時光匆匆，如白駒過隙，仍記得當年DSE以24分入讀港大E&F時，與好友狂歡兩夜，共隊了十六枝青島，彷似打勝了地球末日戰般興奮。
那時懷著滿腔熱血，再加上老母日日係屋邨幫我宣傳，親戚一一致電興賀，一聲歸仔，一聲恭喜，才明白何謂一登龍門，升價十倍，甚至令我有種錯覺，自以為是天之驕子。
可惜，大學並非伊甸園，沒有想像中美好，hi-bye friend多如銀河星數，友情流於表面，而現實勢利之輩亦猶似街上七仔，總有一個在附近。
當初我既遠大理想、胸中熱血，竟隨時日被消磨殆盡，四年大學生活，僅餘青春享樂之心。
每逄在校園行走，猶如皇帝出巡，飽覽三千後宮，美女如雲，挑逗我胯下之肉。
這邊是露出雪白長腿既韓國佳麗，那邊是拎住咖啡mac book、長髮長腿既本土女神。停步細聽，遠處傳來爽朗笑聲，竟是身材火爆既洋妹……
我一雙金睛火眼早已練得收放自如，心裏雖思馳神往，臉上卻毫無表情，平淡地欣賞各種美態。火辣性感盡收眼底，也算是四年大學中最好的福利。
year3時識左一個本地year1女友，樣貌身材俱是上佳之選，思想貼地，相愛甚深。可惜有個缺憾，佢要堅守唔扑精神，以致男友日日谷精上腦。
半年紀念日，我book好五星級酒店過夜，海景美食作伴，只見漫天星光如斗，黑夜無煙無霧，再送上火紅玫瑰，湊足浪漫十分，軍威之盛，簡直係成吉思汗再世，誓要攻陷女友既秘密城池，直至其多瑙河河水泛濫為止。
可惜，佳人落閘防洪，只肯用手幫我打飛機。在如此高級的海景酒店房裏，竟無男女交歡之事發生，杜記安全套派不上用場，實為千古奇冤。
翌日，自思年少慾狂，如何忍受得住？我唯有扮演黑馬王子，深吻睡美人一記，call room service替她點了一個最後早餐，於桌面留下一張紙條，輕輕一聲再見，掀起半片衣袖，奪門而出。
隨著考試結束，最後忙碌既一年亦安然渡過，畢業後跟隨羊群大隊，加入四大會計師樓。
望著各bench mate滿懷理想，誓言矢志要考牌成為會計師，成為partner，其壯志豪情，就似我初進大學時一般，不知可笑還是可悲。
雖然眼望眾生，似是眾生皆醉我獨醒，但事實自己也在羊群當中，營營役役。若自命清高的話，未免太過可笑。
我看著想著，心裏苦澀。更苦澀的是我長期無拍拖，情慾幾乎黃河缺堤。bench mate之中雖不乏面容姣好之輩，可惜俱已名花有主，似乎只有我一個人係A住grad。
百無聊賴，我輕揭牌子，在手機螢幕中點中了中學小師妹晴晴。
我與晴晴相識於一個名為學兄學姐計劃的活動，當時我等高中生一聽，立刻教畜上身，心裏燃起了一股教育之火，齊往短裙學妹堆中鑽去，去尋找一絲慰藉與純真。
晴晴與一般女生相似，數學不精，我自然樂於殷勤指點。相處過後，發現晴晴實在天真可人，吾實不欲以巨棒相加，破開晴晴仍然純真的心靈，於是罕有地與此女成為普通朋友，間中出街睇戲食飯，不涉情慾，樂也無窮。
我主動whatsapp晴晴，點知佢話同男朋友啱啱分左手，傷感過度不欲出門。我心裏一動，良心敵不過長期以來積壓的情慾，竟然起了乘虛而入之意。
於是我話︰「被人飛更加要出黎，我唔想你一個人胡思亂想。」我慾火蘊釀，就如蘇秦、張儀般利言善說，講多兩句，就輕巧地將晴晴呃左出黎。
晚飯時，晴晴大吐苦水︰「點解我搵極佢，佢都唔理我？我到底要點做佢先會回心轉意？」我一早背好港女黑白圖語錄︰「如果一個人愛你，你就算唔理佢，佢都會主動搵你。但如果一個人已經唔愛你，你就算點求佢，佢都唔會理你。」
語錄雖然係廢話，但對一眾於愛海中浮浮沉沉既少女而言，實不無警世之利。
果然，晴晴一聽就淚流滿面︰「點解，點解可以話唔愛就唔愛？」晴晴讀緊ASSO，ASSO係MK仔集中地，想搵真感情難過登天，晴晴若非比人中出即飛，就應該係條仔騎牛搵馬，當中根本不涉愛情。
當然，我冇講咁多，只輕輕拍佢膊頭，遞上紙巾，任由佢流淚。
走出餐廳，流連街頭，夜晚漆黑如墨。我望望四周，靜寂無聲，開始感到胯下巨龍呼召，便執行籌備已久既劇本︰「晴晴，你係到等一等我。」之後到附近一家花店買左一枝紅色玫瑰花番黎，廿蚊有找，遞到晴晴手中，再發出善良既微笑。
晴晴淚水忍不住再流，我知佢萬分感動。其時萬事俱備，只欠一拖。夜風輕拂頭頂上既數面招牌，月光灑在大馬路上，真係機不可失，時不再來，我準備伸手一拖。
但當我剛伸出手，晴晴就話︰「點解你對我咁好？一直以黎你都係我身邊，不求回報，呢個世界係咪得番你一個唔係壞人？」
我心頭一震，如果係呢一刻出手，加上一句「我對你好，係因為我愛上左你」，再深情俯視，晴晴肯定係我囊中之物。
但聽到「不求回報」四字，我猶如身中寒冰綿掌，伸到一半既手竟然懸在半空，無法動彈。
凝望少女臉龐，依稀是當日拎住數學書、咬住筆桿，向我請教既可愛小女生。而我係呢一刻，就好似月亮消失，狼人發作過後咁，變番一位毫無雜念的好學長。
臨尾一腳先黎良心發現，仲衰過謝拉特跣腳失英超冠軍，我暗道一句失敗。但所謂好漢不回頭，我就此打消食晴晴既念頭。
緩緩散步半粒鐘，閒談之中，晴晴分享左佢近排同ASSO女同學玩樂既生活照。我鷹眼一瞧，就相中左一個mk妹。
呢位mk妹雖然妝味濃郁，但身姿婀娜，皮膚白晢，我剛收覆既情慾好似每朝既太陽一樣，再次照常升起，問晴晴︰「呢個叫咩名呀？」晴晴哈哈一笑︰「咦，你睇中果果呀？佢單身架喎，洗唔洗比佢電話你？」
我心諗︰「果乜撚野果？mk妹真係mk妹。」但我故裝毫不在意︰「叫果果咁奇怪既？」晴晴道︰「唔知呀，我都係識左佢一兩個月咋。」
我笑言︰「比佢電話黎，等我陣間問下佢點解叫果果。」晴晴似乎都想知答案，依言奉上。我輸入通訊錄，便起其名為「果果」。
夜深，晴晴與我各自回家。我訓係床上，stalk果果ig，自拍唔少，樣貌唔差，不過妝粉亦唔少，唔知真人係咩樣？
我諗左一諗，輕揮龍指，一個簡單既whatsapp訊息隨網絡寄出︰「果果？」不到一分鐘即有回應︰「你係？」我第一時間既諗法係︰「覆得咁快，應該成日同mk仔whatsapp。」
