香港地有好多人話無錢買樓,但我一定唔係其中一個,因為我好有錢。

我叫陳天歸,係香港最Top嘅傳統學府畢業,唔洗問我邊間,講得最TOP,而家只有一間,除左港大,其他嘅大學都只係屬於Other Universities呢類,唔係我想貶低其他大學,我本身有好多其他U畢業嘅FD,亦好尊重佢地。

不過我去到外國,鬼佬鬼妹多數都只係識港大,其中一個原因係當年港大學生搞左好大壇野出黎,係全世界響哂朵,而勤勤懇懇唔多出位嘅科大中大就仲係冇咩人識欣賞,更加唔好話浸大理大個啲。

總之,BBA畢業之後,我入左Ibank做,做左四五年,我升得好快,一個月去到十幾萬,本來同收入成千萬一年嘅無良老闆或者繼承家業嘅二世祖比起,我都仲只係一條窮撚。

但之後二零年遇到十年難得一見嘅金融地震,有間銀行帳目出問題,資金周轉出事,做唔到貨款亦無力還債,造成結構性危機,影響第二間銀行、第三間銀行……以致唔同嘅金融機構,股市跌到仆街。

但我睇得好清,間銀行幾條爛帳假數唔會影響到咁大,只係市場出現恐慌性拋售,個個想攬住舊錢訓,驚死借出去收唔番,隔夜拆息去到十幾厘。

係呢個時候,我大膽做左一個決定,用哂成副身家再問屋企人、朋友借錢,總之借得就借,玩盡埋個Leverage,睇準時機撈底買股票,唔洗半年,股市重返高位,我個時終於明白點解人地話香港地遍地黃金,唔愁冇發達機會,只不過你博一鋪發唔到,就會陷家產咁解啫。

我賺左好多錢,辭左份工,專心炒股,我眼光好,又有本錢,愈黎愈有錢,之後買左兩間八百呎私樓,一間比老豆老母,一間比呀哥,唔係我唔想買豪宅比老豆老母嘆,係佢地話太大住唔慣,呀哥冇咩虛榮感,亦本身好憎乜都要賺到盡嘅地產商,話夠住就得,唔洗買咁貴益班仆街。而我係附近又買左層樓自住。

我發達嘅事其實除左屋企人之外冇咩人知道,因為我本身都係冇咩虛榮感嘅人,由細到大公屋仔一個,所以份人比較實際,唔識炫耀。我買衫係見到靚,睇啱價就買,唔會理牌子,底褲都仲係著緊佐記,當然係大碼先啱著啦。

車亦懶得揸,唔介意逼地鐵撘巴士,錶呢?人地話名錶可以表現到一個人身份地位,但我自己就覺得人嘅價值冇需要用呢啲死物去表現出黎,我有部LG機,隨時都知道時間,無需要戴錶,所以正常黎講冇人會睇得出我其實係有錢人。

有親戚問過我︰「做咩唔買番架車呀?香港地點可以冇車傍身?我仔仔上個禮拜買左架啦,六七萬啫,你儲一陣都有啦,日日聞住人地番工放工個陣臭汗味好咩?」我笑左一笑,唔係我比貼士你仔仔買股票,你覺得佢會捨得買車?當然我冇講出黎,而佢呢個問題我可以咁答,撘地鐵都撘左咁多年,已經冇咩所謂,慣撚哂,加上我本身鍾意做運動,唔怕汗。

只係每次見香港人挨生挨死,係地鐵到好似沙甸魚咁逼黎逼去,撞黎撞去,番工放工咁就完左一生,唔知點解,我個心有啲揪住揪住咁,覺得佢地好似奴隸,犧牲自己嘅生活,令有錢人可以享受佢地自己嘅生活。

呢個情況其實同林奕匡首高山低谷入面講嘅差唔多︰「你快樂過生活,我拼命去生存,幾多人位於山之巔俯瞰我的疲倦。」不過,呢個就係資本主義社會嘅本質。

感情方面,我雖然有錢,但係大學之後,已經冇再拍過拖,當年有師兄同我講︰「出左黎社會做野,識嘅人已經唔會係完全真心想同你做朋友,接近你一定係有目的,一係Sale野,一係想擴展Network,一係貪你有錢,所以最好Grad前溝番條女,樣已經冇咩所謂。」佢一副睇透世事嘅神情,落寞到好似謝霆鋒叼住支煙,望住個海咁,分別只係佢冇咁靚仔。

