以後唔再做錯就得，呢件事你都唔想。」
去到醫院，見芷怡老豆訓係病床到，芷怡面露憂色，我上前拖住佢隻手︰「醫生點講？」芷怡嘆左口氣︰「醫生話要留院觀察一晚呀。」
年紀大係容易病D，佢老豆以前鬧我，唔比我同芷怡一齊個陣，幾好火氣，而家就要訓係病床到，睇落不禁覺得有D可憐同唏噓。但人生就係咁，永遠會發生一D你估唔到既野。
芷怡老豆以前已經發現過有高血壓，但睇過醫生食左一排藥，呢十年黎都冇咩事，點知突然可以係屋企暈低，唯有真係希望佢冇事啦，唔係既話，對於極為著緊家人既芷怡黎講，一定會好傷心。
去到第二日，佢老豆已經番左屋企，只需要再食番藥就得，芷怡放下心頭大石，但過左呢件事無耐，就發生左一件事，令我知道咩叫做紙係包唔住火。
有晚收左工，番到屋企，芷怡係幫緊呀媽開飯，我就去沖涼先，一沖完澡就見到芷怡係門口望住我，雙眼流出淚水。我好驚，即刻問佢咩事，係咪佢老豆高血壓又出事，點知佢比左部電話我睇，上面一張上床既相，男係我，女係李卓玲，張相係肥仔send比佢。
係呢一刻，我唔知可以再講乜野，呢件事冇愛？我把持唔住？因為李卓玲做主動？我個腦一片空白，直到芷怡打開大門離開，我都唔知道可以點樣解釋成件事。
呀爸呀媽問我咩事，我唔敢講出黎，如果比佢地知道自己個仔出軌，佢地一定好傷心。我靜靜咁番左房，望住窗外黑色既夜晚，係到諗，點解個天要比咁多波拆我地，離合、合離。
諗起我地一路以黎既事，因為我一次既把持唔住，就全部化為烏有，呢一刻，我傷心、流淚，但並冇撕心裂肺咁痛哭，或者係因為我一早已經估到，呢件事終有揭穿既一日，而分開都係我應有既報應。
我錯，承受痛苦係應該，但芷怡冇錯，都要承受同樣既痛苦，真係好唔公平，但呢樣或者就係愛情令人迷戀同浪漫既原因。
我冇打比芷怡，因為我真係諗唔到有咩理由可以去解釋同李卓玲上床既事，甚至連我自己都搵唔到可以原諒自己既理由，輾轉反側，徹晚難眠。
「芷怡，我知道你而家一定係好傷心，好痛苦，我只係想同你講，我對你既愛係真，一路以黎既感情我都好珍惜，甚至連我，都估唔到自己會做出D咁既事……或者我地之間會因為呢件事而完結，但係我永遠唔係忘記，係個一晚，你同我講過︰『我地之間，得番一個問題，就係你肯唔肯比我陪你行落去，一齊面對所有野。』你對我既好，我永遠唔會忘記。」我忍住淚水打出呢段文字，send左比芷怡，之後就訓左。
去到第二日，芷怡無比任何回應我，我帶住頹廢既心情番工，繼續一日沉悶既寫字樓生活。我曾經諗過，會唔會係肥仔強設個局陰我，想對芷怡乘虛而入。
不過諗諗下，以佢性格，係屋企裝鏡頭，怕比人偷野，真係一D都唔奇，之後影到我同李卓玲上床，佢當然要揭穿，以報復我比綠帽佢帶，其實肥仔都係受害者，一切都只不過係我既錯，與人無尤。
又隔左好幾日，我同芷怡之間已經再無一言一字既聯絡，我心入面最後既一點希望都漸漸消失。之後有一日番緊工，呀媽突然打電話黎，話芷怡上左去執野走，佢語氣好緊張，但我只係默默咁聽住，叫佢唔洗阻止芷怡，因為我地已經分左手。
隨著芷怡既離開，我既生活變得好似行屍走肉咁，除左平日番工，放假就一個人靜靜咁留係屋企。我同呀嫂之間既關係亦因為咁而變得更差，因為冇左芷怡比一半錢，我份糧已經唔足夠每月還比大嫂去供款，大嫂鬧我，而呀哥就維護我。
見到佢地為我而大傷感情，我心入面不禁重新燃起左一股賺錢既意欲，只要膁到錢還比大嫂，一切既問題都唔會再係問題，有錢並唔係萬能，不過有錢人可以解決到既事，比窮人多上百倍，道理就係咁簡單。
我當年一時意氣之下，曾經郁手打左Martin一拳，留過案底，一般黎講，循正常途徑，咩大公司咩Ibank都已經唔會再請我，當然我唔會再去番炒股票。我寄望既，係爭取番一個合理既、對得住我能力既工作。
我第一步去左搵番舊公司個呀head，佢當年曾經話過要請番我，只係因為我突然多左個案底而作-罷，於是我去搵左佢出黎食飯，舊事重提。其實我都冇諗過要佢請番我，因為我既目標係另一間公司SC。
果然，係我既「循循善誘」之下，佢最後話︰「你都講得好啱，以前幫公司賺咁多，我都相信你以後都一定得，不過你知上面班友幾咁膚淺，佢地掌握生殺大權，我都話唔到事，不如咁啦，我幫你問下SC個邊，佢地好似請緊人。」
