我劉歸信，係一個高登小說作家，冇諗過，因為一次絲打嘅pm，改變左我嘅人生。
話說啱啱考完Exam，好難得有一個悠長嘅sem break假期，我利用呢段時間繼續埋頭寫文，唔單止日日繼續寫洛神傳，近排仲心血來潮，寫左一個「我女朋友係聖誕節話分手，於是我改造左自己」嘅短篇愛情故事。
鍵盤嘅聲音終於停左落黎，主角方歸銘同芷婷終成眷屬，我鬆左一口氣，原本我諗過寫芷婷一去不番，方歸銘心入面就永遠懷住對兩個女仔嘅遺憾，又諗過寫呀May後來因為一啲意外靜靜咁番左黎香港，點知被方歸銘撞到，跟住歸銘又要再次面對愛情路上嘅決擇。
可惜，我個心始終都係唔捨得咁殘忍，於是簡簡單單咁，就完成左呢一個盪氣迴腸嘅故事。見到有唔少巴絲擺低左正評，又留言話好有感觸，心入面不免有啲開心，可惜香港始終都係流行速食文化，魔法故仲係無咩人睇。
我輕輕嘆左一口氣，禁一禁自己個名，哦？發現有人pm我。再禁左入去，默默咁睇完左呢一段pm，我又嘆左口氣，愛情果然係呢個世界上最令人苦惱嘅事。
Pm嘅原文(省略表情)如下︰
「歸叔，啱先睇完你個聖誕聖分手故，好心酸啊，我覺得自己好似芷婷，男朋友又係好似Leo咁出左軌，我知道左好傷心，但佢又話好後悔，唔會再有下次，你咁有經驗，可唔可以比啲意見我應該點做……」
呢個名為「我係一粒膠」嘅會員，先不論佢係釣狗公定真係絲打求教，首先，佢竟然叫我歸叔，我廿一歳仲讀緊書架！
其次就係……我仲係愛情道上一隻迷途小羔羊，連拖都未拍過。再加上你見我將故事入面嘅主角名都起做「呀歸」，咁你就會明白我有幾咁恨同想像中嘅主角一樣，去拍一次拖，陷入一次驚天動地嘅愛戀當中。所以……我係寫故架咋，所有野都係流架，你當我鄺神咩！點比意見你啊？陣間比完你唔啱用又鬧我點算？
當然，我冇咁pm番佢，我求求其其覆番佢︰「首先，你係咪肯定佢有悔意先？你要知道男人口個句同心個句係可以好唔同。」
我懶係有愛情經驗咁，其實只不過係鳩吹，鬼唔知男人口個句同心個句可以唔同咩，女人都係啦，所以就算將成句改做︰「女人口個句同心個句係可以好唔同。」甚至改做外星人都一樣work呀，呢啲咪叫專業。
隔左一日，我又收到「我係一粒膠」嘅兩個pm，第一個係夜晚11點send過黎︰「我唔知啊，好驚佢又再同其他女仔……」寫開文、 中文修養甚高嘅我第一眼就睇出左呢一句有語意重覆嘅問題，用左個「又」字其實係唔需要再用個「再」字，睇黎呢位絲打唔係好讀到書，我懷疑佢係條mk妹。
而第二個就係凌晨三點send過黎︰「歸叔，你咁耐唔覆pm，係咪好忙，但小女真係好迷惘唔知點做啊，快啲覆下我啦。」呢一刻，我想講粗口，唔洗訓咩大佬？同埋吓吓上高登睇pm，個app又成日down server，煩架嘛屌你！
當然，基於我係一個彬彬有禮嘅學生，我都冇樣覆佢，唯有話︰「忙極都會覆你嘅放心。我覺得你應該諗清楚自己對佢嘅愛有幾深，係咪真係可以接受到佢出軌後嘅道歉先。」拋番個波比佢，掂呀！
又隔左一日，又收到「我係一粒膠」嘅兩個pm，我都知咩事架啦，應該又係嫌我覆得遲……
第一個︰「我唔知呀，我驚自己只不過係好似芷婷咁，怕得番自己一個先原諒佢。」第二個︰「其實不如我比個電話你，你whatsapp我得唔得，唔洗吓吓上黎回pm，6xx1 27xx。」
我望住個電話號碼，呆左，唔係掛，堅唔堅呀？而家啲妹妹仔咁容易就比個電話人？肯定係mk妹！呢啲mk妹我最憎，又要周圍比mk仔啪，又要搵高登仔埋單！
話雖如此，我心裏都不禁有半分好奇，到底呢個「我係一粒膠」係咩樣？會唔會成個膠樣咁？係都幾好笑呀！於是我膽粗粗咁，用手機whatsapp左佢︰「hi，我係呀歸，你係一粒膠？」
其實佢個全名係「我係一粒膠」，最正確應該問佢︰「你係咪『我係一粒膠』？」不過廢事語意重覆，就直接問佢係咪一粒膠算。
啱啱send完，兩個灰剔即刻變做藍剔，瞬間再變做︰「輸入中……」估唔到佢咁機不離手，果然係典型mk妹嘅行為。
佢回覆︰
「你問得好搞笑呀歸叔，我係一粒膠啊XD
