又係我阿菇，今日又有嘢想講。
B女嘅性格好極端，專注同唔專注一樣嘢可以有好大分別，我成日都話佢腦容量只可以做一件事，放咗一件落去，佢就冇位再放多另一件。
好多時佢掛住玩電話，就連過馬路都可以望都唔使望就行出去。身為男朋友嘅我當然把握呢個機會去鬧尻佢，但往往都係俾佢秒殺返我轉頭。
「喂，睇車呀，係唔撚係想死呀？」
「你惡我呀？」B女好認真咁望住我出佢其中一樣絕招，威力大到可以一秒間覺得自己真係有錯。
「唔係，邊敢惡妳丫，我緊張啫。」
「但你頭先好大聲喎，今日罰你，全日都要叫我做大佬。」B女最鐘意嘅戇尻遊戲，多數都係呢個時間出場。
「知道，大佬。」但其實我都唔柒，呢啲環境就當然係扮死狗樣啦。因為我知道，佢好快就會氹我。
「哎呀，咁你喺我隔離嘛，你點會俾啲車撞親我喎。」
你地睇下，你攻我守，有長有短，我同B女就嚟可以開套葉問4嚟表演情侶痴手大家睇。
另外佢算係一個工作狂，有時覺得自己要加班，佢就會將嗰一日、嗰一日之後甚至係再之後嗰日嘅工作都想完成哂，佢先捨得放工。但當佢唔想返公司時，佢可以去行街做Gym食飯睇戲…就係唔返公司。
同B女相處唔難，你只要捉得住佢專注嘅問題，其實已經好易應付，除咗喺電話入面…………
B女用Whatsapp時有一招絕招
「嗯」
係呀，呢招就係佢嘅絕招
「嗯」
幾時會出現？我話你知。
「大佬，咁今晚我地食飯好冇？」
「嗯。」
大家係咪以為佢已經應承我晚飯？少年你就真係太天真喇，三個鐘後，我會問多佢一次。
「咁我地今晚去邊食呀，大佬？」
「咩去邊食呀？」
「我地去食飯嘛，你話得嘅。」
「我邊有話得呀？」
「你 嗯我喎。」
「我 嗯即係聽到你問我咋，我今晚唔得呀，媽咪要我返屋企食飯。」
呢個時候佢多數已經發覺自己因為太專注，而唔小心Hea咗我一嘢。跟住佢又會用個好天真爛漫樣同我講：
「我聽晚再陪你啦，菇菇仔。」
去到呢個位，我已經蝕哂章，亦唔可以發脾氣，因為一發脾氣佢又會出絕招：
「你惡我呀？」
呢幾招交替使用，仲勁過周伯通嘅左右互搏神功呀。
又有一次，我咳到仆街，仲有小小燒。不過成班朋友約咗去睇波，我冇理由俾小小病毒就嚇走我對波嘅熱誠架，點都要問下大佬意見嘅。
「大佬呀，阿甲阿乙成班去睇波，就係爭我一個先齊人，我今晚想去睇波呀。」
我發出訊息之後，好不安咁等候B女回覆，好快佢就應我：
「嗯。」
「Yeah!!!」
正當我準備約人時，B女又send多個訊息嚟。
「夠膽你咪去囉。」
Orrz………………………………………………………….唔得，我點都要反抗下。
「但好多朋友去呀，唔去好似唔好意思咁。」
「嗯。」
「大佬，食飯未呀大佬？」扮傻仔做緩衝，我諗有經驗嘅朋友都識架啦。
「我都有幾個男仔朋友約咗我食飯好多次，你講得啱，唔去真係唔係好好意思咁。」
「OK我唔去喇大佬。」
唉，呢啲情況唔開心就一定有，但幾分鐘後，B女通常都會俾返訊息我：
「我為你好咋，一係咁啦，你收工嚟搵我，如果你對住我三個鐘都唔咳一聲，我就俾你去啦。」
「O撚K!!!!!」
最後我當然都係咳咗，結果亦係乖乖地返屋企，不過B女嘅處理，每一次我最後都係好快樂。
其實情侶相處，就好似大家拖住手去過好多度門咁。門好窄，永遠都係只可以俾一個人過。其實邊個過先係冇所謂，最緊要你地係一直手拉手，一個過完之後，一定會拖住另一個過呢度門。中間可能有距離，亦都可能會有誤解，但只要你地隻手係拖住，最後大家都可以出現喺門嘅另一邊。
做人嘅嘢，條命又好、愛情又好，都係最緊要收尾嗰幾年架啫。