我私底下再去搵左另外兩個唔同department既head，佢地一個專做IPO、M&A，另一個就睇外匯市場，我做足哂功課，同佢地分享左少少自己既獨到觀點，金融世界好現實，有來就有往，傾左一陣，佢地都答應寫推薦信比我。
雖然我傷過人，但我既能力加上佢地既推薦，SC請左我，月薪5萬，我好滿意，自此我就踏入番繁忙既生活之中，對我黎講，愛情已經隨著芷怡既離開而逝去，而家賺錢處理屋企問題先係最重要。
過左一個月，呀爸呀媽先明白到，我同芷怡真係散左，佢地又開始叫我快D搵番個女朋友，因為我都就快3字頭，拍得幾年拖，就係時候結婚。但我每次都只係搖頭苦笑，我根本冇可能忘記到芷怡。
每一次經過我地踏足過既地方，個心不期然就會冒起佢既笑容，之後就係佢離開我時，臉上露出既傷痛，之後就會諗番起我所做過既錯事，然後悔恨……或者我，根本就唔配擁有一個咁好既女仔。
香港、高樓大厦、辦公室……有一種令人沉悶、窒息既空氣，尤其當你身處係一個好緊張、步伐好快既行業，每一刻，頸上既領帶就好似收緊一分咁，我離開左幾年，再番黎金融行業，感覺真係好辛苦，畢竟我已經再無年輕時既衝勁。
釋放壓力既方法，我會選擇做運動、健身，又或者去一個靜靜地、無咩人既地方，遠離石屎森林，欣賞一下美好既大自然。
於是係一個假日，我踩單車去下白泥，眼前係一片夕陽餘輝，幾道於棕色泥沙之中彎曲緩淌既水流，我閉合雙眼，感受柔風，似乎所有壓力都釋放左出黎。以前都唔覺，原來夕陽係咁美麗。
呢一刻，我最希望既，係芷怡可以係我身邊，一齊望住夕陽慢慢下落，黑夜漸漸降臨，直到天空滿佈一閃一閃既星星，可惜已經冇咁既機會。
做完運動，睇完美景，身心舒緩過後，我番到屋企，打開大門既一刻，我呆左，因為有一個客人黎左，一個女人，佢唔係芷怡，係李卓玲。
我帶左佢落樓下公園，兩個人沉默左一陣，都係由我打破沉默︰「你……點解會上黎？」其實我真正想問既係點解佢會知我住邊，不過太直接好似好有敵意。
但李卓玲已經會意到，話︰「我去問呀強你住邊，呀強再去問芷怡……」我打左個突，李卓玲又話︰「其實我今日黎，係有D野想同你講，個一次，好對唔住，搞到你地咁。」我苦笑︰「我都有責任，一隻手掌拍唔響。」
李卓玲凝望住我雙眼，忽然話︰「呀歸，你……你真係好，你冇怪我？」我搖頭︰「我怪既係我自己。」李卓玲突然眼濕濕，喊左出黎，好似黎告解認罪，我不禁嚇左一跳，遞上紙巾。
李卓玲接過紙巾，抹左一抹，又話︰「其實係我唔好。」雖然事實係佢引我，但畢竟我都有錯，唯有安慰佢︰「算啦，事情都過左去。」「其實個日係我特登咁做。」「我都知……」「唔係呀！我既意思係，係呀強叫我咁做架。」
我聽到呢句說話，猶如晴天霹靂！之後李卓玲講哂成件事出黎，我目定口呆，腦海一片空白，事情竟然好似拍戲一樣離奇曲折，令人難以置信。
事情要由李卓玲同肥仔強既關係講起，原來佢地並唔係我想像中，普通墮入愛河既情侶。係上一次諾士佛臺既中學同學聚會過後，肥仔強主動whatsapp李卓玲，仲約佢出街。
本來李卓玲都冇理佢，始終肥仔強都唔係佢杯茶，但佢好有耐心，過左幾個月，李卓玲再拒絕唔到，終於出第一次街。個一晚，肥仔強突然問佢一個月搵幾多，李卓玲就話大約兩三萬啦。之後肥仔強話比三千蚊佢，問今晚可唔可以同佢上床，仲計埋數話上一次床等於佢幾日人工，係抵到爛。
李卓玲當然唔肯，仲鬧左佢幾句，話講笑都唔好搵呢D黎講，之後肥仔強不斷提高銀碼，直到一萬蚊。李卓玲講到呢到，面色慘白，我知道，佢最後答應左。
可能有人覺得佢拜金或者水性楊花，但我唔會批評佢，因為我知道有時錢或者比尊嚴同身體更重要，世界上並無絕對正確或者錯誤既道德觀念。
可能有D人會話，無論咩原因，都唔應該為金錢而賣身，我可以講，呢D人可能根本無體會過生活艱難既日子，只係活係自己既理想世界之中。
有女仔只係純粹想自己既生活好D而去出賣身體，但未必每一個咁做既女仔都只係為左自己。或者佢屋企人患病等錢醫，所以佢先犧牲自己？又或者佢要比錢供細佬妹出國讀書，所以先犧牲自己？