話說你覺得我應該點做好？？」
諗到呢到，我突然醒起一件事，大鑊啦，佢覆咁快、咁開心，會唔會只係因為釣緊狗公？然後將我放上高登公審？諗到呢到我即刻驚左一驚。
然後回覆︰「你有冇男友fb，等我用『樣貌觀察法』去分析下佢嘅性格先。」
佢又覆︰「Cheung xxx xxx。歸叔你係咪擔心我唔係女仔lol，我真係絲打。」
Diu，比佢識穿左添，我話就話要佢男友fb，其實只係想睇下呢粒膠到底係咪真係其人，係咪真係有男朋友，估唔到佢諗都唔諗就比左個fb我，睇黎冇錯架啦，應該係我擔心太多啫。
我鬆左一口氣，覆佢︰「咁我循例都要睇下你咩料嘅。我啱啱睇左你男友啦，mk到爆，肯定四周圍食女個隻，又like埋咁多甜post，飛得。」
「吓？乜mk咩？我覺得佢個樣好正常喎，同埋佢都冇睇咩甜post喎。」
「染到成隻金毛尋回犬咁，啲陰又遮哂兩隻眼，完全睇唔到前路，仲唔係mk係咩啊？」
「『圖片』，呢個喎，邊有金毛啊？」佢send左幅圖黎。幾靚仔，幾陽光，唔係我睇個隻金毛獅王。
我拿拿臨再search多次佢男友呀俊個名，終於發現……原來自己search錯另一個「俊」，柒左。同埋發現左個呀俊有張合照裏面有個女仔，應該就係「我係一粒膠」嘅真人，個名叫陳芷蘭，真係估唔到嘅係，佢都幾靚……
我唯有自認柒左︰「我頭先睇錯左……」
「咁呢個點先。」
「呢個唔錯，拍得上我。不過睇一個人嘅樣呢，係睇唔出佢嘅內心架。」
「……咁即係點？」
「唔……即係呢，你覺得佢仲值唔值得你比多次機會佢？」
今次佢隔左一陣，先覆我︰「我諗應該值得掛……」
「咁得啦！原諒佢一次咁多，同佢講冇下次。我要留名跟進呀！」
「OKOK，多謝你: )」
我以為事情就咁樣就會告一段落，但估唔到，唔夠四五日，陳芷蘭又whatsapp番我︰「歸叔: (」
「咩事呀？」
「你留名跟進單野呀，呀俊佢又有第二個女仔，我……我好傷心呀……」
「……其實你有冇諗過，會唔會你先係第三者？」
我呢句帶有半分幽默嘅語氣，諗住哄下佢笑咁，毫無愛情經驗嘅我果然係一個白痴，搞到芷蘭隔左好耐冇應我，可能傷心緊。
我望住雙個藍剔，有啲覺得自己講得過份左，話哂人地又戴帽，再黎多一次就真係帽子戲法，無理由咁講野嘅，於是我即刻send多句︰「講笑咋，佢呢啲咁嘅男仔飛左佢啦。」
「佢同左第二個一齊之後，就飛左我啦: (」唉，睇住呢句，我都唔知講咩，呢個世界就係有無數嘅賤男，唔關一個人個樣m唔mk事，純粹係心地問題，我就自問真係無辦法咁樣去傷害一個女仔兩次。
我唯有循例安慰下佢咁，同時亦都係心入面暗暗咁安慰自己，因為我連失戀比人hurt嘅機會都冇啊……
過左個一日之後，我就多左陳芷蘭呢個朋友。之後我地不時都有係whatsapp到吹下水，佢間唔中諗起呀俊又會傷心，跟住同我吐苦傾訢，不斷講佢地以前之間嘅事，我就默默咁聽住。
直到有一日，佢突然話︰「歸叔……不如我地出黎食餐飯？我想見一見你嘅盧山真面目XD」
「唔好啦，我呢啲又毒又柒160高登仔，望到會污染你雙眼架。」
「唔得啊，無理由傾咁耐都唔見你一次掛？」
……
……
「咁，一於到時見啦，你睇過我fb，知我咩樣架啦？」
「知……」
就係咁，我地就約左係一間尖沙咀嘅西式餐廳到見面。
我唔知點解好緊張，我雖然未拍過拖，但都有試過同女性朋友單獨出街，都冇咁緊張。我諗我係怕，怕出到黎見面個陣，芷蘭會覺得我同佢想像中好唔同，然後會失望。
我真係淆底，想同佢講，今日突然有啲事唔去得，不如下年先約？但化骨龍講過，做人唔可以怯，怯，你就輸成世！於是我鼓起畢生嘅勇氣，死就死啦！
我全副武裝上陣，上半身著住嘅係好貴嘅名牌深黑色Tshirt，無錯，黑色係有分深淺，洗多兩次就會變淺色，下半身係一條牛仔長褲，無得輸！我咁同自己講。
於是我出發左去少沙咀，準時去到麥當勞，我左望右望，聽講靚女通常會遲到，唔知係咪呢？
我見到一個女仔坐係角落頭，面尖尖咁，有啲似芷蘭，我行埋去，佢望住我，我又望住佢，呢一刻，大家有啲尷尬，唔知係咪自己要搵嘅人，呢個女仔無錯，就係芷蘭。