師兄講得啱,我未發達之前都識過兩三個女仔,一開始幾好傾,覺得佢地都幾純,曖昧過一排,自問幾有發展空間,但我一提過自己住公屋之後,佢地就消失哂,佢地唔會直接講出黎話嫌棄你,但總之會忽然間唔再覆Whatsapp,唔再聯絡,我只可以同自己講寧缺勿濫。

之後撞番個師兄,佢話︰「Ibanker,大把女啦你,幾時結婚先。」我笑左一笑,Ibanker又點?特首都仲係姓梁,樓價高到我以為地產商賣緊金磚頭,一間500呎嘅普通單位要成千二萬,我買得起咩?

我本身無父幹,家用洗費通脹各樣野加加埋埋,仲要做多十年先儲到首期,啲女邊有可能等我咁多年?如果十年後我有首期啦,但係飛左佢,咁佢啲青春點算?所以我好明白,佢地都係直接搵個本身已經有樓嘅男人最實際,你可以話人情冷暖,虛意假意,不過現實就係咁。

不過點都好,金融地震改變左一切,我而家已經好有錢,買埋屋比屋企人之餘仲有大把剩,我度左個穩穩陣陣嘅portfolio,然後扔左一舊錢落去投資同收息,賣埋自己層樓之後就拎舊錢去旅行尋找人生意義。

我唔係講笑,真係想尋找人生意義,錢我已經有,女我亦唔稀罕,亦唔想特登追一個,我希望等緣份,所以生活不免變到無咩趣味同意義,我唔想日日只係部電腦面前炒股,股票市場某程度上係個zero-sum game,有人賺就有人蝕,我想積番啲陰德,而且我啲錢都已經夠洗。

你可能問我,生理需要點解決?唔通咁有錢仲要自己打飛機,定係你會叫高級雞?我雖然無女,但唔洗叫雞都可以搵到生理快感。

我每去一個地方,都會逗留一排,短則十幾日,長則兩三個月,總會遇到一啲當地嘅單身女仔,我地會食幾餐飯或者飲下咖啡,傾下計,我打扮同唔打扮個陣,個樣可以差好遠,唔打扮係平民一個,但梳個頭茶少少髮泥就會變靚仔,自己做開Gym身型亦唔差,所以唔難令人有好感。

我唔係抱住想扑野嘅心態去識人,但部分的確會主動聊我扑野,我都有性需要,但抱住寧缺勿濫嘅原則,我會同佢地講︰「扑還扑,無感情。」呢六字真言陪我幾乎環遊左半個地球。

識幾日就扑點算係寧缺勿濫?其實我心目中嘅寧缺勿濫係指感情方面,唔係扑野方面。我寧願無女朋友,都唔想亂咁搵一個女朋友番黎辛苦自己辛苦人地,至於扑野,安全就得。

美加法意英日瑞俄等等等等,我幾乎都試勻哂,當年中學同大學分別都識左一個女朋友,但都係冇扑到,所以我仲係未試過港女,而家諗番,都覺得幾好笑,但我諗同日本妹差唔多掛,話哂日本本身都係中國嘅,好似係。

就係我尋找緊人生意義個陣,呀哥話就快要結婚啦,於是我即刻撲番香港,呀哥結婚喎,一世人只有一次,應該係掛,所以我好櫈佢開心。

但更開心嘅應該係佢未來老婆,佢地一齊左四年幾,本來一年前仲話出現感情危機,兩個人有啲唔夾,但係我發左達買左層樓比呀哥之後,呢個危機自動消失左,呀嫂嘅幾年青春亦都冇白費到,你話佢開唔開心?