有好多野，一般人係睇唔出，所以我唔敢去批評佢咁做係啱定錯，亦無問佢咁做既原因，我淨係感激佢，因為事情牽涉到佢尊嚴既問題，但佢直言不諱。
就係個次之後，李卓玲就每個禮拜都會陪佢幾次，又會係佢屋企過夜，肥仔強要佢陪個陣，就算係無錢，李卓玲都會盡量出現，我諗佢係唔想得失肥仔。
之後漸漸地兩個人就「一齊左」，但只有佢地兩個先知道，佢地既關係只係建基於金錢之上，似金主僕人多過男女朋友。
之後我地四個係意粉屋撞到，就係我送李卓玲番屋企個陣，肥仔強send左一個訊息比佢，叫佢引誘我上床，而咁做既話，李卓玲會有五萬蚊報酬。
於是李卓玲就係我杯水到落左藥，結果如肥仔強所願，佢拍低左我地既上床片段。而佢咁做既目的好簡單，其實就係想拆散我同芷怡，好等佢乘虛而入……
李卓玲講完呢番說話之後，就僕左係我膊頭到喊，話好對我地唔住，佢不嬲同肥仔強交易無傷害過任何人，而家好後悔咁樣做拆散左我同芷怡，話實在唔想見到芷怡比呢個衰人呃。我望住佢臉上既淚水，嘆左一口氣，事情遠超我想像，一切既野原來都係肥仔強既一個局。
以肥仔強既心計手段，我驚唔洗幾耐，芷怡會比佢追到。本來我已經冇資格去理會，但而家知道左成件事既真相，我絕對唔可以比芷怡同佢一齊，一定要諗辦法阻止一切。
話雖如此，但李卓玲懇求我，唔好將佢同肥仔強交易既事講比其他人聽，咁我又可以點同芷怡解釋？
事到如今，我已經唔理得咁多，如果比芷怡同呢個衰人一齊，將會係我人生中最大既遺憾，我決定搵番芷怡，就算好多野講唔清楚，我都希望佢可以相信我。
第二日收左工，我就去左芷怡樓下等佢。當芷怡出現既時候，我怔左一怔，芷怡係肥仔強架車到行出黎，我個心當堂沉左一沉，唔通……佢地已經一齊左？望住佢地，我個心好似揪住揪住咁。
見肥仔強走左，我先行出黎，芷怡一見到我，第一個反應竟然係轉過面去，直行直過。我個心又好似鐵通插左一下咁，好痛，我衝上前捉住佢手，芷怡先好冷漠咁停低左，問我想點。
我同佢講︰「件事唔係你諗咁樣，肥仔強唔係好人，你唔好信佢。」「你既意思係你同卓玲無上過床？無做過？」我頓時語塞。
芷怡咬住下唇︰「到呢個時候你仲想解釋D乜野？到呢個時候你仲可以將自己既錯歸咎於其他人？陳天歸，你好自私。」
我不自禁鬆開左佢隻手︰「芷怡，我……我唔可以解釋咁多，總之你要信我。」講完呢句說話，連我自己都覺得好無力。
芷怡眼眶微紅，語帶泣聲︰「你唔係唔可以解釋，只係連你自己都解釋唔到。當日，你犧牲成副身家，只係為左比八百萬我，我本以為你就係我既真命天子。但點解，點解一遇到另一個女人，你就可以變心？」
我嘆左一口氣︰「芷怡，我知道好多野我都無可辯駁，我都唔奢望可以同番你一齊，但我只係想話比你知，肥仔強真係唔係一個好人。」
「呢排呀強成日陪我照顧爸爸，佢係D咩人我好清楚，你？係我去緊醫院，傷心擔憂緊個陣，你只係同李卓玲上緊床咋，仲有咩資格話其他人點樣？」佢講完呢句，就掩臉離開，留低我一個人，呆望住漆黑既天空。
我腦海淨係不停纏繞住呢一句說話，我開始係到諗，就我比人落左藥，我個刻既神智都係清醒，絕對可以選擇到唔同李卓玲上床，只係我忍唔住，所以點講都好，我始終都係背叛左一個一直好相信我好愛我既女人。
我以前讀基督教學校，老師講過，魔鬼係會比好多試煉人，人如果抵受唔住試煉，做出左不義既事，就係有罪，並唔可以將罪行歸咎於引誘人既魔鬼，以前我不以為然，但呢個道理而家竟然可以套用番係我身上，真係好諷刺。
我番到屋企，訓係床上，好想訓著，乜野都唔理，但真係訓唔到，每當我合上眼，都會出現芷怡失望流淚既神情，覺得自己真係好失敗。
迷迷糊糊，唔知去到幾多點，我先攰到訓左。醒番既一刻已經十點幾，望住灑遍大地既陽光，就好似當頭棒喝一樣，我個心震左一震，只要太陽每日都升起，人總係有希望，有未來，呢一刻，我暗暗發左一個誓，一定要保護呢個我一生中最愛既女人。
我請左病假，係屋企思考點樣可以對付呢個肥仔。以前係金融市場打滾，身邊既敵人數之不盡，亦因為咁令我迎難而上，而家係感情路上都係同一個道理，有左敵人，我既衝勁番左黎，冇錯，就算芷怡唔信我，我都要成為佢身邊既騎士。
