我叫阿菇,唔知你地嘅女朋友悶唔悶架呢?我嗰個呢,就一啲都唔悶,有時仲好可愛。佢好鐘意問我愛唔愛佢,如果一百分滿分,我愛佢有幾多分。呢啲問題其實邊有老實話聽,次次我都會答佢「二千」,跟住佢就會笑到戇尻尻咁走開。

佢就係咁簡單,我地就係咁簡單。

我每次都講大話答佢「二千」,其實我愛佢又點止「二千」,宜家買菜咩?邊有得秤架。不過我知道呢個係佢自己嘅尋開心方法,所以每一次我見到佢笑,我都會好開心。

佢有時會叫我玩埋啲戇尻遊戲,我都會好樂意陪佢玩。佢以前同我玩過鬥唔透氣遊戲、三個鐘唔俾我攬遊戲同埋屙屎鬥長遊戲。

好似今日咁,佢又叫我玩咗一個遊戲喇…

丫,唔記得講,我女朋友,佢叫B女。

「菇呀,不如今日我地玩個遊戲,輸咗就要俾對方罰。」

「又玩乜尻呀大王?」

「玩………Er…………你咁鐘意講粗口,就同你玩個講粗口遊戲啦。」

我承認自己嘅修養唔係太好,經常都會衝口而出咁講咗好多助語詞,但其實用講粗口嚟玩遊戲又有乜嘢好呢?

「粗口點撚樣玩呀?」

「好簡單,宜家開始,你講嘅每一句說話都要有粗口,我就一句都唔準講。邊個輸咗,就要聽對方一次話。」

「聽一次話?乜都得?」

「係!!乜都得。」

我終於有機會買我對限量版波鞋,之前問極B女都唔俾我買,今次仲唔係大好機會?

「冇撚問題!!開撚始!!!!!」

遊戲開始,我同B女一齊行落旺角,由信和行到去先達,我個腦只係一直諗住一句說話:

我要講粗口我要講粗口我要講粗口……

「阿菇呀。」

「係,乜撚嘢事呀Baby?」

「我地呢度行落尖沙咀遠唔遠,我想去買啲嘢。」

Er……粗口呀要……

「都幾撚遠,妳……又想買乜撚嘢?」

B女望住我,面色沉咗一沉:

「乜你咁惡架。」

吓,又係妳叫我玩遊戲,宜家又話我惡,我真係唔識講粗口講到好似讚人咁喎。

「唔係呀,我邊有惡,咁…咁講粗口就係咁撚樣架啦。」

「講粗口唔可以講得斯文啲咩…算啦,我地今晚食咩呀?」

吓,講粗口都有得斯文?妳同問我有冇見過人肥得好瘦未有咩分別?

咦咦咦…咪住先,食咩飯?食咩飯我點講粗口呀?法撚國菜咁呀?妳個死婆丫,有啲準備呀下…

「不如你講三個俾我揀啦,日本韓國咁樣講三個啦。」

聰明!!!不愧係B女姐,之但係妳醒我都唔柒。

「泰國嘢囉…屌。」

「辣呀。」

「咁一係日本嘢啦………屌。」

「我姨媽到,唔食生嘢。」

「咁一係清清地食個粥喇……………………………好唔撚好啫?」嘩,爭小小唔記得講粗口。

「哈哈哈,你爭小小就輸,下次唔準拖咁長呀。」

我陪住B女一路行老尖,一路篤電話。

「喂,你唔好成日玩電話啦。」

「關妳撚事呀?」

「喂!!!!你又鬧我!!!」

「小姐呀…妳又要逼我講粗口,又要唔。。。撚俾時間我諗,咁我衝口而出妳真係唔怪得我喎。」

「總之唔準鬧我!!」

「得!!O撚K!!!」

我地繼續行,B女去到一間小食舖前,指指入面嘅食物。

「你幫我買串魚旦。」

「哦…咁…不如唔好撚玩住先好冇呀?」

「遊戲一開始,係冇得唔玩。」

「咁…我走去用粗口同人地買嘢食,好撚危險架喎,你知香港人幾撚大壓力架啦。一陣我俾人打到仆街,跟手再放埋上YOUTUBER,到時我真係紅撚過劉馬車呀。」

「得,你唔愛我。」

「得,我即買呀屌。」

行埋去間舖頭,講真個心真係超淆底,我鐘意講粗口啫,但冇諗過買串魚旦都要講喎…

「阿叔呀,唔銀該比串魚旦。」我用一把接近係太監嘅聲行埋去個魚旦阿叔面前講。

「咩話?」個阿叔好大聲咁問我

「喂…大聲啲呀。」B女拍拍我背脊。

「阿叔,唔…撚該比串魚旦。」我由頭先嘅低級太監,升級到一個高級太監嘅聲量去講。

「喂,哥仔,聽唔撚到你講乜尻呀。」

我聽到個阿叔講粗口,即時精神一震。你屌咗我一句先,我再屌返你一句就好做好多啦。

「屌你我話整串魚旦嚟呀阿叔。」

「哦!!大聲啲嘛,一串魚旦呀下,冇撚問題!!」

我拎住串魚旦,拎轉身望住B女時,佢已經笑到彎埋個身。我冇佢咁好氣,一串魚旦就隊到去佢面前。

「食啦!!笑!!!」

B女一手搶咗我串魚旦,跟住指住我大叫:

「哦!!!冇講粗口!!!」

「我屌!!!!」我扯住自己頭髮,喺條街大叫咗出嚟,我真係冇諗過,原來講粗口都會咁辛苦。

「哈哈哈哈,好嘢我嬴咗。」

「妳罰啦!!」

「罰呀…?罰你……聽晚同我阿媽食飯啦。」

同B女老母食飯?我地拍拖咁耐佢都冇叫過我同佢屋企人食飯架喎。

「食飯?你講真架?」

「係呀,我諗住你今日一次過講哂啲粗口,聽日對住我阿媽咪唔會唔小心講錯一兩句囉,第一個印象好緊要架。」

「好呀…!!!我一定唔會講!!」

「傻佬!」

「哈哈哈哈哈哈哈哈。」
「哈哈哈哈哈哈哈哈哈哈哈。」

你地有冇一個咁嘅女朋友?佢做嘅事你地未必會明,但考量嘅總係會比你地多。兩個人一齊,其實好多時都要相信對方,個世界好大,有好多人亦有好多關係。有時你會好似走入一個迷宮度,唔知前路點行,甚至係伸手不見五指。

呢個時候,我地總係要堅持自己諗嘅事,我地相信嘅人。佢地未必可以叻到帶你走出迷宮。但係佢地總係可以,帶你去到一個可以透氣嘅地方,等你將自己梳理好,然後帶返佢走出呢一個,佢為你而走入嚟嘅人生迷宮。

係咪好難明?試下相信,你慢慢就會明。