番到黎香港,呀哥要番工,所以結婚嘅事例如訂酒席、搵MC,設計粉紅色炸彈,買餅卡之類,唔洗佢親自做嘅都比左我做,一來我唔介意,二來呀嫂指定話要我跟,話我有腦有眼光,其實大部分野都係佢話事,我只係負責埋單找數。

一世人兩兄弟,我同呀哥細細個個陣好窮,咩都兩份用,錢兩份洗,包兩份食,我發達之後,佢都唔會成日問我攞錢洗,希望靠自己,所以我而家一啲都唔介意,甚至好榮幸有呢個出錢出力嘅機會。

就係呢日睇完酒席之後,突然收到個Whatsapp,中學Group個班花話不如ReU,其實ReU呢個字係中文中學入面本身無人講,係會講︰「幾時再約出黎唱K打機啊屌你?」但上到大專之後,人人都用ReU呢個字,用到濫哂,好似重聚唔叫ReU就唔無咁有Feel咁。

有時出街撞到佢地都會話︰「喂,好耐冇見,你近排點呀,幾時成班同學出黎ReU先?」雖然都係約出黎見嘅意思,但硬係覺得有啲唔同。

不過呢樣野都算啦,聽得明就得,重點係仆佢個街,唔知係咪因為班花約人嘅原因,本來個Group不嬲都冇咩人應架啦,今次竟然好多人都話去,足足有二十條友,男女比例差唔多,我閒人一個,冇佢地咁忙,所以都答應左。

唔知係咪因為冇野忙嘅關係,我開始變到好興奮,好期待,除左當年一班踢波打機嘅老死軒少、俊哥同龍爺仲有聯絡見面之外,其他人已經十年冇見,隔左咁耐,大家都二十七八啦,到底會變成點?

當年寸柒柒果個肥仔而家仲係咪咁肥咁寸?班花個樣有冇變?有冇人已經結左婚?而我嘅初戀女朋友張芷怡嘅近況又點?我地仲係好朋友,間唔中有聯絡下,尷尬已經冇乜啦,只係有時深夜訓唔著,諗番起同佢嘅往事……都幾令人婉惜,唉,算啦,已經過去去,聽講佢近排仲搵到個好好嘅男朋友,我仲可以婉惜啲咩?學鍾鎮濤話齋,就讓一切隨風。

班花叫李卓玲,大家都叫佢做LingLing,我同佢唔係好熟,只係知佢份人都唔算壞,靚得黎唔串唔收兵,應該幾係高登仔杯茶,不過身材麻麻,成績亦唔係幾好,所以背後男仔叫佢花瓶,一來佢樣睇得,但讀書唔得,二來花瓶有歧義,花平。

佢係今次嘅搞手,話23號食,會Book諾士佛臺一間餐廳,要大家confirm一下。我唔係發達之後就亂洗錢、唔知金錢概念嘅人,所以講真,間野算係幾貴。

比著以前,呢間野可能一個晚餐只係一百幾,而家變做高尚地區,至少都位位四舊水埋單,陣間有人甩埋底就仲貴,加上隔離就係酒吧,比人拉去飲酒可能又洗多三四百,我本身係Ibank做個陣都叫有能力去,但其他人冇咁嘅收入又點會咁捨得?

果然一講諾士佛臺四個字,啲人開始潛水,直情機都唔應,扮哂忙咁,本來廿個話要黎架,而家班花出一招就cut到得番十二個。

其實係中學個陣,如果有人覺得間野貴,係會出聲講不如食平啲啦,但而家大家都唔出聲,本身好想見舊同學、追溯番以前青春回憶嘅人,都寧願失去呢個機會而唔肯示弱。

其實啱嘅,大家大個左,話就話成年人成熟左,識得妥協,但其實好多時睇面子睇得重左好多,一時怕人背後話你窮,一時怕人話你咁樣做野係想出風頭,乜乜柒柒,到底係成熟左定係已經細膽左,冇左自己本身嘅想法?定係拋棄左自我就叫成熟?