我搵左私家偵探，去查肥仔強，只要搵到佢既痛腳比芷怡睇，咁芷怡就會知道佢係一個咩人。我鬆左一口氣，忽然覺得事情其實好易解決，我根本唔洗煩惱，因為以肥仔既為人，我諗唔洗一個禮拜，已經可以搵到十單佢既衰野。
點知過左一個月，私家偵探竟然話查唔到咩衰野，淨係話見到佢成日車出車入一個女仔，而呢個女仔，我望一望張相，係芷怡，我呆呆對住幾張佢地係車上既相，茫然若失，亦有D心痛。
但隨即，我就交緊牙關，放棄係一件好容易既事，但遇到難關，堅持到底，並唔係人人都做到，為左芷怡，我唔會放棄，更何況我已經冇野可以輸。
芷怡係一個好睇重屋企人既女仔，所以有一晚，趁芷怡唔係屋企，我上左去搵佢老豆，要說服佢老豆唔好比芷怡同肥仔強一齊。
開門見到佢老豆個一刻，我幾乎認佢唔到，佢面色蒼白，好似老左十幾年咁，講野冇咩中氣，我諗上次暈低入院，真係令到佢好辛苦。
我同佢講左，芷怡近排同個男人走得好近，呢個男人並唔係好人。但佢老豆就講左一件事比我知，原來個一日佢出事，並唔係留院觀察就完事咁簡單，而係中風，之後去左私家醫院做通波仔手術。
私家醫院費用好貴，淨係個金屬支架已經要十萬蚊，加埋手術費住院費，總共洗左三十幾萬，但佢地都冇辦法，要照去。
公立醫院人手不足，政府淨係識比錢去做大白象工程，幾年之前立法會剪布，強行通過左個高鐵撥款議案，最後用左過千億去做一條根本冇咩人用既鐵路，但撥款搞醫院，增人手，增設備呢D野，就從來都冇出力去做過。
於是香港人想係公立醫院做個手術都要排期年幾兩年，但病呢D野根本就唔拖得，唯有被逼比好多錢去睇私家。政府高官個個高薪厚職，又點會知道小市民既苦處。
芷怡一時間拎唔到咁多錢出黎，肥仔強幫佢出左，而我就被蒙在鼓裏，芷怡老豆話，芷怡知道我冇錢，都幫唔到手，唔想我覺得難受，先瞞住我。
佢講到最尾，有氣無力咁嘆左一口氣︰「而家呀女晚晚係房到喊，唉，我老啦，理唔到咁多，唔識你地後生仔D感情事。以前我地個輩好簡單架咋，你鍾意我，我鍾意你，咁就一世。」
當初，佢怕我無錢照顧唔到芷怡，曾經極力反對我地一齊，估唔到而家講左呢一番說話出黎。你鍾意我，我鍾意你，咁就一世，十二個字，愛情，原來可以好簡單。
番到屋企，我問呀哥拎左三十萬，呀哥無問我用黎做咩，即刻過左數比我，仲同我講，呀嫂個邊唔洗擔心，有咩需要即管講。我知道呢D錢佢兩公婆儲得好辛苦，心入面好感激。
我開左張支票，去搵芷怡，同佢講︰「你呀爸已經講哂所有野比我聽，呢張三十萬支票，你拎去還比肥仔強啦，以後唔好理佢，佢唔係好人，接近你係有目的。」
芷怡望住張支票，冇接到，淨係問我邊到黎咁多錢，佢好清楚我屋企既環境，分左手淨係兩個幾月，無理由突然多左筆錢出黎，聽到佢咁問，我好感動，我知道，芷怡原來仲係好關心我。
我笑左一笑︰「你唔知咩，我係一個可以隨時變八百萬出黎比你既男人。」之後將支票塞左落佢個袋入面，就離開左。
呢三十萬或者唔係咩大數目，但我唔想芷怡欠左肥仔強人情，因為人情遠比呢三十萬麻煩得多。
過左幾日，係公司，突然呀head話有個大客下午會上黎，話係大生意，傾得成可能有幾千萬比我地投資，個客仲指定要我跟。
我當時好奇怪，唔通係我以前相識既人？點都好，我準備好個presentation，到左下午，個客上左黎，我望住佢，呢一刻，我無辦法歡迎佢，只係不斷強忍自己既怒氣，因為呢個人，竟然係肥仔強。
我知道，佢一定係故意上黎搵我，只係唔知佢到底有咩目的，我都唔理咁多，照平時咁，present左一次，問佢有咩意見。肥仔強諗左一諗話︰「暫時聽落幾吸引，不過我有D關於投質既野想單獨問一問你，畢竟我背後幾個老細佢地打算投資既數目都唔少，我想對你既能力知多少少，你唔介意嗎？」
我鬆一鬆肩表示無所謂，之後其他人就走開左，留低我地兩個。我冷笑一聲︰「你想點就講啦，唔洗特登搞場大龍鳳。」肥仔強笑嘻嘻咁拎左張支票出黎，係我之前開比佢，叫芷怡代交既三十萬。
佢話︰「拿，D三十萬呢，我就唔會要番架啦，我會同芷怡講張票彈左，咁你就話，因為無錢所以cut左張票啦，就係咁。」