我坐低，望左佢個樣一陣，不禁有啲呆住左，估唔到佢真人係靚過上鏡咁多，之前fb睇嘅相完全具有誤導性質，我直情打算番去report個幾張相。
之後我地簡簡單單傾左兩句，佢忽然話︰「歸叔，估唔到你咁後生。」跟住笑左出黎。佢個笑容差啲令到我呆左，好彩即刻比到反應︰「我不嬲都冇話自己係個老屎忽。」
「但係你啲故好似好老成，經歷左好多咁喎。你係咪拍左好多次拖？」「你唔知咩，高登仔個個都係男神，拍過十幾次拖架啦。」我咁講唔係想懶幽默，我只係唔想同佢講，其實你心目中嘅呀歸，只係一個未拍過拖嘅普通男仔。
「係呢，你個名都幾特別喎，叫芷蘭咁樣，好少聽。」「係啊，我媽咪改架。」佢同我講，原來佢媽咪好鍾意紫羅蘭，於是想將個女個名改做紫蘭。
後黎去搵左個神棍，話咩「紫」字同個女仔八字唔夾，會相沖，最好換左佢，唔好用顏色命名，於是就變左芷蘭。
我話︰「你媽咪咁鍾意紫羅蘭，你不如索性叫羅蘭啦。」佢撲赫一聲笑左出黎，好燦爛。
呢一刻，我心裏面諗緊嘅係，估唔到呢個可以笑得咁開心嘅女仔，居然就係係深夜同我訴苦，傷痛欲絕嘅「我係一粒膠」。所以有一句說話講得好啱，愈係充滿陽光氣息嘅人，就愈係擁有不為人知、傷心嘅一面。
係成個會面過程中，佢不時拎起部電話出黎禁，我諗有唔少人搵佢，忍唔住講左句︰「你都幾忙喎。」佢呆左一呆，跟住笑住咁話︰「近排有個男仔係咁搵我呀。」
雖然佢咁靚而家又單身，有人想追係唔出奇，但我唔知點解，聽到佢話有人接近，不自禁個心沉左一沉，但表面扮哂無野咁，就話︰「男仔？睇過？」
於是佢又比左個男仔嘅相我睇，呢條仔又係好似之前個呀俊咁，高高大大，陽陽光光，靚靚仔仔咁，唔知佢內函點，但論外型，客觀咁講的確係唔錯，至少已經比我好好多。
我淡淡咁話︰「呢個男仔唔錯啊。」芷蘭突然唉左一聲，話︰「但係靚仔無本心啊。」
我地呢日嘅會面就係咁完結左。番到屋企，我呆呆咁訓左係床上面，望住個灰灰黑黑滿佈污跡嘅天花板，不禁諗番起芷蘭個樣，天真嘅笑容，甜甜嘅聲線。
我……我咁樣係咪即係鍾意左佢？我自己都唔知。因為食色性也，聽講靚女好易令人「愛上」，但實際上你並唔係真係咁愛佢，只不過係貪佢個樣靚，想啪佢。
我閉上眼訓左一陣，始終係訓唔著，於是上fb stalk左佢一陣，望住佢以前同男友啲相，唔知點解又有啲葡萄同心酸。
但我好明白，自己唔應該胡思亂想，因為當一個女仔可以係你面前好開心咁講︰「排近有個男仔係咁搵我呀。」咁佢已經當左你係普通嘅朋友，nothing less and nothing more。
嘅然係咁，我何必自尋煩惱？佢只不過係一個突然pm我嘅絲打，走黎問下我愛情意見，我只要當呢一切都冇發生過，就可以繼續自己嘅生活，從此忘記芷蘭，好，我決定左要咁做。
但好可惜，人就係咁犯賤，就算個心入面係咁同自己講，我唔可以再咁做，我唔可以再接近佢，但始終，當有誘惑黎到嘅時候，你就會忍唔住再重復犯錯。
我想淡出嘅時候，收到芷蘭嘅一個whatsapp，佢我問︰「歸叔，你今日好似有啲唔開心？係咪見到我同想像中唔同好失望: (」
我苦笑左一下，我可以點應？你比我想像中好得多，係好太多，係好到一個令我無辦法高攀嘅地步，於是覆佢話︰「冇呀，我個樣不嬲都西西地面架啦。」
佢好快又覆我︰「話說今日比你睇個個男仔叫呀Jay，佢頭先話想約我去睇戲，你話我應唔應該去好？」
「即係咁，你對佢有冇好感先？」我又再次擔當起佢嘅愛情教練。
「有係有，但我好驚呢類男仔，佢比我嘅感覺同呀俊好似。我驚一齊左之後佢又係玩玩下。」呢個真，佢地兩個都係個種陽光氣息好重，好世界仔，會食多女個種人。
但我唔知道點答佢，於是搵左我一個識左好多年嘅女仔朋友，好有愛情經驗嘅Alice姐出黎食飯，將芷蘭嘅情況講左一次比佢聽。
點知Alice劈頭就話︰「屌你咩，你唔知我近排散撚左呀？問啲咁嘅野？」我當堂嚇左跳，呢排掛住芷蘭嘅事，又真係冇咩點關心過Alice，估唔到佢散左。