算啦,係我咁得閒唔洗搵食先會諗呢啲無聊野。隔左半個月,去到23號個日,我一件淨色T一條老牛上陣,鞋係新嘅,不過係雜嘜牌,早幾日前我係街見幾靚又幾平,所以幫襯下街坊小店。我戴埋副con,gel埋個頭整到靚靚仔仔先出發。

班花怕大家唔識去,係個Group到post左google map出黎,叫大家準時七點半到。我可能太得閒,竟然早左半粒鐘到,講起又講,而家啲人嘅時間觀念又係幾有趣,遲到係奉旨,準時係恩賜,早到係on撚9。

譬如約人八點打波,遲兩三個字都算,因為我自己忙起黎個陣都會遲幾個字,但有人可以九點先到,仲要唔撚say sorry,好似冇咩事,當大家冇左佢都得咁,如果你係咁唔重要嘅話我唔撚約你打波啦,我同街人打得啦,就係重視你先約你條仆街呀。

有時有啲好有heart打嘅FD會早半個鐘去自己射下波,等到大家黎到鬥波個陣自己表現可以好啲,我真心好佩服同欣賞,自己有時都早到兩三個字陪佢,因為我同佢地一樣,讀書個陣打波嘅火未熄。

但有次聽到另一個成日遲到嘅FD問佢︰「你次次咁得閒早到嘅?我忙到仆街呀。」我真係火都黎,跟手格到佢成晚射唔撚出。

我個陣真係好嬲,咩叫咁得閒咁早到?你估佢冇野做?但大家約實左個時間就要盡量準時架啦,我做Ibank,秒秒鐘幾十萬上落都未出聲,你條旦散咁撚多嗲?不過我份人有個好處,幾大量,嬲一陣無事,之後都係攬頭攬頸,仲叫佢咪再成日遲到。

Hea下Hea下就到七點三,我係餐廳門口條街到行左一陣,一個同學都見唔到,呢樣野係大學已經開始明白,唔遲點扮忙?唔扮忙點話比人知你有出息?話哂都香港地,大家都要忙住搵食,唔忙係因為你搵唔到食,係咪咁講先?

算啦唔講,因為我見到一個人,班花李卓玲,佢仲係幾靚,好明顯係好細心咁打扮過先出黎,一個清淡妝,小短裙,只係兩頰生左少量點點,冇青春少艾個陣咁活潑可愛,不過二十七八都算係咁啦。

李卓玲都見到我,大家行到餐廳門口,佢問︰「呀歸你咁到早嘅?」「你都係呀。」「我搞手要早啲黎拎位啊嘛,驚遲到比人鬧呀。」「班花喎,邊個咁鬧你呀?唔驚比人打死?」「咪講笑啦。係呢,你近排點?聽講你係Ibank做?」

近排點……呢個問題ReU一定會遇到,如果你過得唔係幾好,最好一早預備定點答,因為冇人預你講自己嘅慘事,最差都要答︰「ok啦。」

我本人就比較與眾不同,一早預備左份稿背熟左,因為我唔想比人知我發左達,我話︰「冇做Ibank啦,而家仲搵緊野做。」唔知嘅人仲以為我被人炒,失左業,但其實我都冇講大話,我係搵緊野做呀,搵緊自己想做嘅野做。

傾左一陣,先知佢而家係一間中型公司做marketing,我諗做左咁耐佢應該都有兩萬幾一個月,冇讀U黎講算ok啦,不過呢幾年通脹西利,啲錢愈黎愈唔見洗,養埋屋企人就辛苦少少啦。

佢又問我︰「你而家住邊?咁快出到黎嘅?」我答︰「我仲係住葵涌個邊呀,咁多年都冇變過。」其實我之前層樓係去旅行前賣左,而家租緊葵涌一間600呎嘅私樓住住先,不過我講到好似我仲住係以前葵涌間公屋咁。佢哦左一聲,話︰「差唔多啦,入去啦,我諗佢地冇咁早到。」

我地拎左位之後一直等班友仔,等到七點七,佢可能見我無咩野講,成個毒撚咁,所以又主動問︰「你拍拖未?你都就快成三十啦,拍得黎都要諗埋結婚。」我話︰「冇拍呀,不過我呀哥真係真快結婚。」佢好似臉色變左一下,叉開話題︰「恭喜哂喎,我問下佢地到未先。」拎部電話出黎禁禁禁。