其實如果佢唔想收錢既話，只需要唔入張票就得，但我諗如果咁做既話，芷怡一樣會以為佢已經收左錢，芷怡本來欠佢既人情就會變左欠我人情。
如果要肥仔強主動同芷怡講，話佢唔會收錢，就更加無可能，因為咁只係會比芷怡知道，肥仔強係有目的咁接近，如果唔係大拿拿三十萬點會送出去比一個唔熟既女人，佢一直以黎建立既好感將蕩然無存。
我好清楚，佢而家係想夾份口供令我變成一個衰人，而佢就成為一直係芷怡身邊既好人，所以我係唔會答應。
肥仔強又笑笑口咁話︰「我都估到你冇咁順攤，講，你要幾多錢？五萬？」「唔係人人都好似你咁貪錢。」「七萬！」「你算啦，我三十萬都可以拎出黎比番你，個幾萬蚊我又點會稀罕？」肥仔強點頭︰「好，你要幾多先肯讓芷怡比我？我可以再比多十萬，點？」
我冇再理佢，佢一直將金額提高到十五萬，但係我都冇答應，我唔知點解佢可以為左得到一個女人用咁多錢，幾十萬，佢可以用黎追其他後生靚女，何必要芷怡？
如果你話佢係真心鍾意芷怡，我打死都唔信。或者呢個世界就係有D咁病態，會為左佔有而不惜一切既人。
最後肥仔強見我咁堅持，佢放棄左，但佢同我呀head講左一句，話因為我，呢五千萬既投資唔會比我地，以後都唔會再搵我地公司。
就係因為咁，我即日就比公司炒左，我臨走前，呀head仲話早知我有案底，有前科，一早唔應該請我，如果唔係公司唔會損失一個大客。
呢一刻，我先知道肥仔強既手段係幾厲害，威逼利誘，無所不用其極，上一上黎就可以令到我連工都冇埋。但點都好，芷怡先係最重要，只要佢遠離肥仔強，我再比人炒十次又有咩所謂？
隔左兩日，芷怡whatsapp番我，問我拎銀行戶口，話三十萬佢一時之間拎唔出，會每個月還番錢比我。
但佢一個女人仔，收入唔多，而家百物騰貴，佢又要買藥比老豆，又要請工人照顧，仲邊有咁多錢可以比到我，於是我覆番佢︰「你仲當我係朋友既話，呢筆錢就由佢啦。」芷怡咁覆番我︰「咁你今晚得唔得閒出黎食餐飯？當答謝你。」
我睇到呢句，成個人開心到彈起左，估唔到我仲有機會可以同芷怡一齊食晚餐，雖然我知道，佢只不過係當多謝普通朋友，多謝我比左三十萬佢去還比人，而且以佢性格，D錢佢遲早死慳死底都會儲黎還比我，但點都好，我只係想珍惜可以再同佢相處既每一分一秒。
我而家既心情，就好似暗戀左一個女仔，第一次同佢去街咁，好緊張，好期待。我悉心打扮一番，gel好個頭，等自己睇落醒神D，就出發去餐廳。
呢一間係意大利餐廳，環境同格調我都細心挑選過，柔和既燈光，淡淡既音樂，一切都係咁美好。而芷怡都準時出現。
佢一身淺色長裙，稍施脂粉，臉帶微笑，雖然我地曾經一齊過好耐，但係呢一刻，發現原來佢真係好靚，我呆呆咁望住佢，個心怦怦咁跳。
或者，係因為我知道，過左今晚，就唔可以再成日見到芷怡，所以我先會望住佢咁耐，希望可以將佢既面容印係我腦海之中。
我地無乜點講過野，冇提起肥仔強，冇提起佢老豆既手術，冇提起我同李卓玲既事，冇提過三十萬支票……我地只係好寧靜咁食完左呢一餐。
或者有一日，你都會知道，原來平平淡淡咁對住心愛既人，無論有冇講野，有冇交流，你都會好滿足好開心。
天色已晚，我送芷怡到佢屋企樓下，佢突然停低左，同我講︰「呀歸，我有一件事……想同你道歉。」「嗯？咩事？」「記唔記得個晚，你黎左我樓下，話呀強唔係好人？」「記得呀，做咩？」「我當時講過，話呀強係D咩人，我好清楚，你無資格批評佢。但其實你講得無錯，佢的確唔係好人黎。」
我個心驚左一驚，即刻問佢發生咩事。原來肥仔強威逼利誘我不成之後，又約左芷怡出街，問佢可唔可以做佢女朋友，芷怡就話唔鍾意佢，點知肥仔強就話可以比錢，要同佢上床，仲係咁提高銀碼，同李卓玲既情況一模一樣，唔同既只係芷怡拒絕左。
我話︰「你say no就得啦，呢D人以後唔洗理。」芷怡望住個天，嘆左一口氣︰「我有時真係好唔明，本來以為佢係一個好人啦，但佢竟然會咁做……我睇錯左佢。」我笑左一笑︰「呢個世界不嬲都係有呢D咁既人，唔出奇。」
芷怡突然雙眼凝視住我︰「咁你呢，你又係一個咩人？」我呆左一呆，呢一刻，我唔識點答，我好想同佢講哂成件事出黎，係李卓玲落藥引我，一切我都唔想。