但唔知點解，我心裏的確對果果起了一絲好奇，道︰「我想識你。」呢招單刀直入，既誘惑挑逗，既令人好奇，更隱隱透露出個人既自信，係最能撥動mk妹內心波紋既一招，亦係一眾mk仔慣常既招friend子伎倆。
我本來不屑用mk仔伎倆，但他山之石，可以攻玉，溝女最忌面皮薄，間唔中用下一招半式既邪派武功，亦無傷大雅。
果然，果果冇流露出絲毫不滿，反而send左個笑喊emoji黎，問我點解有佢電話。我二話不說，背叛晴晴，將佢供出，表現出自己最真誠既一面。
傾左一陣，果果原來啱啱同朋友唱完k，番緊屋企。佢居住元朗，路途遙遠，我倆隔空長談，感情有如現代科技，與時並進。
講到咁上下，果果就話想知我咩樣，我使出丐幫絕技，打蛇隨棍上，就約佢左聽晚旺角食飯，一見盧山真面目。
網上騙照極多，我心入面亦不禁惴惴不安，希望果果個樣有ig相上面既六成相似，咁起碼唔會反胃，以免浪費一餐飯錢。
甫踏出地鐵站，熱氣撲面，我打比果果，詢問佳人所在何方。電話接通，只見前方一個肥妹同時拎起電話，望到佢一雙極豐美既金華火腿，我心道不妙，正要浪子回頭，點知一人從後拍我膊頭，嬌聲細語︰「你係呀歸？」
我向後一望，原來呢個先係果果，我不禁鬆左一口氣。
仔細觀察，果果既妝容比相入面淡，但相似程度直達九成。其中一雙纖纖幼腿，更同相中一模一樣，天山出產，雪白無比。呢一刻，我直情想化身為採參客，直鑽入白雪堆中尋快樂趣。
當然，我君子臉上毫不變色，反問︰「咦，你點知係我？」果果笑左一笑︰「你icon有樣嘛。」慾念當前，血液下流，腦袋果然會缺氧，我暗笑自己愚蠢。
我地尋找一間情調合適既餐廳，旺角既夜晚人潮洶湧。有時我假裝怕果果會好似迷途羔羊般走失，故意拉一拉佢手臂，黎個較為親密既接觸。
碰到佢手臂時，一陣冰冷感傳到，我問︰「咦，有D凍喎你。」「係呀，今日有D唔舒服。」我明白，女人每月都總有唔舒服既時候，當下暗暗提防，以免講錯說話，出師未捷身先死。
人潮果然係男女之間既情慾催化劑，我倆深陷旺角，人來人往，果果驚比人撞到，不時向我靠近，唔覺意請左我食少少波餅，我大半年累積既慾火急速上揚，火勢直升至三級。
假如果果願意，我咁既狀態肯定可以即日同佢搞出人命。
我同果果不斷接觸，臉上雖然毫無表情，但心中竊喜，實在高興得難以言喻。
不久，到達一間日式餐廳。波餅始終不能飽肚，於是我地叫左兩碗拉麵。
同mk妹正面對望，我雖稱不上身經百戰，但都叫做閱女無數，但係呢一刻，我竟然心如鹿撞，巨龍蠢蠢欲動，幾要破褲而出。
閒談一會，電話輕震，忽然收到晴晴短訊︰「你同果果今日出街呀？」
其實自從尋晚孔子上身，將晴晴打入冷宮之後，我全副心機就轉移左係果果身上。直至此時whatsapp一現，竟然先記得晴晴，實在令我懷疑自己係咪患左失憶症。
我心裏暗暗奇怪，問果果︰「咦，乜你同晴晴提起我地今日出街咩？」「係呀，你唔鍾意？」我笑左一笑︰「唔係呀，咁佢有冇講我壞話先？」「佢都有話你係個唔錯既男仔。」
善事做得多，報答自然多。估唔到晴晴搖身一變，竟然由我既攻城對象，成為我既攻城武器。
一講晴晴，就諗起尋晚曾經提及，要問「果果」二字既來由，於是開口詢問，一聽之下不禁啞然。
原來純粹因為果果鍾意食水果，所以有左呢個花名。我當時呆左一呆，幾乎唔識反應，唯有讚佢一句食得健康。
飯到尾聲，離開拉麵店，另尋歡場。當時屍殺列車興起，於是一齊買飛入場，欣賞朝鮮人電影。
睇到一半，周公呼喚，一對眼皮漸垂，皆因呢套戲我已經陪人睇左三次。
呢個時候，果果從手袋中拎出紙巾，我斜眼一望，心頭劇震，不由得想起當年與中學女友既刺激情事。
記得當時熱戀期中，我二人糖黏螞蟻，難割難捨。有次約莫夜晚11點，同女友出外睇戲，睇到一半，戲中男女主角情不自禁相擁相吻，旁若無人。
為左表示對電影行業既支持，我不甘後人，偕同小弟抬頭支持，喚女友睡於我大腿上，忘情吞吐，上演更刺激既情節，最後足足用左三張紙巾。
往事如煙，紙巾猶白。果果手上既紙巾自然唔係用黎幫我抹身，反而係放入自己手中，原來佢出手汗。
我胡思亂想，彷彿眼前播緊既係A片情節。情慾既毒藥已經傳到我既心臟，怦怦怦咁跳動起來。
突然之間，果果尖叫一聲，我右手化作救生圈，讓果果抱住。原來喪屍突然出現，一抓擊中一個可憐人類。
正所謂男女授授不親，你既先破壞規矩，我亦無需講江湖道義，當下左手一伸，使出太極指法，輕揉果果手心，低聲慰問︰「你出手汗喎，真係好唔舒服呀？」
所謂關心則亂，果果受到突如其來既親切慰問，似乎有點不知所措，只輕輕嗯左一聲，答非所問。
我再忍受唔住，微型抽濕機化作一副魔警手扣，將佢十指捉緊，然後若無其事，繼續欣賞電影，就好似食緊霸王餐既惡霸一樣，面皮之厚，無人能及。
直至電影結束，果果亦無擺脫我既魔掌，我地一直十指緊扣，回到旺角街頭。佢手中汗水愈黎愈多，我下體鐵棒就愈黎愈熱。
呢個時候亦無需多言，更無需表白，我只問︰「去邊呀？」「不如……去搵個地方坐下？」我一聽大喜，彷彿中左六合彩，將果果隻手拉近我大腿附近磨擦，等佢感受下我巨龍既憤怒。
點知果果妖左一聲，最後只係帶左我去球場睇人打籃球。爆房無望，小弟福利受挫，我臉上雖然毫不在乎，實則內心大受打擊。
去到球場，得成班波牛，都唔知有乜好睇，點知就係呢個時候，果果語出驚人︰「我以前個男朋友都係打籃球架。」
女人是水，唔單止下面濕得快，上面仲快，一提前男友，眼淚就好似度好哂劇本咁標出黎。
我知道，每一個mk妹既背後，都有一段蕩氣迴腸既感人故事，果果亦都唔例外。於是輕靠伊人，靜靜聆聽……
微風輕吹，眾波友散去，夜色也懂得調節音量，將旺角既熱鬧聲漸漸收細。我默然聆聽，實在估唔到果果有一段咁悲天憫人既經歷。
果果既前男友叫呀Jay，係中學籃球隊既隊長，球技出眾，英姿颯颯，算同我有幾分相似。上至饑渴女老師，下至羞澀小學妹，皆傾倒其籃球汗褲之下。