我拿拿臨道左兩聲歉，不過佢成日都拍拖，散左都唔奇，所以都應該冇咩事，之後就拜託佢比啲意見我。Alice就笑笑口咁問︰「你咁關心人，唔係鍾意左個女仔掛？」呢一刻，我沉默左，因為佢正正講中左我嘅心事。
佢見我咁樣，都唔好意思再串我，話︰「女仔呢，最鍾意就係呀Jay呢款男仔架啦，唔簡佢地，唔通簡你地呢啲毒撚咩？不過咁講啦，你問下佢，拍拖想要嘅到底係乜野先，如果純粹係要一個男朋友，咁咪應承囉。如果你想要更多嘅承諾、責任同長久嘅愛情，就可以睇定啲，同佢相處下先，唔係因住又比人呃。」於是我同芷蘭講左同一番說話。
就係咁，芷蘭答應同左呀Jay去睇戲，不過呀Jay當晚同佢表白個陣，芷蘭就話諗諗先，佢話覺得個男仔好成熟、好好，應該會比到將來自己，但又真係咁肯定，怕自己feel錯，所以冇答應到住，番到屋企又再問我嘅意見。
我唔知點答，唯有又問Alice姐點拆。Alice話︰「有冇再煩啲呀，條女對你真係咁重要咩？你貪佢靚啫吓嘛？」
雖然佢係串串共咁問呢個問題，但係呢一刻，我好認真咁問自己，芷蘭，對我真係咁重要？重要到我日日為佢係到諗呢啲苦惱嘅問題，仲不斷向朋友求教，扮演一個我根本唔識做嘅愛情教練？
呢一刻，我的確唔知道自己對芷蘭嘅愛有幾深，定係純粹因為靚女帶比我嘅好感而去幫佢，不過我知道，如果自己唔理佢，我將會訓唔著覺，甚至諗唔到其他野，腦海中充滿佢嘅身影，同埋佢苦惱失望、冇人幫手嘅一個畫面。
或者我就當左自己好似一個騎士咁，同同公主之間永遠唔會有雙向嘅愛情發生，但係只要係佢身邊默默咁守護、幫助，已經好滿足。我唔知發左咩癲，居然同Alice講左呢個比喻出黎。
Alice笑左一聲，話估唔到我都幾情深，我苦笑左一下，呢啲算咩情深？只不過係傻得交關啫。
Alice又話︰「要知一個男人有冇誠意同你長遠發展，唔係話靠feel就得。要睇三樣野，一，要睇佢有冇耐性，你同佢出多一陣街先，就算想一齊，都咪咁快答應住。二，唔好扮靚出街，睇佢頂唔頂得順，頂唔順啫係佢根本貪你個樣，唔係真心。三，問多啲佢將來嘅野，睇佢點答，例如問下佢覺得愛情最緊要嘅價值觀係咩、又會想幾時結婚之類。」
我聽住佢咁「經驗老到」嘅分享，忍唔住話︰「其實你睇人咁準呢，做咩會成日分手嘅？」據我所知，今日已經係佢拍第六七次拖，又係分手收場，佢次次話同個男仔唔啱大家，我都冇深究過，呢一刻，好想知多少少，當拎下經驗值都好。
點知，佢沉默左一陣，放低左一句︰「係呀，我係次次都散呀，好失敗呀，咁你仲問我咁多呢啲野做咩？你自己教條女點做啦。」突然就收左我線。
我呆左一陣，頭先佢講到最尾個句，好似有啲哽咽嘅聲音，我諗自己講野可能太過直白。其實同Alice識左咁多年，有咩都係好直接就講，就算好串嘅說話佢都唔會點在乎，仲成日串番我轉頭，但估唔到呢次佢咁大反應，即刻收左我線。
我再打番一次比Alice，同佢講左對唔住。點知Alice細細聲咁話︰「呀歸……你……可唔可以出黎陪下我……」把聲好溫柔，一啲都唔似平時嘅佢。
於是我去左佢樓下公園仔，同佢坐係一張長櫈到，我仲好記得，係一個冇星嘅夜晚，空蕩蕩嘅公園，我同佢講有乜野唔好收埋係個心到，不妨講出黎。佢突然眼圈一紅，僕係我膀頭到喊起上黎，呢一刻，我手捉無措，唔知做咩好或者講咩好。
Alice喊左一陣，先低聲咁話︰「你知唔知其實我都唔想次次都散，但點解……點解當我遇到一個覺得好好嘅男仔個陣，個天先同我講原來呢個人並唔係咁好？」
呢一刻，我先知道，原來一個表面剛強，分手若無無事嘅女仔，都會有咁軟弱嘅一面。某程度上，Alice其實同芷蘭根本就冇分別，只不過佢地選擇左用唔同嘅方式去面對，一個好傷心，但發洩完、痛完，可以繼續move on，另一個就好似無野，但實際上痛苦根本就無消失過，甚至係心入面慢慢植根，到最後先發覺自己已經承受唔住，我有時覺得，Alice比芷蘭更可悲。
我輕輕咁攬住佢，同佢講︰「我唔知道愛情係乜野，亦都唔識去評價任何感事情，但只係想同你講，你身邊永遠都有個劉歸信，係你傷心個陣，我一定會陪住你。」