但我答應過李卓玲，唔可以比其他人知道，亦因為咁，我一早已經明白到，或者呢一世，芷怡都唔會原諒我，所以一直以黎，我只係希望佢離開肥仔強，而冇妄想過同番芷怡一齊。
「我問你呀，你又係一個咩人？我真係……真係好唔明白，呢頭你話有幾愛我，仲為左我而破產，轉過頭你可以去同另一個女人上床，之後我地明明分左手，你又幫我出呀爸既手術費，你……你到底係一個咩人？」芷怡講到呢到，眼睛水汪汪，變得微紅，我知道，佢好傷心，好痛苦，因為我，又何嘗唔係？
但呢一刻，我只能夠強忍淚水，我怕我一軟弱，就會講哂成件事出黎。李卓玲已經放低左尊嚴，等我知道實情，可以保護到芷怡，我唔可以去破壞對佢既承諾，呢個係我答應過既事。
我諗番起自出軌以黎既事，嘆左一口氣︰「我都唔知自己係一個衰人定好人，但係我知道，我只係一個愛你既人。」講完呢句，我就轉身離開。
我一路行，背後傳黎既，係芷怡既哭泣聲︰「陳天歸！你知道你係有苦衷既，係唔係？你唔好走，答我呀衰人！」我個心好痛，芷怡既哭聲就好似千萬枝利箭，係背後傳黎，直插我既心臟，我既鮮血好似就快要比人掏空。
呢一刻，係我咁多年黎，最痛既一刻。以前破產個陣，芷怡既離開亦曾經令我好傷心痛苦，但係始終炒燶股票既事係我自己攞黎，冇得去怪責任何人，個種痛，係理所當然既痛。
而家，我如果講哂件事出黎，芷怡可能已經原諒左我，我地可以再起番埋一齊，但偏偏我無辦法咁做，只可以眼白白睇住自己，同最深愛既女人分手收場，呢種，係無可奈何、徹心徹肺既痛。
失去左工作，失去左芷怡，我既人生再次跌落谷底，唔知係咪因為咁，近排仲成日好容易攰。隔左一排，我去搵左份普普通通既文員工作，繼續生活落去。
人生就係咁，無論你身處點樣既逆境，無論你既愛情、事業、家庭，點樣失意都好，人，總係要生活落去。
我本來以為，我既人生已經走到低處，但點知，壞事總係接踵而來。有一日，我收到李卓玲電話，佢約左我出黎，話有D好緊要既事要同我講。
我好奇怪，我地之間應該已經冇咩需要再傾，可能佢想黎問一問我，有冇將佢同肥仔強既事講比其他人知都唔定。
我地係咖啡室到見面。我買左杯凍朱古力，忽然諗番起，好耐之前，我都曾經係呢到，拎住部手提電腦一路打文章，一路等候Jancy，發緊一個作家夢。
之後我無意中見到Martin同另一個女人一齊，仲打左佢一拳，上左差館。亦係個一晚，我就同芷怡一齊左，而家諗番起所有野，真係恍如隔世。
等左一陣，李卓玲黎左，佢神色好凝重，整個人都消瘦左，我不禁心裏疑惑，到底咩事？佢坐低，講左一番話，我真係呆左，冇諗過會發生D咁既事。
原來離開左肥仔強一排，李卓玲話覺得身體有D唔舒服，好似好容易攰咁，又無胃口食野，身型幾乎瘦左兩個圈，佢去睇醫生先知道，原來自己患上左愛滋病，醫生同佢講，或者仲有一年命。
佢比左張卡片，介紹左一間診所比我，叫我快D去檢查身體，坦白講，我的確好驚，即時就打左電話去診所約時間檢查。
Book左時間之後，個人定番少少，始終再驚都唔會再改變到D咩，我放低手機，望住李卓玲，一時唔知道講咩好，我未必會中招，但李卓玲就好肯定，只係得番一年命左右。
人生無常，我第一次覺得遙不可及既死亡，原來係咁接近。而李卓玲都再忍唔住，嗚咽哭泣，細訴痛苦。
佢話知道得病之後，曾經打過電話比肥仔強，同佢講自己有愛滋病既事。點知肥仔強一D都唔驚訝，反而大笑，原來佢本身已經知道自己係有愛滋病，只係無避忌過性行為，有時仲唔會做安全措施。
李卓玲又嬲又傷心，估唔到肥仔強份人可以賤到去呢個地步。我暗暗嘆息，為左錢，李卓玲竟然斷送左自己既人生。
我遞左張紙巾比佢，一張又一張，佢喊完一次又一次，不斷抽泣︰「當初我貪……貪佢D錢所以先咁做，但我做咁……咁多只不過係為左……為左快D買到一層樓，可以同屋企人有一個……有一個安樂窩，點……點解！」我輕輕拍一拍佢背心，李卓玲係咁流淚搖頭，係咁問點解，點解……
原來李卓玲只係為左買一層樓……呢一刻，我唔知可以講D乜野，心入面淨係覺得佢好不幸同可悲。