果果隨波逐流，都迷上左型男呀Jay，一開學就主動伸出相識既橄欖枝，後來兩人汔油點火，一撻即著。
但估唔到開學個幾月，天氣轉秋，戀情亦告落葉歸根。呀Jay原來早有女友，果果被人中出即飛，計數機都唔洗戳，個陣肯定未過十六。
聽到呢到，我臉上仍然係萬年湖水，但內心已經變成左一塊招牌，於十號暴風中左搖右擺，猶疑緊到底食定唔食。
果果呢D女仔應該係一粒軟糖，雖然易咬易食，但係極度痴牙，事後並唔係咁容易get rid of。不過我慾望積壓咁耐，都唔顧得咁多，要知道美食當前，非洲饑民又點忍得住？
果果講完，低下少女頭，不敢相視。的確，回憶如此過去，難免十分痛苦。我都估唔到果果會咁坦白，我除左巨龍繼續仰天咆哮之外，亦不禁感動莫名。
Mk妹長髮既香味隨住微風，輕輕傳入我鼻中，我心中一蕩，深情凝望，道︰「過左去既事，唔好再提。魯迅都曾經講過，人最愚蠢既事，莫過於沉淪過去，唔懂得捉緊現在。」
魯迅當然冇咁講過，不過mk妹邊知咁多。果果抬起頭來，淚光瑩瑩，非常受落。
我雙眉一挑，目光如電，正所謂富貴險中求，色向膽邊生，當下一手將佢抱進懷裏親吻，手掌輕掃玉背波邊，肆無忌憚。
隔左分幾兩分鐘，四塊唇片盡皆濕潤，然後猶如水中茶葉一般緩緩蕩開。果果幾乎缺氧，嬌喘左兩聲，露出甜美又幸福既笑容。
正當我諗緊應唔應該提出爆房要求之時，果果將雪白既雙腿，輕輕撘係我小腿之上，然後嘻嘻笑道︰「你會一世都咁愛我，係咪？」
我心中一凜，巨龍登時半軟，呢一問對普通人黎講，可能只係一句簡單情話，但對果果黎講，或者係一個好莊嚴既承諾……
「嘻嘻，咁你呢？你又會唔會？」我使出西域邪功乾坤大挪移，輕輕挪開問題，因為我真係唔敢空許承諾。
果果用力將我攬緊，道︰「不如……不如我地……」我心臟怦怦亂跳，道︰「不如乜野？」「夜啦，不如我地走咯？你陪我去撘車得唔得？」
「哦……梗係得。」「衰人，你頭先係咪亂諗D咩呀？」果果甚為機靈，居然明白我語氣中透出既半絲失望。
「放心啦，我遲早都係你既人……」果果聲音細不可聞，我心頭大喜，果果既回答真係正中下懷。
要知道係男女攻防戰之中，虛虛實實，借力打力，招式各種各樣，所在多有，無奇不有。你勢估唔到，呢半絲既失望其實係我故意流露出黎。
俗語都有話，老馬識途，我又點會唔識得收起失望既情緒？果然一試之下，小弟福利指日可待，各讀者引頸以待既畫面都……嘿嘿。
我塗上愛情潤唇膏，乾燥既生活立時變得滋潤起來。果果比起像之中更要痴身，經常問我做緊咩，同事入面又有冇靚女，似乎好怕我瞞住佢溝女。
有次，我隔左大半日冇覆whatsapp，果果連打十個電話黎，幾乎要鬧至分手，好在我天生有做律師既潛質，憑藉三寸不爛之舌，花左半晚時間上訴得直。
比著係以前既我，或者會立即戴回氧氣罩，高舉雙手投降，但久旱逢甘露，而家既我不但冇反感，反而好享受比人逼到就快缺氧既滋味。
而晴晴知道我地拍拖之後，都講左聲恭喜，我僅比一個emoji作回應，事實上都唔敢同佢聯絡太多。
一來，以免我倆拍拖之喜過份濃郁，變相係晴晴傷口上灑鹽，二來，就係以免果果發現，誤會我同晴晴之間純潔既友誼。
老友呀堅、呀強同呀祥，都曾經分別搵我賭錢打機，飲酒作樂，我怕果果誤會我係一個壞男人，所以一一婉拒。
老友們自然大呼可惜，話我明明係一架高級消防車，可以架起粗壯雲梯，拯救萬千少女於熊熊慾火之中，現在居然淪為一個小型滅火筒，屈就於一間斗室之內，簡直就係暴殄天物。
不過對於豬朋狗友既誇獎，我只一笑置之。坦白講，唔知點解，而家既我，心入面竟然只得番一個念頭，就係化身成一位勇者，左手劍，右手盾，英氣勃勃咁保護果果，打倒佢心中不安既巨人。
或者係因為果果一開始已經對我坦白，令我覺得佢同一般既港女、mk妹好唔同，所以我特別愛錫呢段關係，想比最大既安全感佢。
短短半個月，我地愈愛愈深。高飛盤旋既大鷹，總會有拍翼回巢既時候，愛情海上既摩托車，亦有回岸休息既一刻。所以我有時係到諗，果果或者就係令我定落黎，令我一生幸福快樂既最後一個女人。
正當我對未來充滿盼望之時，我地既感情竟然毫無預兆地出現裂痕……
一個普通既晚上，我前往元朗，陪果果食海南雞飯。埋單走人之後，係街上緩緩散步。
其時月色溶溶，果果原本已頗為美麗既側面，顯得更清麗脫俗。我輕輕捏一捏佢隻手，道︰「果果，你好靚。」果果嘻嘻一笑，將我隻手捉得更緊。
又行一陣，來到長街燈下，大馬路旁，但見四處無人，只有呼呼風聲。果果忽問︰「呀歸，你愛唔愛我？」「愛，好愛。」我毫不猶疑地答。
果果眼晴水汪汪，我停下腳步，攬住佢條廿四吋纖腰，深情凝視，道︰「我從來未試過對一個女人咁認真，咁想同佢過人世，我知道你怕我出去溝女，鍾意第二個，但我可以話你知，我冇，真係冇，呢一世都冇。」
我唔知發咩神經，竟然講出如此肉麻既對白，與我一路以黎既風流性格背道而馳，又或者咁講，係我愛上果果既一刻，或者已經變左。
我一句講完，就提起狙擊槍，瞄準果果既小嘴，狠狠咁一啖咀落去。黑夜無星，街燈淡黃，我好似電影男主角咁，係元朗大街上濕吻女友，左手輕撫伊人玉背，右手就係胸脯上放蕩肆虐，旁若無人。
我倆忘情擁吻，唇舌相交，時間係身邊流過，日月如梭。直到喘氣分開，原來已經夜晚十點，我體下巨龍作息不分晝夜，龍頭高挺，軀體堅硬，相擁時不斷向果果腹間壓去，滋味難忘。
只見果果雙頰變得紅暈，道︰「呀歸……上黎我到好冇？今晚屋企冇人。」我心頭大動，二話不說，牽起溫暖小手，便探訪佳人住處。
果果住係屋邨，踏入鐵閘，一眼望盡都係百幾呎左右，地方狹窄熱焗，卻另有一番親密之感。
我不待果果放下手袋，一野就咀左落去，再度濕吻，雙手不斷係兩座小山峰上用力地搓揉，挖掘女人心中無盡既秘密。
本來被動既果果突然一手擲開手袋，雙手上下求索，然後向我下體火熱之處摸去……就係咁，我冋果果扑左野，積壓既情慾一夜爆發，可謂銷魂蝕骨，一世難忘。