我本來係出於好朋友嘅角度去講呢一番說話，但係Alice做左一件我諗都冇諗過嘅事，佢……佢突然一淡嘴左落我個嘴到，我呆左唔識反應，之後佢企左起身，話︰「夜啦，我要番屋企先。」頭也不回就咁番上樓。
我呆撚左，仆街，估唔到我個初吻就咁就冇左，咁算點？我番到屋企，望住部手機，個心十五十六，我本來諗住將初吻比左我第一個女朋友，正常都會係咁諗掛？點知比左個多年老友，呢一刻真係唔知點算，無理由叫佢負責任掛？但唔追究我咪好蝕？
我個心好猶豫，呢個時候突然收到Alice嘅訊息︰「哈哈，頭先一時激動，你話哂都係男仔，唔會介意掛？」一時激動！一時激動大哂？我心入面暗暗咀咒，希望第日冇男仔要佢，全部一時激動同佢分手。
當然，我唔係一個毒舌嘅男仔，所以冇咁覆佢，淨係比左啲點點佢︰「……」去表達我嘅無奈。「你咁嘅樣，唔好同我講係初吻呀。」「……你知道我仲係A0架！」「哈哈！原來真係初吻，今晚賺左！」
唉，我望住佢好似得到左勝利嘅訊息，無奈苦笑，算啦，做男人應該大量啲嘅，至少Alice應該已經暫時忘記左傷心嘅事，都係一件好事黎。之後我又將Alice教路嘅野講左比芷蘭知道。
自從個晚之後，唔知係咩原因，好似同Alice熟絡左，但明明我地本身已經好熟，但呢種又深一層嘅關係，又令我實實在在咁覺得，我地真係再熟左啲。
有時我會係到諗，如果我同Alice一齊，會點？一個好朋友變左情人，會係咩感覺？會唔會冇左激情？當然呢一切都只不過係FF。
過左兩個月，呀Jay仲係窮追芷蘭不捨，完全冇撤退嘅意思，Alice話，呢個男仔應該係認真，唔係未必會肯等咁耐。
就係因為佢呢一句說話，芷蘭就同左呀Jay一齊，佢whatsapp我話︰「多謝你呀愛情教練XD」我知道，呢個係一個中結話題嘅訊息，代表我呢個愛情教練嘅身份告一段落，亦唔再需要去搵芷蘭，我輕輕嘆息左一吓，呢種係放鬆定係失落嘅感覺，我已經唔係好分得清。
我約左Alice出黎飲酒，同佢講，芷蘭已經唔再需要我啦，我以後都唔洗日日再煩你，問呢樣又問個樣。Alice話︰「佢出左pool，你好似唔係幾開心喎。」我搖左搖頭，冇講野，到底係答佢，我並唔係唔開心，定係我其實唔開心？坦白講，或者兩樣都有啲。
Alice飲左淡酒，面上有少少紅，話︰「老土都要咁講，幸福係要自己爭取架。你自己唔肯追人，無理由要佢追番你轉頭掛。」
唉，其實佢講得好啱，但或者有啲野女仔係永遠都唔會明白，當你遇到一個你覺得好好嘅女仔，同佢相處得好開心個陣，你真係未必會去追求佢，你話我自卑又好，點都好，我淨係怕當我再踏前多一步嘅時候，佢原來只係當我係好朋友，十個暗戀九個苦，大概就係呢個原因。
呢晚本來靜靜地飲酒幾好，等我可以排解吓苦悶，偏偏發生左啲好似拍戲咁嘅事。
我同Alice飲飲下酒，忽然有對男女走埋黎，個男仔好大聲咁講︰「Hey！Alice！Long time no see！」係一個西裝友，拖住一個女仔。
Alice即刻好熱情咁企左起身打招呼︰「Hey Norman！」我心入面當堂沉左一下，Norman正正係佢個ex，唔通今晚有六國大封信睇？
Norman拖住身邊嘅女仔，話︰「呢個係我girlfriend Daisy。咦，呢位係……」睇黎我走唔甩，正想起身自我介紹一番個陣，Alice突然撓住左我隻手，話︰「呢個係我boyfriend呀歸。」仆街，唔係掛，有冇咁老土，又借我過橋。「哦。Nice to meet you！」Norman好熱情同我握左一握手，之後拖住條女去左遠邊嘅枱。
我正要發嬲之際，見到Alice呆望住遠處Norman佢地張枱，臉紅紅眼濕濕定左型咁款，好似想喊，個句「屌你咩又玩我」就冇講到出黎，反而話︰「夜啦，我地番去好冇。」佢點左點頭。
係街到行行下，Alice突然話︰「頭先咁做，Sorry。」「算啦，我明嘅。」估唔到可以咁短時間就撞番個ex，佢仲拖住條女，事情嘅發展真係好似拍戲咁，又或者現實就係因為發生咁多類似嘅事，先會拍出咁樣嘅戲。