香港呢個社會，一直都係咁樣，由出生至今，就不斷比人灌輸要努力讀書，第日賺大錢既諗法，人大左，出到黎做野，就更加明白點解人人都話要努力賺錢，因為呢個社會真係一個崎型病態既社會，最基本一個人既住所，都要窮好多人一生既精力先可以得到。
李卓玲同兩老住係唐樓，居住環境不堪，lift都冇部，隨著兩老年紀斬大，行樓梯經常腰酸骨痛，有次媽媽仲跌親入醫院。自此，李卓玲就好想佢地住係一個好D既環境，但公屋佢又排唔到，私人樓又貴得離譜，個一刻，佢好無助。
就係因為咁，佢先會答應肥仔強，收錢同佢發生關係，為左令父母將來住得安適，李卓玲無怨無悔，無人可以言之鑿鑿咁話佢做錯，一切只係一個悲劇。
李卓玲挨完一輪，愈黎愈有機會儲到首期，上天呢個時刻先同佢講，你既人生淨係得番一年，或者世上就係充滿左呢種欺騙眼淚既悲劇。
李卓玲話，唯一興幸既，就係佢買左份保險，佢死左之後會有一百幾萬留番比兩老。但我望住佢臉上既淚痕，好明白，呢一種又點會係咩興幸？
我番到屋企，個人放鬆唔到，係到諗自己會唔會都有事。之後我去左檢查身體，報告出左黎，證實我同李卓玲一樣，有左愛滋病。
聽到既一刻，我有D震驚擔心，但隨即好鎮定，因為呢段日子，我已經無限次幻想過自己會有病，有哂心理準備。呢一刻，我居然前所未有咁平靜。
連醫生都話，未見過人聽到自己有愛滋病之後，可以咁淡定。而且我有肺結核，去到病發期，已經無得醫，大概仲有八個月命，甚至比李卓玲仲要少。
知道自己命不久矣，唔知點解竟然冇乜傷心既感覺，係咪我唔知道死亡既可怕？我都唔知，或者，我淨係係到諗，呢八個月，我可以做到D咩，根本已經冇時間去傷心。
家人、芷怡係我心目中最重要既人，係呢段日子，我好希望可以同佢地好好咁過，為我既人生畫上最後一筆色彩。
我辭左份文員工，每日陪呀媽落街慢跑，陪呀爸一齊聽收音機。佢地有問我，做咩突然又辭左份工，成日係屋企，我就話自己有D攰，想抖番一排先。
呀哥係唯一一個睇得出我有D唔妥既人，話近排成日見我精神唔係咁好，好似特別易攰咁，係咪生活壓力大，勸我早D訓，因為佢知道，我一到深夜就會成日訓唔著，係咁睇番自己同芷怡以前一齊既相。
「我冇野呀，係呀，個三十萬呢，我……」呀哥搖搖頭︰「呢D錢係我自己比你既，你大嫂唔關事。」原來自從破產一事之後，呀哥都會自己偷偷地儲錢，費事用錢時大嫂成日反對。
係呢一刻，我忍唔住，講左一句︰「呀哥，以後你唔洗再儲私己錢啦，我唔洗得你D錢幾耐。」呀哥嚇左一跳︰「咩話？」我喊住咁口，講左我有愛滋病既事出黎。
呀哥嚇到面無血色︰「你……你真係check清楚？」我點左點頭，呢一刻，眼淚好似黃河缺堤，一湧而出，自知到自己有絕症以黎，我自以為自己好堅強，但原來我只係故作剛強，係呀哥面前，我喊到好似一個細路仔咁，對住呀哥，我先敢抒發情緒，佢亦忍唔住哭泣，兩兄弟，一眶淚水。
喊完一輪，我地就係到傾計，好耐未試過屋企無人，得番我地靜靜地咁兩兄弟係到。呀哥忽然讚我，話我好堅強，佢好驕傲，仲話我冇講比呀爸呀媽聽，做得好好。我地都知，呀媽呀爸再堅強，都唔會接受到我得番唔夠一年命既事，白頭人送黑頭人，有D野真係唔知好過知。
「咁芷怡呢？你有冇話比佢聽？」我搖左搖頭，我唔想咁做去博取同情、博取憐愛，我地已經分左手，加上我都就死，不如就等佢忘記我，咁樣會係最好既結局。
我同呀哥商量左，呢件事暫時唔可以比呀爸呀媽知，一切睇定D先。點知只係隔左兩日，我就係屋企頭暈，個心口好痛，最後call左白車，事情揭穿左。
我係病床上，望住呀媽面上既淚痕，望住呀對眼紅哂，我唯有強顏歡笑︰「其實都幾好呀，我仲有時間，你地唔洗傷心喎。」但講到最尾，我聲音都哽咽起黎，無法子唔傷心。
出左院之後，屋企人好照顧我，好似當左我係一個啱啱出生既BB一樣，有時我忍唔住笑︰「我又唔係殘廢，呢D野我做到喎。」但無論點講，佢地始終對我照顧得無微不至。
又隔左半個月，我收到個電話，來電顯示係芷怡，我個心震左一震，佢已經有一排冇搵我，唔知有咩事呢？我聽左電話，另一端傳黎既係悲傷既聲線，芷怡話佢老豆突然爆血管，而家係醫院，佢唔知點算。