翻雲覆雨過後，我係床上攬住果果，輕吻其耳珠，柔聲問道︰「你屋企人去左邊？」「爺爺番左大陸去飲，得番我一個咋。」我心中一震，佢既意思……莫非父母已經不在人世？
我正欲追問，但又怕割開果果既傷口，唯有將問句吞回肚中。果果忽道︰「起身丫不如。」「做咩？」「比你睇D野。」
穿回衣衫，果果繞住我手臂，一同走出大廳。來到一個書櫃面前，櫃上有一個相架。相入面有三個人，一個小女孩同一對夫妻。小女孩只有三四歳，笑容甜美，應該就係果果，另外兩個自然就係佢既父母了。
「佢地係我好細個個陣已經走左啦，咩都冇剩，就係得番呢幅相。」隔左咁耐，或者果果已經接受左事實，所以就算講出黎都係平平淡淡。但我覺得，呆望相架既果果，有點悲傷。
從小無父無母，果果注定要行一條比常人辛苦既斜路，一個小女人，嬌滴滴，只係得一個老爺爺照顧，生活既艱難可想而知。
我念及此處，心中愛念更深，輕輕一攬，道︰「放心，你以後有我，我唔會再比你咁辛苦，我一定會令你幸福。」果果淚水缺堤，顫聲道︰「你唔明，你唔明架啦。」
我深吸一口氣，道︰「係，好多野我無經歷過，我唔明。但係我會對你好好，呢樣野一世都唔會改變。」係呢一刻，我先好清楚肯定，自己的確動左真情。
果果抽泣數聲，十分感動。我笑左一笑︰「拿，唔可以再喊啦。」果果嗯了一聲。
激情過後，腹中飢餓，我走入廚房睇下有咩好食。十分鐘之後，捧出兩碗熱氣蒸騰既煎蛋麵。我倆相視一笑，坐下舉筷，暖暖既麵條吃進了肚裏，甜甜既蜜意則藏於心中。幸福，原來好簡單。
明明咁sweet，咁點解之前我會話我地既闗係出現裂痕？好簡單，因為扑完野既第二日，我就收到果果whatsapp︰「對唔住，不如分手啦，我地冇可能一齊，你唔好再搵我啦。」
Mk妹比人中出即飛我就聽過，勢估唔到女權主義抬頭得咁快，事情掉番轉頭發生，令我不幸成為革命時代中既犧牲者。
呢個分手短訊來得毫無預兆，猶如晴天霹靂，我隔左一陣先識反應，打比果果無人接聽，whatsapp全無回應，明顯唔係一般鬧分手既情節，佢係好認真想分開。
我呆呆咁望住個短信，有一刻真係以為有科學家發明左D咩時光機，引致時空大錯亂，世事隨之變改，否則尋晚我地先踏上七色彩雲，共赴巫山，點解今日，愛情既鏡子啪一聲，就咁就碎裂左？呢個世界仲講唔講邏輯？
我心痛如絞，長嘆一聲，有如行刑前的悲鳴，唯一既分別，係受刑者都會知道自己做錯左D咩，而我就乜都唔知，胡里胡塗。
又或者幸福，只係一個削左皮既蘋果，我咬左一啖，初嘗滋味，到左第二日後，就會變得非常苦澀……或者我應該好似牛頓咁，拎個蘋果去研究，為人類謀福祉，而唔係就咁將佢擺入口，食到一半先發現呢個係巫婆既毒蘋果。
我向住天花板大聲叫︰「我唔撚服！我唔撚服！」天花板面無表情，只有塵埃隨住我既咆哮聲而跌落，似乎係到向我暗示，一切都已經塵埃落定。
我呆左一陣，突然機靈一觸，先向公司請左個病假，之後撥個輪比晴晴。無錯，晴晴同果果係朋友，一定可以幫到我。
晴晴上緊堂，冇即刻聽電話。我心急如焚，終於等到中午放飯，晴晴打番比我。
但可惜既係，晴晴本身唔係同果果好熟，好多野只係一知半解，佢淨係見到果果成個上午都沒精打彩，感覺好唔開心，知道我同佢之間肯定有野，話唔定分左手添，晴晴唔敢問咁多，甚至懷疑，係咪我飛左人……
饒是我經驗老到，都實在唔明白到底發生左D咩事，果果要分手，但係佢又傷心，睇得戲多既人一定諗︰「果果有苦衷。」
係呢一刻，我真係唔知道咁多，不過有一點我好清楚，就係我一定唔可以放棄佢，唔可以就咁就同果果分開，因為我承諾過，要比幸福佢，一世都對佢好，唔會改變。
或者有人覺得我一廂情願，覺得我好白痴，好可笑……不過只要你係深愛一個人，無論係別人眼中，挽回一段感情係幾咁愚蠢、幾咁痛苦既事，你都甘之如飴，最多，也不過失敗罷了。
意大利詩人米高安哲羅曾經講過，失去左既感情就等於潑出去既水，係無辦法收復，即使你再將盆子填滿，亦都唔再係原本既個一盆水。
不過我一直相信，愛情並唔可以用一盆水去比擬咁簡單，佢係紥根你心底最深處、用快樂與悲傷去栽種出黎既一朵花，如果將佢連根拔出，只會狠狠咁牽勒你既靈魂，痛楚得令你顫抖。
風簫簫兮易水寒，我坐上某車，一臉悲壯。我不敢自比荊軻，但決心實屬無異。
車途顛簸，猶似我既命運一般搖曳不定。我閉目沉思，半個月既回憶猶如白浪一般湧上心頭……
猶記得第一日，我倆係戲院十指緊扣，於球場邊聆聽果果既過去……
猶記得我陪果果係m記溫書，不住擺弄佢既長髮，那陣香氣似乎仍然係空中迴盪……
猶記得我大半日無覆電話，果果又嬲又怕，我費盡唇舌安慰，兩人和好如初……
猶記得果果等我收工，係公司門口睇住人來人往，呆呆站著既樣子，令人又憐又愛……
猶記得果果一把將我抱住，問我掛唔掛住佢……
猶記得果果回憶往事，怕我如前男友般離佢而去，哭到一臉淚水……
猶記得昨晚，果果怔怔咁望住相架，我答應左，一世都會守護佢……
痛楚錐心，我驀然睜開雙眼，驚覺面目已濕，車原來不知不覺到站了。
我信步而行，走到校園前，開始在門外苦苦等候。隔左一陣，發現牆邊泥裏長出了一朵不知名既白色小花，我狠心一摘，打算送比果果。
等左半個鐘，終於收到晴晴既whatsapp提示，我心亂如麻。
果果係數個朋友擁護之下，終於現身，我甫一瞧見，不禁眼圈微紅。半日不見，如隔三秋，佳人容顏如舊，感情又是否如昔？
我昂頭踏步上前，大有雖千萬人吾往矣既氣慨，橫眉如電冷掃，果果既朋友一一退避三舍，偌大學院前，僅餘二人。
凝望果果憔悴的臉，我焦急既心平靜左落黎，冇急住追問，反而拖起果果小手，道︰「我地行下？」果果輕輕一掙，沒有掙脫，只嗯左一聲。
行左十幾步，我遞上白色小花，道︰「送比你既。」果果默然接過。「你知唔知呢朵花叫咩名？」「唔知呀……咩名？」「呢朵花叫做石南花。」
「你作架？」我搖一搖頭道︰「石南花呢個名係有段故架。話說唐朝個陣，有個識花愛花既詩人，名叫王建。佢有一日登山，見到山邊長出左一朵花，又弱又小，通體白色，不由得感到奇怪。因為個陣經常落雨，雨水沿山坡而流下，混著泥土，山邊所有花唔係死左，就係被泥水所染污，唯獨得呢一朵佢從未見過既花仲生存緊，而且顏色亦白得異乎尋常。」