我知道，Alice只不過好驚表現出自己move on唔到嘅一面，驚個ex覺得佢而家嘅生活冇咁好，於是一個情急就搵左我做替身男友，扮自己過得好好。
Alice雙眼微紅，同我講話佢見到Norman咁開心，唔知點解好心酸，覺得一路以黎自己對佢付出嘅愛好似係一件白痴嘅事，對方原來只不過係玩玩吓，自己根本就唔重要，因為就算冇左佢，Norman嘅生活都一樣可以咁好。
望住呢個一路以黎嘅好朋友咁樣，我好傷心，不自禁諗番起一路以黎我係佢身邊默默支持嘅事……
仲記得好多年我地中學嘅時候，佢第一次堕入愛河，暗戀左男班長，問我可唔可以幫佢比啲暗示個男班長，最後真係成功令到佢地一齊左……記得佢第一次同男班長分手、失戀，佢喊得好西利，我就係咁係佢身邊安慰佢、遞紙巾、送上熱朱古力……
又記得佢第二次拍拖、第三次拍拖……直到後黎，佢拍拖、分手已經唔再需要搵我。我就以為佢係幾咁堅強，點知佢只不過同當初無分別，都係個一個同男班長分左手之後，會傷心好耐嘅女仔，只係傷痛嘅情感無再放在係表面到比人睇。
我心有感觸咁話︰「中一下學期，第一次你同男班長拍拖，我好櫈你開心，雖然你未必會同佢天長地久，但我知道你地一定會有畢生難忘嘅回憶，雖然好細個，但個陣我就係咁樣諗。」
頓左一吓，我繼續講︰「第二次係中四暑假，你同學長呀偉突然一齊左，我都好開心，因為我知道，你嘅高中生活會有一個大哥哥好錫你、守護你，呢個係所有女生係中學都夢寐以求嘅事，你嘅生活會因為咁而變得精彩。」
所有回憶真係好似播片咁樣出現係我腦海，我吸左一口氣，先再繼續︰「但去到中六、大一、大二、大三，直至近排，我已經冇再為你拍拖、分手嘅事而高興或者傷心，甚至連你男朋友叫咩名我都唔係好記得，Jason？Ben？Jeff？我已經麻木左，因為我知道，個啲所謂嘅男朋友，根本唔會係你嘅真命天子。」
我笑左一笑︰「或者你會覺得，一次拖都未拍嘅人有咩資格去批評你，但係諗番轉頭，一個拍左六七次拖都分手收場嘅人，又係咪真係有資格……有資格去判斷自己未來嘅愛情路應該點樣行，可以保護到自己唔再受傷。」
我講完呢番說話嘆左一口氣，望住佢嘅側面，見到佢嘅眼淚已經流左出黎，我冇去安慰，我知道，我講中左佢嘅痛處，佢需要嘅正正就係一次流淚反省嘅機會。
流左一陣無聲淚，佢突然話︰「好耐以前嘅野，原來你仲記得咁清楚。」我笑左一笑︰「係呀，好耐啦，個陣我買熱朱比你都仲係用緊三個半咋，而家已經要六蚊。」
就係呢個時候，佢突然轉過頭黎凝望住我︰「呀歸，點解……點解你一路都對我咁好？」佢望住我個樣……係可憐？係渴望？係感動？我唔知點講，咁耐以黎都冇見過佢咁深情咁望住我，我個心不自禁怦怦咁跳，呢個表情，係咩意思？
佢突然拖住我隻手，同我講︰「呀歸，不如你做我男朋友？」我呆左，Alice又攬住左我，同我講︰「你係好怕我繼續受傷？好想見到我開心？」「係，不過……」「既然係，不如就等你黎保護我，由你帶比我快樂……」
佢攬得我好實，我知道佢係搵緊安全感，但係呢一刻，唔知點解，聽到佢咁講，我冇放手，反而低頭係佢額頭錫左一啖，呢一晚就咁同左Alice一齊。
我地拍拖同我想像中嘅真係好唔同，我送完佢番屋企，分別個陣，竟然冇依依不捨，亦冇回身望住對方嘅背影，更加冇同對方講「我愛你」之類嘅肉麻說話，真係就咁番左屋企就算，係因為太熟？係因為尷尬？呢一刻，我真係望唔透。
我番到屋企，循例whatsapp問Alice︰「點，安全到達屋企？」
佢好快就覆我︰「你都送到我番屋企樓下，仲點唔安全啊XD傻仔」
我笑左一笑，佢又有道理喎。「點知會唔會困lift呀你。」
「係呀，困lift仲覆到whatsapp架！」
「咁你呢個台真係勁，我即刻要去轉台。」
「你估舊時咩，為左send msg唔洗錢就轉台。」
我諗番起以前電話冇得上網嘅時候，會心微笑。
「好啦，夜啦，你早啲訓，唔好諗咁多。」