「咁你呢?拍緊拖?」我問。我唔係想溝佢,只係純綷好奇。佢笑住咁話︰「冇呀,邊有人追我呀。」「你都冇人追?會唔會係眼角高呀。」我以為佢問得我有冇拍拖,佢自己一定有啦,而且突然約人出黎,好可能係派帖,點知兩樣都唔係。

隔左一陣,啲同學陸陸續續黎到,有個肥仔叫呀強,一見面就話︰「咦,呀邊個邊個,好耐無見喎,喂,邊個邊個,你Fit左喎……」乜乜柒柒咁,世界仔到不得了,似乎好有Network,不過見佢手上面戴住隻俗氣嘅金錶,我諗佢啲Network應該主要鋪左係大陸。

隔左一陣,張芷怡到左,我地第一眼就見到大家,笑左一笑,佢好自然咁坐左係我隔離,好似老朋友一樣,我地冇好似其他人咁不斷喧寒問暖,因為佢都幾熟我,當然佢都未知我而家好有錢。我見到佢中指上面有一隻訂婚戒指,唔知點解個心酸左一下,先發覺其實自己應該櫈佢高興。

七男五女,大家到齊開始食野傾計,不過似乎冇以前咁暢所欲言,有時問起大家職業,都支支吾吾,以前花名叫小b嘅人就咁答︰「我都係做番個行啦。」其實大家都唔知佢講緊邊行,不過睇佢打扮唔有錢得去邊。

之後軒少同我講番,佢之前係快餐店撞到小b,佢做緊經理。雖然個名係經理,但係大家都知咩事,係香港的確唔算係咩出人頭地嘅職業。有時就算你搵得多過中環嘅上班族,但你二十八歳仲屈係間快餐店到,啲人都係覺得你比唔上一班係中環番工嘅OLOB,有時面子仲大過錢銀。

呀健被人問個陣就咁答︰「我做緊Engineering方面嘅野。」範圍大到你估一百次都未必估得中,做車行維修又得,做地盤工程又得,Financial Engineering又得,乜乜柒柒,總之要你自己估,不過大家都知點解呀健唔肯直接講出黎架啦,所以都冇再問深一層。

突然間肥仔強問︰「咩Engineering?邊間公司?我都係做Engineering 方面架喎,我係大陸幫人搞金融投資,你呢?」大家都呆左,估唔到肥仔咁唔識做,仲要問落去。我諗佢係想呀健出醜抬高自己,真係幼稚左少少。

呀健話︰「我……我係地鐵到做緊見習工程師,因為我近排轉工,所以……」肥仔強話︰「哦,明白明白。」擺到一副好體諒咁嘅表情。唉,呢個情況我都係去個廁所舒緩一下神經,如果唔係我驚會出手打人。

呢間餐廳收得貴都係有原因,除左野食同環境唔錯之外,廁所都裝修得好靚,通風冇臭味,環境又闊落,去都去得舒暢啲。

就係我出廁所嘅一刻,聽到外面有人細細聲咁講︰「估唔到呀健咁大個做見習生,唔通真係The Intern咩。」另一個女仔話︰「你睇個肥仔,真係估佢唔到,做緊金融。」「佢成晚望住你,好似對你起痰呀,上啦!」兩個女仔笑到恐龍咆哮咁款。

呢兩條八婆係中學已經串串貢成日講事非架啦,估唔到而家都係咁。我番埋去,肥仔強又問我︰「係呢呀歸,你做緊邊行?」張芷怡話︰「我知我知,佢係Ibank做。」啲女仔幾乎嘩左一聲出黎,個樣幾驚訝,尤其係頭先廁所出面個兩個八婆,好似想食左我咁。

肥仔講︰「你係叻仔嘅,睇幾大盤數呀?」我話︰「我冇做好耐啦,我呢啲小人物,公司冇左都唔志在啦,仲搵緊工呀,你有咩好介紹先。」我嘅語言藝術唔錯,搞到人人都以為我被人炒Q左。

肥仔聽我咁講,對眼好似發光咁,起勢咁介紹佢公司啲職位,咩Consulting Manager,Operational Service Executive,乜乜柒柒,其實我問佢個一句只係客氣說話啫,唔洗搞到開Career Event咁掛?不過有幾個女同學就好似幾受落咁囉,問左問右,當埋自己係黎見工咁。