果果看著手中白花，望一望我，一面茫然。我又道︰「王建細心觀察，發現原來係花既上方，有一塊凸出既岩石，正好將泥水衝落黎既路徑擋住，就咁日日夜夜保護住白花。」
「王建當時心中酸楚，皆因個陣佢同妻子分開左，王建係北方，妻子係南方，就好似岩石係上面，白花係下面一樣，唯一唔同既係，王建無辦法好似岩石咁，可以遙遙地守護妻子。佢感慨萬分，就將花起名為石南花。」
「之後王建仲題左首詩︰『明朝獨上銅台路，容見花開少許時。』當中既『花』，就係指石南花。佢話只要可以見一次石南花，無論聽日既路有幾長有幾苦，都不枉了。」
「我唔敢自比王建，但我答應過愛你，其實就好似岩石對白花既承諾一樣，無論呢個世界點樣風吹雨打，我都會好好咁保護你，白花仍在，岩石依舊。」
言至此處，果果淚水有如泉湧，哭道︰「你唔明，你唔知……你唔好對我咁好得唔得呀……」「唔得！」我霸道一喝，一個轉身，狠狠咁將果果擁入懷中，耳邊所聽，盡是哭泣之聲，我心既酸且痛。
夕陽餘暉下，兩情相悅時，相擁過後，分手二字似乎也煙消雲散。兩人攜手，緩緩而行。「你成日話我唔明，其實我唔明D乜呀？」我好奇地問。
「唔……我成日覺得，好似你咁好既男仔，又讀到大學，個樣又……又ok，一定好多女仔埋身啦。呢排我係咁胡思亂想，真係好辛苦，所以先想唔好一齊。」
我嘻嘻笑道︰「但係一見我，係咪又唔捨得呢？」果果低頭，一面紅暈，我心中一動，巨龍甦醒過來，準備大展筋骨。
情慾上腦，點開口叫果果扑野好？我好似啱啱求完枝籤，唔知係吉定凶咁，個心十五十六，唔同既我唔係拎住枝小幼籤，而係藏住枝大鐵棒。
果果道︰「你知道架，從來冇男仔對我咁好，我好驚又比人呃，以前佢……」我手心一緊，示意明白，果果曾經比人背叛，冇安全感係好正常既事。
「原來係咁咋？」「仲有，我心入面有一件事好驚，想而家同你坦白……」果果聲音似乎變得有D顫抖。我豪邁大笑，道︰「仲有咩招數？即管使出黎！」
但下一刻，我面如死灰。
果果講左一段說話出黎，我無法反應，平日口若懸河既我，居然連半個字都講唔到出黎，雙腳緊釘原地，如遭石化，兩行清淚從臉上滾滾流下，我一生之中，第一次感到咁無助。
果果不斷奔走，背影漸漸遠離。我孤獨站立，彷彿四面都是山谷，耳邊迴響著那一句︰「呀歸，我唔配……」
原來呢個先係果果真正想分手既原因……上天，我應該點做好？腦海翻江倒浪……我凝望天空，只想大喊一句︰「點解呀仆街！」明明快要和好如初，點解到最後一刻，先要比我知道呢個咁殘忍既事實？
夕陽慢慢消失，與我倆既愛情陪葬。我默然回首歸去，猶如行屍走肉。走到半路，發現地上一物，赫然係剛才我送比果果既一朵石南花。
「呀歸，其實我唔係一個好女仔，你知道，我自細就無呀爸呀媽，屋企好窮。爺爺老啦，已經做唔到野賺錢，我地相依唯命，一直都只係靠住拎綜緩同父母以前既少少積儲過活。到積儲用完，爺爺仲要病埋，佢話佢都老啦，唔想浪費D錢買藥，佢要去執紙皮、踩鐵罐，點都要養大我。」
「由個一刻開始，我就下定左決心，唔要爺爺辛苦，於是我呃佢，政府比錢資助我地生活，但其實我收錢同男人出街，上床……甚至到左而家，我都仲做緊。呀歸，你係我遇過咁多男仔當中，唯一一個會對我咁好既人，就係因為咁，我唔想瞞你。」
「你唔需要講任何野。呀歸，我唔配……」
果果臉上夾集不安、悲傷、無助……或者佢根本冇奢望過我會接受，所以由頭到尾佢都冇問到我，到底佢咁樣，我仲會唔會選擇同佢一齊。
而係佢最軟弱既一刻，我亦的確好自私，連一句安慰既說話都講唔出口，就咁讓佢離開。
試問男人，有邊個接受到女朋友做雞？或者由始至終，我都只係一塊自私既岩石。對果果言之鑿鑿既承諾，到頭來虛夢一場。
我拋棄左果果，果果拋棄左石南花。
我拾起花來一瞧，心如刀割，唔知比邊一個途人踩中，又或者係比好多個途人踩中，原本白色既花瓣，已經沾上了污泥。
花已離根，無藥可救。我學林黛玉，素手挖了個泥墳，淚葬情花。
自從個一日之後，我就冇再搵果果，果果亦然。兩條平行線隨著時間前行，可是永不相交。我唔想好似老子咁講，與果果老死不相往來，但除左道歉，我根本唔知自己可以講D咩、做D咩。
雷聲再響，總有靜滅既一刻，我情緒漸漸穩定落黎，但每當夜深人靜之時，唔知點解，總會感到一陣失落。
每當失落既時候，我倚著鐵窗，俯瞰大街，憶起果果既樣貌，甚至係佢最後道別既聲音，心裏又痛，又唔捨得，直到天明。
我答應過，要成為果果既勇者，但可惜，而家既我，一個人孤孤單單企係戰場之上，敵人一聲令下，萬箭齊發，就穿心而亡。
有一次得閒冇野做，我留意果果whatsapp既上線時間。點知佢幾個鐘都冇上線。我知道，佢好有可能賺緊皮肉錢。
我萬念俱灰，落街買左幾枝酒，坐係樹下長椅，正打算大醉一場。點知突然大腿劇震，幾乎以為香港都會地震，殊不知係晴晴打黎。
原來我十幾日無覆佢whatsapp，佢有D擔心。我哈哈大笑，說一句︰「老夫冇事。」就此收線。
隔左十分鐘，一架紅色的士駛近路邊，下來一人，我心頭劇震，莫非果果佢……揉一揉眼，卻是晴晴。我微覺失望，舉酒便喝。
晴晴坐係我身邊，好似社工咁安慰我，左一句右一句，今人煩厭。由始至終，佢都唔知道果果做雞既秘密，又點會明白我心入面既痛苦？
曹操打赤壁大戰之時，曾對酒當歌，豪氣十足。此刻我酒意上湧，也要學一學這混世梟雄，當下站起身來，高聲唱道︰「情人如若很好奇，要有被我嚇怕的準備。試問誰可，潔白無比。如何承受這好奇，答案大概似剃刀鋒利……」一啖酒，一句歌，痴撚左線。
晴晴見我發癲，似乎不知所措，只不停咁勸我唔好飲酒。
我不顧旁人目光，狂笑道︰「人生得意須盡歡，莫使金樽空對月。」晴晴嘆道︰「我最怕你係『抽刀斷水水更流，舉杯消愁愁更愁』。」