之後Alice send 左個心心嘅emoji比我就off左line，我呆左一呆，不禁又係到諗……自己係咪真係鍾意Alice？不過呢一刻，我冇一個好確切嘅答案，於是都send左個心心比佢先訓。
就係咁樣，我地之間開展左一段好奇怪嘅戀情，佢係我嘅初戀，但同時係我識左成十年嘅好朋友。我地會拖手行街，但好多情侶之間應該做嘅事我地都冇做到。
深情咁攬住對方，我地未試過。同對方講幾愛你，我地未試過。幫對方起一個親密嘅花名，我地未試過。睇戲餵對方食爆谷，我地未試過。食飯幫對方抹嘴，我地未試過。嘴對嘴深情咁錫一次，我地未試過。
雖然我地似乎冇一般情侶熱戀時候嘅激情，但坦白講，我同Alice相處得好舒服。
睇戲個陣，我唔洗問已經知道佢會想睇邊一部戲，又唔鍾意坐通道隔離嘅位。口渴個陣我唔洗問佢想飲咩，就買左佢最鍾意嘅橙汁。甚至有時食飯個陣佢去左廁所，番到黎，我已經幫佢點左最想食嘅野。行行下街，唔洗問，我會知道佢鍾意邊間鋪頭嘅衫，主動走入去同佢簡。
有次Alice笑住咁同我講︰「雖然咁多年，但真係唔知你咁留意我，連我鍾意飲咩牌子嘅橙汁都知道。」我都笑左笑︰「你啲口味咁獨特，點會唔記得呀？」
佢係我望女仔個陣，會用膊頭撞一撞我，跟住我地就會相顧而笑，佢完全冇呷醋。佢係我身邊望住我寫文，唔會笑我係高登仔，作故仔咁幼稚，反而會去遞一杯我鍾意飲嘅熱咖啡黎支持我。
但唔知點解，我地就係冇試過好深情咁嘴對嘴錫一次。好記得有一次，佢見我係電腦台面前做野咁認真，突然伸手去我肋骨個到吉左我一下，搞到我成個人彈左起身，砰一聲撞到盞枱頭燈。
我扮哂發嬲咁︰「大膽！我要報仇。」之後又伸手去整佢，同佢推推撞撞之間，我突然心血來潮，抱實左佢，我地怔怔咁四眼對望，唔知點解，我居然冇錫落去，反而放開左，之後繼續做野。要錫一個識左十年嘅朋友，真係唔係容易嘅事，好尷尬。
之後我地一路維持情侶加朋友嘅關係，就好似一對老情人，公公婆婆咁，冇咩親密嘅舉動，但一言一行之間流露住好多年相識得來嘅默契。
正當我覺得，人生咁樣過都唔錯嘅時候，突然發生左一件事，令到我地之間嘅感情出現裂縫，甚至令我去反思，到底我同Alice之間只係友誼定真係愛情。
係一個晚上，我再次收到芷蘭嘅whatsapp訊息，我望住芷蘭呢個名，一路以黎嘅回憶好似又再番番黎……
佢當初點樣以「我係一粒膠」嘅身份pm我……點樣訢說佢同男朋友嘅苦事……我地又點樣相約係麥當勞見面……我又點樣扮到自己係愛情專家……點樣晚晚教佢點做點做……最後我地又係點樣因為佢拍左拖而疏遠……
我同芷蘭一點一滴嘅相處，就好似細沙一樣，係漏斗入面慢慢、慢慢咁流落黎，再積聚係回憶之中……直到有一日，所有嘅沙都已經流走左，我以為芷蘭已經係我嘅心田之中慢慢淡出。
點知一個訊息，就將成個漏斗倒轉左，所有嘅沙粒都重新流入我嘅心入面。呢一刻，我先好清楚咁知道，自己，或者，仲未放得低佢。
原來芷蘭同我講，呀Jay拋棄左佢，佢同呀Jay自從一齊左之後，兩個人好甜蜜，好似糖痴豆咁，日日夜夜唔係一齊就傾電話、whatsapp，短短唔夠三個月，佢地發生左關係，點知發生完關係之後，呀Jay就變左，對芷蘭完全唔同哂，所有野都Hea覆，又冇關心過佢，根本就冇當佢係女朋友咁。
我問多兩句，先知發生關係個次，佢地並無做安全措施，我心入面不期然諗起「中出即飛」四個字，當初我叫芷蘭唔好咁快同佢一齊，點知呀Jay竭而不捨，為嘅根本就唔係咩感情或者想天長地久，純粹只不過心入面想挑戰下，想得到呢個女人。一齊左，搞完，已經冇左個種興趣。我好嬲好傷心，點解呢個世界咁多賤男？
講真，我唔知點樣可以安慰到芷蘭，或者咁講，連我自己都好傷心，甚至好愧疚。當初，正正係我拍哂心口咁同芷蘭講，呢個男仔冇問題，芷蘭先會同佢一齊。而家先知道，呢個男仔係咁好戲。
我同芷蘭whatsapp左一陣，佢突然send左個訊息黎︰「我想自殺。」我當堂嚇左一大跳，唔係咁大鑊掛？我即刻問佢住邊，衝左去佢屋企搵佢，叫佢唔好咁激動住。