我即刻穿上風褸，趕去醫院。見到芷怡坐係到，泣不成聲，原來佢老豆已經救唔番。我個心痛左一痛，走去芷怡隔離，輕輕攬著佢。佢既神情，就好似呀媽知道我有愛滋病個陣一樣，係幾咁無助，係幾咁傷心……
呢段日子，我盡量陪伴芷怡，一來想係自己離開之前見多佢兩面，二來芷怡係一個好需要安全感既女仔，我實在唔放心佢自己一個，我好怕佢會做傻事，我希望可以保護佢，直到我無能力為止。
有一晚，我買左宵夜上佢屋企，食食下，佢又喊左出黎，話呀爸生前最鍾意就係食豆腐花。
呢一刻，我係到諗，如果我將來死左，芷怡又會唔會為我咁傷心？會唔會仲好似以前咁，當我係佢生命中最重要既伴侶？定係佢仲會記起，我當初係點樣出軌，點樣傷害佢？諗到呢到，我不禁茫然若失。
我發呆左一陣，芷怡忽然拋低左對筷子，走左過黎我身邊，雙手攬著我，細細聲咁啜泣。我輕輕掃住佢既長髮，安慰佢︰「冇事既……冇事既……」
芷怡抬起頭，雙眼通紅咁望住我︰「呀歸，你……你係唔係會一直陪住我？」「我梗係會啦。」佢輕輕抽泣︰「我好驚，你……你……會唔會好似爸爸咁，又突然走左去，留低我一個。」
我全身震左一震，無言以對。芷怡忽然係我塊面到錫左一淡，我呆左望住佢。芷怡捉住我隻手︰「我知道，你係有苦衷架，係唔係？個日一定係發生左D事，如果唔係，你……你係唔會同第二個女人……你……你仲係好愛我架，係唔係？」
我沉默左一陣，然後鬆開左佢隻手︰「一個男人同一個女人上床，仲可以有咩原因？開心咪做囉，世界咁大，我冇理由淨係對住你一世架，男人逢場作興，好正常啫。」芷怡呆左，佢大概無諗過我竟然會咁樣講野，但佢亦都唔知，其實講呢句說話個陣，我個心滴緊血。
芷怡呆完之後就坐左係地上，佢冇喊，或者係因為眼淚已經流乾左，佢淨係怔怔咁望住我，喃喃自語︰「咁點解，點解你仲要對我咁好……」
我唔敢再聽落去，唔敢再回望，就咁留低左佢，離開左，希望芷怡聽到我咁講之後，一次過傷心哂佢，從此可以忘記陳天歸呢個人，最好係連我死，佢都唔知道，唔會為我而悲傷。或者咁做，就係我唯一可以給予既，最後一道守護。
又過一個月，我既身體愈黎愈差，隔左幾日，細菌感染，我就入左醫院，生命比我想像中流逝得更快。
屋企人好傷心，甚至連大嫂都冇再嬲我，仲話佢知道，以前對我唔係咁好，覺得我成日搵呀哥笨，但大家到最尾，始終都係一家人，希望我堅持落去，唔好放棄。
我坐係病床上微笑，拍一拍佢手背︰「我梗係會啦。第日靠你好好照顧呀哥啦。」大嫂雙眼含淚，係咁話好好好。
每當屋企人探完病，我都訓係床到，呆望白色既天花，係到諗住芷怡既面孔，唔知佢而家傷心完未呢？我打開手機，睇住以前同佢既合照，一齊去過既地方，我冇好似以前咁，偷偷咁流淚，而家既我反而會心微笑。
我手機播住張敬軒既「P.S. I Love You」︰「身體裏，沒有永生的細胞，皮肉再新鮮，遲早，亦注定無效……」不禁失笑，呢句歌詞竟然形容得我咁貼切，都唔知係咪專唱比病人聽。
我一張一張咁睇番同芷怡、同屋企人影既相，中學、大學、畢業、出黎做野，每一張相都記錄住我既人生歷程，逐一回憶，心入面又滿足又不捨。
「不需要有著你，在雲間俯瞰，祝福你，繼續飛……」或者愛情就好似首歌所講咁偉大，係唔需要擁有對方，只要對方生活得好，自己就一樣會好滿足。
但其實，係內心深處，我真係好想係呢個時候，門口會突然打開，芷怡走入黎，捉住我隻手，情深款款咁，問多我一次︰「你肯唔肯比我陪你行落去，一齊面對所有野。」然後陪我行埋人生既最後一段路……可惜世事，又邊可能咁完美。
回首一生，我好年輕就擁有好多人十世都賺唔到既錢，環遊左半個世界，去過好多人發夢都未去過既地方，但偏偏，最簡簡單單、平淡既生活，對我黎講居然就好似奢侈品一樣，難以擁有。
其實，我只不過想好似普通人咁，可以結婚生仔，同伴侶相愛至老……就好似芷怡老豆話齋︰「你鍾意我，我鍾意你，咁就一世。」愛情只係十二個字咁簡單。但係呢D咁普通、咁簡單既生活，個天就偏偏唔肯比我。
我無奈苦笑，人生既過山車就快要走到盡頭了……或者係閉合雙眼之際，我仍可以記起，呢間房中，曾經響起悠揚既歌聲︰「逾越了——生——死，珍惜這份愛才算勝利……」
-完-