我冇諗過晴晴突然咁好文彩，醉眼一瞧，只見樹下少女，憂心忡忡，惹人憐愛。我巨龍發熱，膽子一壯，吐出八字︰「浪子才女，天生一對。」說畢，一野攬實晴晴，熱吻落唇，右手摸胸，腦海中幻想著的，卻是果果……
晴晴大力掙扎，一野將我推開，臉上驚恐交集︰「你……你……」我性慾受阻，同時諗起果果既事，不由得怒不可竭︰「我點唔好？反正女人全部都係雞！」
我一句出口，酒意盡去，彷彿醒左之後，床邊訓住一條唔識既女一樣，知道闖左大禍。
晴晴臉上流下了兩行淚水，我本來以為，晴晴忽然咁好文采，話唔定會應我一句︰「全部女人都係雞，咁你老母都係雞。」之後二人相視大笑，有何嫌隙也可一筆勾消。
可惜，晴晴咩都冇講，就咁走左。一生人，除左老母之外，仲可以遇到幾多個真心對自己好既女仔？我係短短幾個月，就趕走左兩個，而且一句挽留既說話我都講唔出口，任由佳人遠去。
將軍戰死沙場，酒鬼醉臥長街。前者縱然英雄，也得魂歸天國；後者縱然不肖，尚可苟且偷安。我已無法成為英雄，只得做個酒鬼，渾渾噩噩，有如一潭死水。
到左第二朝，我仲訓係條街到，成晚冇番屋企，不過手機同銀包就冇比人偷走，唔係因為香港人善良，而係因為成地都係酒樽，冇人敢靠近，怕比癲佬襲擊。
星期六屋企冇人，我番到去又訓左幾粒鐘，起身後發現，晴晴竟然打左幾次比我，又whatsapp我話知道我尋晚係醉酒佬衝口而出，所以無怪到我。
門鐘忽然響起，我以為屋企人番黎，開門後不禁一呆，竟然係晴晴，佢拎住一袋早餐，雪中送暖。
我心中感動，問道︰「呃……你點會知我住邊既？」「以前上過黎拎你本數學筆記，所以咁啱記得。你尋晚醉到咁，都啱啱起身架啦？食野啦。」「哦……係……」
我低頭食牛肉麵，心不在弦，諗起尋晚「全部都係雞」既言論，心虛得如一個剛剛破左戒既小淫僧，唔知點同方丈交代。
常言道︰「食飽有力好辦事。」幾塊牛肉落肚，我精神一震，腦中齒輪塗上機油，微一轉念，氹女既念頭又生。
我放下筷子，嘆左口氣，道︰「原來你仲記得我以前借筆記比你……你等等，我比你睇D野。」我走入房中，於櫃桶底摸出幾張生日卡，掃一掃上面既灰塵，拎比晴晴睇。
晴晴一瞧，雙目含淚，道︰「個陣你同我講，浪子唔應該收生日卡，轉個頭會掉左佢，估唔到……估唔到你仲有keep住。」
事實上所有女仔送既野我都一路keep住，就好似收集戰利品一樣，令人滿足，只係當年我年少無知，王傑上身，開口埋口都浪子，嚇走唔少女仔。
如我所料，氹女仔，其實唔難。
之後我倆促膝長談，原來晴晴尋晚見我咁傷心，居然去搵左果果，問我地之間發生咩事，最後亦得悉左果果既陰暗面。或者係因為咁，佢先肯原諒我既無禮。
我係愛情路上，一直都係一架電單車，自由自在，就算後來愛上果果，都只不過於電單車後載了一人，但前方既路到底要點行，我從來都唔需要人去帶領，
不過同晴晴傾完之後，我內心翻騰，決定停車後轉，搵番果果。
`
晴晴問左我一個好簡單既問題，到底我仲愛唔愛果果。我大刀切菜，清脆俐落地回答︰「愛。」「咁愛一個人，唔係應該體諒佢既處境咩？幫助佢走出難關咩？」
晴晴講得好啱，愛一個人唔係咁簡單。西廂記裏，張珙歷盡艱辛，才能娶崔鶯鶯做老婆，有情人終成眷屬。我雖缺八斗之才，對果果既愛卻比任何人都要深。
我倔強之心一起，便如蠻牛發作，不顧一切。冇錯，即使係神雕俠侶，亦抹不去尹志平(笑)呢個污點，只要我可勸服果果從良，又何必介意過去？更何況果果唔係貪錢，只係為左生活，為左親人。
以往鑽牛角尖，而家一受晴晴指點，竟然茅塞頓開，睇得極開，整個人容光煥發起來，心情輕鬆至極。
我即刻打比果果，電話既另一端傳來一陣沉默，我率先開口︰「係我，呀歸。」一言說畢，果果泣聲如雨。
「你仲打黎做咩？」聽著少女哽咽抽泣，我痛恨不已，深吸一口氣，道︰「我想見你。」「我已經講得好清楚，我地……唔好再見啦。」
「我問過自己，假如聽日就係世界末日，我而家最想做既會係乜野？好簡單，就係搵番你，好好咁愛你。」
「世界太亂，人生太短，我唔想浪費青春，唔想有遺憾，只想永遠同你一齊。其實我已經到左你屋企樓下，如果你真係唔想見我既話，你就由我白等。但我話你知，我係現代尾生，就算香港水浸，我都會係公園抱住條柱等，直到見到你為止。」
尾生抱柱，至死不渝。故事造福後世，不到五分鐘，果果就著住拖鞋，長髮披肩，企係公園出面。
我大步上前，雙手攬緊果果，如一個快要浸死既人，捉住最後一根稻草。稻草亦顯靈，將我圍抱繞住。再次感受親暱，彷彿坐在雲端之上，四處都是暖暖既綿花糖堆，夢耶？真耶？
我向果果承諾，會努力賺錢儲錢，養埋佢個份，過去既一切，就任它隨風飄去，不必再提。果果大力點頭，答應我不再輕賤自己。
相擁而泣，相擁而笑，淚水是咸的，也是甜的。我倆坐在公園裏，輕撥秀髮，細話蜜語，只盼世界上真有操控時間既魔術師，可以將這一刻永遠停留。
果果爺爺仲係大陸，家裏空無一人，我親吻果果額頭，不由得邪念陡生，知道今日又係解放巨龍，大展雄風既日子。
我倆回到屋裏，坐在床邊，溫存熱吻。巨龍重遇女主人，難免興奮抬頭，果果亦彎腰低身，與之相見招呼。我溫聲索要，果果嗤笑一聲，話要先去沖涼。
我攝手攝腳，輕輕推開門來，探頭偷窺。耳邊盡是水聲，一片煙霧迷漫，只見玉背琉璃，酥胸凝珠，我裸身站在門邊，心頭大動。
「衰人，你偷望我！」我嘻嘻一笑道︰「牛郎都係咁樣裝織女沖涼，之後拎走佢D衫，先可以成為夫妻，最後……」我心中一凜，想起故事結局，牛郎與織女慘遭分離，連忙住口不說。
我雖久不征戰，但仍悍似沙場老將，一拍白馬美臀，便深入敵陣撕殺，果果知道苦頭，不久已大叫投降。
我又豈容她脫身，當下化身大聖爺，徒手攀爬花果山，再一挺粗壯既如意金剛棒，鑽入水濂洞中，極樂一刻，人間十年，渾不知世上何事。
就係咁，我地既戀情漸漸穩定落黎，果果冇再去賺皮肉錢，我亦冇再介意佢既過去。我甚至已經認定果果係最後既一個，打算同佢結婚。