佢開門比我嘅一刻，我呆左，我見到嘅唔再係當初個一個笑得好燦爛嘅女仔，唔再係個一個好pure好true嘅女仔，芷蘭雙眼已經紅透，披頭散髮，面色憔悴，原本靈動活潑嘅眼腈……因為兩個又朣又大嘅黑眼圈而變得無神。
我入到佢屋企，個心震左一震，因為我見到枱上面擺住把界刀，我默默咁拎起把界刀，將佢放番係櫃桶入面。地上面有一堆相，係佢同呀Jay呢幾個月以黎嘅合照，入面嘅女仔係幾咁陽光氣息，係幾咁開心，我個心，不自覺咁，那住那住……
芷蘭呆呆咁望住我︰「你唔係話佢係個好男仔黎咩？點解佢要咁對我？」我默然無語，只係可以講一句對唔住。芷蘭流下眼淚又問我︰「你唔係話問下佢對將來點睇，就可以知道佢為人係點咩？」我再度默然，低頭再講左句對唔住。
我知道佢咁問並唔係想質問我啲咩，唔係想怪我啲咩，只係好似想問個天，點解自己咁不幸一樣，但個天係唔會答佢，所以佢問我。可惜呢一刻，我同個天一樣，比唔到答案佢，我可以做嘅只係講Sorry。
我走上前輕輕咁攬住左佢，雖然唔知道可以講咩，但我想佢可以感受到我嘅溫暖，即使只係一陣都好，都要等佢知道，呢個世界仲有好多人，好關心佢，做傻事係解決唔到任何問題。
呢個時候，芷蘭居然一啖錫左埋黎，我驚左一驚，即刻同佢講︰「我……我有女朋友架啦。」點知佢完全冇理到，好似要作賤自己咁，成個身挨埋黎，開始除自己啲衫同摸我。
就係個一次，我最後把持唔住，同芷蘭發生左關係。我知道我係一個仆街，唔單止瞞住Alice上左芷蘭屋企，仲要同佢發生肉體關係。完事嘅一刻，我聖人mode上身，係到諗自己跟住應該點做。
同Alice坦白？我好知道如果我咁做，唔單止令佢傷心，仲可能呢一世連朋友都做唔番。當今日咩都冇發生過？呢個可能係最好嘅辦法，但……但我係咪真係忍心瞞住Alice？咁芷蘭又點算？
芷蘭係張床到攬住我，問我係到諗緊咩。我搖左搖頭。佢望住我︰「你擔心女朋友？」「我今次做得好錯……」「唔關你事，錯嘅係我，不過我唔介意，因為呢個世界對我好嘅男仔淨係得你一個。」
我離開芷蘭屋企嘅一刻心入面係到諗，同Alice坦白嘅後果我承受唔到，唯一暫時可以做嘅就係咩都唔做，或者我跟本唔知該應該做啲咩。
我淨知道自己對唔住左Alice，所以我決定加倍咁對佢好，接佢放工放學，同佢講我平時唔會講嘅情話，係到唔舒服嘅時候買熱飲比佢……
但係當我對佢好左嘅時候，Alice又對我更好，我地之間嘅關係竟然開始變得愈黎愈接近普通情侶，我地每晚都會同對方講自己有幾咁愛你、互相餵對方食野、稱讚大家嘅打扮……
甚至有一次，我記得好清楚，佢係我耳邊細細聲咁講︰「劉歸信……」之後我一轉過面去，就同Alice近距離對望，跟住獻出左我地第一次嘅深情一吻。Alice拖住我隻手，話佢好耐未試過咁幸福嘅感覺。
但我知道，呢種幸福嘅感覺，只係我為左補償Alice而故意營造出黎，係呢兩個月入面，我心入面最記掛住嘅一個人，始終都係芷蘭，只係好可惜，自從我地發生左關係之後，佢冇再搵番我，直覺話比我聽，經過個一次之後，佢諗清楚左，唔想再傷害我同Alice之間嘅感情，所以佢選擇左自己離開。
時間過得好快，唔經唔覺，已經大學畢業，出埋黎做野。我同Alice一齊嘅日子正式踏入第五個年頭，我地之間經歷左好多好多嘅事，一齊搵工、一齊生活、屋企人有事個陣半步不離咁陪伴住對方、送上小禮物、一齊去歐洲旅行……
我同Alice已經成為左一對完全融入對方生活嘅情侶，但有時夜深人靜，當我訓唔著嘅時候，我會望住Alice熟睡嘅面孔，感到一陣心酸，係覺得自己好賤，Alice好可憐。
因為我會不自禁咁番起自己好多年前背叛嘅事，甚至覺得自己對Alice一路以黎嘅情感都只不過係感情、係為左補償，而唔係愛情，心靈深處愛嘅始終都係芷蘭，但係五年以黎，Alice仲係懵然不知，以為我最愛嘅就係佢。
不過，我已經決定左，呢一世都唔會分手搵番芷蘭，亦唔會對Alice坦白，因為如果忠於愛情會令到伴侶受傷嘅話，我寧願選擇忠於伴侶，將真正愛情嘅感覺永遠永遠埋葬係心底。
-完-