傾多一陣,大家食完野,準備埋單走人,位位盛惠七百六十,比想像中仲要貴,主要因為肥仔開左枝幾千蚊嘅紅酒,跟住問大家介唔介意,無人出聲反抗,就唯有夾埋份酒錢,我無咩所謂,呀健佢地就慘左啲,唔飲都要夾。

時間差唔多,呀健、芷怡幾個人話要番屋企,聽日番工,我正想送芷怡,點知肥仔提議去飲酒,話咩黎諾士佛臺唔飲哂即係番大陸唔帶回鄉證,唔通呀嘛。我覺得唔打柒肥仔強就真係講唔通啦,但係理智嘅我冇咁做到。

最仆街嘅連班花李卓玲都去,呼籲大家一齊飲。其實佢成晚mark實左少鋒,細聲講大聲笑,旁若無人咁,主要都係想同少鋒飲啫。少鋒佢係打政府工,月入我諗都唔少,而且穩穩陣陣,可以有津貼買樓,Facebook大大隻字寫住單身兩個字,都叫做荀盤黎。

軒少有家室,定力高,冇受呢個魔女影響,一食完即刻走左,攔都攔唔住。呀健本來都想走,但比肥仔強拉住左係咁傾呢樣傾個樣走唔到。

其實我都想走,因為今晚我睇到嘅大部分都係虛偽造作,好難頂,造作嘅仲要係一班中學個陣純真相處嘅同學仔,社會嘅影響力好大,咩毋忘初衷,講就易,做就未必做到啦。

不過我無走到,因為芷怡都話要去,佢本來都幾堅定,但望左一下手機,好似眼濕濕咁,話要去埋一份,我見佢有啲唔妥,於是跟埋去,其實佢咁大個人,根本唔需要擔心咁多,不過唔知點解我總唔好放心。

我地去左間唔算太多人嘅酒吧,肥仔一坐低就叫酒飲,但望住Menu眼光光咁,好似唔多睇得明,隔左一陣先問有冇高粱,幾個同學都笑左出黎,但其實酒吧的確係有,只係少人叫,都冇咩值得笑。

其他人都係求求其其點,李卓玲好似唔多去酒吧,問左少鋒一陣先叫左杯Cosmopolitan,少鋒就要左杯dry Martini。芷怡問我︰「喂,飲咩好?」我話︰「你飲果汁算啦,陣間醉左又麻係煩。」「唔得,我今晚要飲酒。」堅決到咁唯有叫杯Pina Colada比佢,等佢以為自己飲緊酒其實似飲緊果汁多啲。

我本身唔多飲得,雖然唔會醉,但係一飲塊臉會好紅,全身亦都會發熱發紅,咁多年都係咁,愈多酒精愈紅,所以飲啤酒算。

芷怡飲左淡酒,眼淚係個眼邊到浪下浪下,好似想喊咁樣望實部手機,我問佢︰「咩事?」佢突然額頭僕左落我膊頭到,細細聲咁喊左出黎。雖然我地坐圓台,但大家一堆一堆自己傾,加上燈光暗淡,所以冇人留意到芷怡喊緊。

我知佢喊一定係因為家人或者男朋友,被人炒嘅話佢會睇得好開,東家唔打打西家,根本唔會喊,但如果係比人飛嘅話就唔同,東家唔要,冇得話搵西家就當無事,因為你擺左感情落去,唔係好似雲佩斯咁話轉會就轉會。

但如果係屋企人出事,佢唔會仲係到借酒銷愁,所以我問︰「男朋友?」佢點左點頭,但好似唔多想講咩事。我話︰「不如番去啦,出左去再講。」佢點左點頭。我同大家講話夜啦,收皮啦。

點知肥仔同芷怡講︰「我送你?我有揸車黎。」咁撚猴擒,好彩芷怡唔係好似普通港女咁,靚車就上,有錢仔就屌,所以拒絕左,同我一齊撘地鐵番去。

我地一路行去地鐵站,一路傾,先知原來又係土地問題。佢本身同男朋友傾好哂左話出年結婚。話說佢男友本身有層400呎嘅私樓,兩個人住唔算大,但都叫啱啱好仲有位生多個B,本來一切盡在掌握中,雙方家長都同意左,連極難搞嘅芷怡老豆都開哂綠燈。