我唔係踏住七色彩雲既行者，唔係騎住白馬、冉冉而來既王子……我只係簡單既凡人，最多也不過私自養了一條巨龍。不過我同幻想中既行者、王子一般無異，我想捉緊愛人隻小手，向住未來既路，一步一步咁行，印出兩行淡淡既足跡。
或者係旁人眼中，談婚論嫁未免太快。但我知道，我一世都唔會再遇到另一個，可以令我愛得要死既女人，彷彿段譽碰上王語嫣，梁山伯遇到祝英台，李靖邂逅紅拂女……前世冤孽，化成今世幸福。
但好可惜，幸福來得慢，去得快……到底係不幸，定係命運？實在無法解釋。我只明白到，原來愛情脆弱得很，一件事就可以將一段感情判上死刑，釘在十字架上，任人憑弔。
或者幸福就係一架尾班火車，慢慢咁駛入月台，我雖然盡左全力奔跑過來，但當腳步要踏上車廂既一刻，火車既輪子就已無情地轉動……眼前幸福，最終化為一道刮臉既冷風，為差一步上到車既可憐人，留下一臉錯愕，一臉悲傷。
我到而家都仲記得好清楚，呢件事，發生於我地相識後既第九個月。個一晚，我帶左果果同一班大學朋友飲野……
果果第一次正式咁出黎見我既朋友，顯得又緊張又興奮，淨係化妝襯衫都用左成粒鐘。我摸摸佢額頭，笑道︰「又唔係見家長，唔洗咁誇喎。」果果嘟一嘟嘴，似乎想講︰「男人，識條春咩。」
到夜晚八點，諧手到達酒吧。在場既都係我同系既同學，一共有五個，大家一齊上左四年堂，嘻嘻哈哈，關係唔算好差既，但熟又談唔上，只係出黎一聚，都叫做點綴一下忙碌既工作生活。
不過五人當中，有其中一個男仔視我為情敵，佢叫Martin，係當年玩ocamp時，曾經追求過一個同組既女仔叫Janice。Janice同Martin相識在先，不過後黎鐘意左我，之後就一直對Martin不瞅不睬。
就係咁，佢覺得我從中破壞佢地既關係，搶走左Janice，於是恨我極深。當然，平時係聚會當中，佢唔會表現呢種憎恨，所以大家都唔知道。
不過係我眼中，個女仔係你就係你既，Martin只係溝唔到Janice，搵藉口比自己既可憐蟲。加上我同佢只係一場相識，都稱唔上係咩朋友，所以都唔覺當年溝Janice有咩問題。而隔左咁耐，我對往事早已毫不在乎，同樣殷切地打個招呼。
一坐低，就見到Martin雙眼發光咁望住果果，有如狗公發情，問我︰「呀歸，呢個係你女朋友？」我點一點頭，將果果介紹比大家識。招呼一輪，果果突然係我耳邊細細聲咁講︰「我……我有D唔舒服，想番去先。」
我一呆，發覺果果臉色剎白，左望右望，感覺好唔自然，不禁有D擔心。正想同大家請辭之際，呀玲開口道︰「估唔到喎，呀歸居然會帶女朋友出黎！」
呢位呀玲，一直對我唔錯，同我初相識時曾經有過曖昧關係，只係我一直都冇認真，冇比女友既名份佢，有時諗番，心入面都有一番歉意。
Martin又道︰「不過，呢個女仔，咁熟口面既？嗯……到底係邊到見過？」說畢拓腮思考。我道︰「果果佢有D唔舒服，我送佢走先。」
我帶果果出左酒吧，走到小巴站，果果話︰「得啦，你番去陪朋友，我番到屋企打比你。」於是我回到酒吧，只見五人談笑風生，一見我番黎，人人都發出驚艷讚嘆之聲。
我見眾人神情有異，問道︰「咩事？」Martin道︰「歸少，咪扮野喎，你同呢條女玩認真？」「係又點，唔係又點，關你事？」人人都覺得我係浪子，換女如換畫，無咁易定落黎，所以我冇怪到佢地。
不過對於Martin咁無禮既問法，我語氣已透露出不滿。Martin聳肩不語。
呀邦驚奇地道︰「唔撚係掛？依條女唔係做……做援交架咩？歸少，你係我偶像黎架喎，乜搞D咁既野？」我一聽之下，臉色大變，心中如翻起了滔天巨浪，怒道︰「你up乜呀，收嗲啦！」
呀邦估唔到我發火，不禁一呆，望住Martin，然後其餘三人都齊齊望向Martin，之後逐一辭別︰「呃……我地走先，你地慢慢飲。」轉眼間得番我同Martin二人，原來係佢，係我背後講是講非。
我冷冷問道︰「你咁樣中傷我條女，係咩意思？想我飛左果果，你好乘虛而入？我知你當年好唔鋸，但過左咁多年，把臭口積下德啦。」
Martin撕下假面具，毫不示弱說道︰「我就冇咩意思，驚你比人呃，所以想提一提你，你條女係雞呀！坦白講，果果呢，我就一向幫襯開既，都扑左佢幾年架啦，貪佢樣靚、水多、夠淫賤。價錢又平喎，七舊水一次咋。好砌到呢……難怪你認真。」
我口喘大氣，右手握成拳頭，好想一拳打撚柒佢，但係我強忍怒火，心諗︰「呢條友鍾意吹水中傷人啫，香港咁大，點會咁啱係果果舊客？我要冷靜。」
點知Martin愈講愈露骨︰「果果心口有粒墨架嘛，我都扑到熟哂啦，有時比多幾舊水仲可以唔戴套添。唉，而家諗番都扯扯地。」
我一手揪住Martin衣領，怒道︰「你試下再講多句！」「傷心呀？當年你搶走Janice個陣，又有冇諗過我會傷心呀！」Martin狂笑，宛若瘋癲。
我再忍唔住，大叫︰「收聲呀仆街！」將Martin拖出座位，奮力一推。砰砰砰砰，撞跌了兩張高椅。如果唔係我仲有半分理智，早已提起桌上酒樽，迎頭狠擊一記。
Martin掙扎站立，道︰「嘿嘿，你唔比我講，我就愈要講。當日我同Janice一齊左只係兩個禮拜，就比你橫刀奪愛。由個一刻起，我就知道，女人全部都養唔撚熟！我去搵援交，明買明賣，不知幾好。只係估唔到，我簡中左你條女黎屌，哈哈哈，報應！報應呀！」
Martin雙眼通紅，說畢竟流下眼淚，兩行清泉滑下，掠過瘦削的雙頰。我心裏一涼，原來當年佢同Janice一齊過？原來係因為Janice既離開，Martin先會搵援交？Martin既一字一句彷彿雷電般狠狠地轟進我心坎。
酒吧聲音嘈雜，我思緒倍添混亂，耳裏一片嗡嗡作響。唔知幾時，我同Martin比旁人勸開左，Martin亦已離開，剩番我坐係到，呆呆咁望住空酒杯，好似連自己個心都被挖空左。
我離開酒吧，走回街上，猶如大海中一葉小舟，搖搖晃晃，流離浪蕩，不知去向。原來當初係我搶左人女朋友，所以而家老天爺要懲罰我。
只一晚，Martin已經將果果既過去講左比四個人聽，第二晚佢又會講比幾多人聽？第三晚呢？第四晚呢？到最後會有幾多人知道？
我愈想心裏愈寒、愈怕，我可以接受果果既過去，但如果呢件事傳開左，我又承唔承受得起？我實在唔敢講。
我想起剛才果果既表情，離開時既不安神色，或者佢唔係唔舒服，只係同我一樣，擔心緊同一樣野。
內心雖然掙扎，但想起當初對果果既承諾，我決定去承受一切。之前放棄過一次，傷害左果果，我唔想再有第二次。
縱使全世界都知我女朋友曾經做過不堪既事，又如何？為左果果，與全世界為敵，又如何？我想到此處，深深呼了一口氣，堅決得如從天而降的飛將軍，面對千軍萬馬，勢要直闖戰陣，毫無懼色。
之後一段日子，我假裝無事發生，儘管身邊有不少流言誹語，甚至呀堅呀強同呀祥，都知道左呢件事，三人聯名上奏，想我斬斷情絲，也被我當作是耳邊風。
一日心血來潮，我瞞住果果，偷偷買左一隻戒指，我決定左，要比更莊嚴既承諾佢。
我係家中拿著戒指，想像將之套入愛人手中……就在此時，電話忽然響起。
「呀歸，得唔得閒講兩句？」「咩事呀晴晴？」「唔……我……我……」「做咩吞吞吐吐？講啦。」「你答應我，唔好咁激動好冇？」我心裏好奇，道︰「咩事呀到底？唔係果果出左事呀嘛？」
「我而家係學校，見到果果佢……」「佢做咩？」「佢拖住第二個男仔。」聽到呢句，我不禁大吃一驚，隨即鎮靜下來，道︰「你睇錯啦，果果今日留左係屋企溫書，點會係學校。」坦白講，我對果果真係有百分之百既信心。
晴晴沉默左一陣，道︰「唔會認錯，個男仔我都識，係mui soc既人，果果去左睇佢出show。」「你想點呀？唔好中傷果果喎。」我氣往上衝，居然語懷不善，質疑晴晴別有居心。
「我地識左咁多年，原來我係你眼中，係D咁既人？」呢一刻，我默沉不語。「好，咁你當我睇錯啦，拜拜。」我呆呆聽著電話另一端傳來的斷線聲，心裏竟不禁泛起猶疑既波紋。
是夜，與果果相約於旺角拍拖，四處人頭湧湧，聲色雜亂，二人攜手逛街。我一時摸著褲裏戒指，一時想起晴晴既說話，腦海不由得一陣紛亂，欲言又止。
不久來到一個僻靜的小公園，果果忽然停下，道︰「呀歸，我有D野想同你講。」我心不在弦，問道︰「嗯？」果果面容突然變得嚴肅，緩緩說道︰「我同左第二個一齊。」「咩話？」「我同左第二個一齊。」
呢一刻，彷彿天神從雲端處，降下了一道雷電，直劈中我頂門，腦海變得一片空白。「咪玩啦。」我強顏歡笑。「認真架，我地一齊左幾日架啦。」果果搖頭，眼神異常堅決，原來晴晴講既係事實。
「邊……邊個黎？」「你唔識。」「點解要咁對我！」我狂吼一聲，捉緊果果雙臂。果果突然流下眼淚，哭道︰「你知唔知我真係好愛你。」我聽到後一呆，心裏又苦又甜，不明所以。
「但係我真係唔想……唔想你為左我，比所有人睇唔起。一個做過援交既女仔，根本就唔值得比人咁愛法……呀歸，你係好人黎，值得一個更好既女仔。」「唔得！你知道，我呢一世唔會再愛第二個。」
「我知道無論點講，你都會挽留我，所以我選擇左，同另一個人一齊。我寧願搵一個唔知道我過去既男仔。」果果奮力一甩，將我推開。
我口唇不自覺地震抖，摸出褲袋的一枚戒指來，顫聲道︰「唔好咁，番黎我身邊，好唔好？」
果果臉上似乎閃過一陣異樣的神色，之後轉過身去，道︰「死心啦，我同佢……我同佢已經發生左關係，無可能同番你一齊。」
我腦裏嗡的一聲，一瞬間宛如天旋地轉。「我地以後唔好再見。」果果就此離開左。呢次係我一生人，同果果最後一次既見面。
燈柱如常，灑下淡黃色光線，樹木隨風輕擺，嗦嗦作響。我站在公園裏，孤單一人。好痛，好痛……好似有一把利刀，直插入我心臟，然後有人捉住刀柄，前後左右不停地絞動。
「點解？啊——啊！」淚問蒼天，蒼天不語。我狂吼怒叫，右手猛的一揮，把手中戒指擲了出去，鏗鏘一聲，擊中長椅。戒指既命運與我愛情一般，最終不知跌在何處……
時光匆匆，如白駒過隙，雖然已過了許久，但憶起這些往事，心裏仍不由得起伏不定。我獨自坐在酒吧中，喝了一口酒，又是一口，辛辣的味道傳進我腦中，稍減痛苦。
「你出手汗喎，真係好唔舒服呀？」
「你會一世都咁愛我，係咪？」
「我從來未試過對一個女人咁認真，咁想同佢過人世，我知道你怕我出去溝女，鍾意第二個，但我可以話你知，我冇，真係冇，呢一世都冇。」
「佢地係我好細個個陣已經走左啦，咩都冇剩，就係得番呢幅相。」
「呢朵花叫做石南花。」
「你唔需要講任何野。呀歸，我唔配……」
「我問過自己，假如聽日就係世界末日，我而家最想做既會係乜野？好簡單，就係搵番你，好好咁愛你。」
「衰人，你偷望我！」
「牛郎都係咁樣裝織女沖涼，之後拎走佢D衫，先可以成為夫妻，最後……」
最後……原來我比牛郎更可憐。
「我地以後唔好再見。」
我搖一搖頭，昏昏沉沉之中，忽然聽到兩個男人在說話。
「記唔記得個日幾爆呀，兩條仔係到打交，唔知邊個搶左邊個條女。」「梗係記得啦，不過仔又有咩好睇？我反而見到有條女，企左係門口到望，後生女，對腳白白滑滑。可惜望左一陣咋，就唔知做咩喊住咁走左……」
「Hi，我叫Apple。」突然有人撘我膊頭，我抬頭一望，眼前係一個身穿火紅色衫既女人，胸前衣領半開，隱隱若若露出黑色bra，異常性感。
我上下打量Apple，喃喃地道︰「蘋果……果嗎？」呆了一呆，舉起酒杯便喝。「係呀，我又飲。」Apple搶了我手中酒杯，喝一口後笑了一笑，魅惑得宛如魔女一般。
我倆閒談一會，都係無關痛癢既內容，不著邊際。「咦，你條頸鍊上面隻戒指……幾靚喎，送比我得唔得？」我右手順著幼細的頸鍊摸下去，接著捉住了戒指，細撫上面微微破損既痕跡，搖一搖頭。
「哦……咁算啦，女朋友送架？」「隻戒指係我前女友既。」Apple沉默左一陣，突然伸頸靠近我臉龐，低聲道︰「佢一定好靚，比我睇下咩樣得唔得？」我吞左啖口水，迷迷糊糊，開左手機比佢睇。
「佢個樣咁mk既。」Apple愈靠愈近，胸部已貼在我手肘上。我酒意上湧，巨龍發熱，一手攬住Apple條腰，係佢耳邊講︰「一生人，總會愛上一個mk妹。」然後便往她唇上，吻了下去……
-全文完-