之後佢男朋友嘅細佬借錢炒股炒燶左,遇著班追數佬你真係破產都唔掂,比人貼街招、塞鎖匙窿,差在未淋紅油,不過已經搞到佢地日煩夜煩,出入比街坊鬧影衰大家,佢老豆老母唯有勸個大佬賣左層樓,幫細佬還債,層樓本身係佢老豆老母後生個陣賺錢買,留落黎比佢嘅,可以點Say no?

話就話樓可以賣到好貴,但借大耳窿利息高到仆街,加埋追數佬啲水腳費同追數費,只係啱啱好。於是債就還完,樓就冇左,佢地雖然出左黎做野幾年,男嘅都三十歲,但係本身有層樓,所以冇諗過點儲錢,兩個人加加埋埋半份首期都唔夠,結婚?五六年之後或者可以啦。

但芷怡都二十七八,每個女人都想係仲有青春嘅時候著婚紗,因為咁先係最靚,佢愈講愈喊得西利。我都唔知點安慰佢好,同佢講結婚唔洗買樓?佢肯佢老豆都唔制。叫佢等多幾年?女人嘅青春比男人寶貴得多,年華一瞬即逝,點等?等到三十幾個陣如果同男朋友分左手又點算?

一切一切嘅未知數令芷怡好傷心,我望住佢隻眼喊到紅哂,啲眼淚係咁流,我送左佢番屋企樓下。走個陣望住佢瘦弱嘅背影,一個女人仔,點頂到咁多野?我好心酸,雖然大家嘅戀情已經係十年前完左,但根本冇一個男人係可完全放低過去。

就好似女朋友唔係處嘅話,男人一定介意,唔介意只係因為唔夠愛或者純粹係個男人唔會表達出黎,介意程度低啲。但心入面總有一啲時刻,係會諗起自己嘅女人係另一個男人胯下呻吟叫床,享受人生至樂,個一種滋味一定唔會好受。

女人專一但係絕情,而男人多情但係長情,我好清楚自己仲係好鍾意佢。係呢一刻,我做左個決定,我要比錢佢買樓,但係我好明白,佢係無功不受祿嘅人,我就咁比錢佢一定唔肯要。

而且一個男人正正常常點會無啦啦比錢一個女仔同佢男朋友買樓結婚?就算好FD都唔會咁做啦,我怕佢以為我另有目的,想用錢黎乘虛而入,當佢係貪錢嘅女人,所以冇即刻講出黎,我要從長計議。

佢本來男友層樓係東涌,又近番工又近屋企人,東涌一層500呎嘅樓都唔平,我考慮過,一千萬有找,但點將錢送比佢係一個好大嘅難題,我希望係佢唔知道嘅情況下比佢,我唔想佢覺得欠左我,唔想佢報答我,亦都唔想佢男朋友難受。

係香港,突然有咁多錢可以有咩原因?六合彩。我決定左,我要買中六合彩比錢佢。下期六合彩六百萬,中左實夠芷怡同佢男友買樓。話說通脹乜都加,係六合彩唔加,都算好野,不過亦因為咁而更多人中伏。

我Whatsapp芷怡︰「買六合彩好冇?中左唔洗愁。」佢回覆︰「唔洗啦,果晚多謝你呀,我而家冇事啦。」咁易冇事唔會喊得咁西利,我話︰「買啦,賭錢唔一定要中嘅,細細地買一兩注,咪當用走啲衰運囉。」「好啦,買十蚊,number你幫我諗,遲下比番錢你。」「好。」

我當然唔會只係買一注,我賣左一半股票,用左足足七千萬,仲要逐注逐注去買,買哂四十九個 號碼嘅組合,我打比個馬會話要買逐條飛,買哂佢,個職員問我係咪痴左線。七千萬換六百萬頭獎的確係白痴先做得出,但諗深一層,我唔係正正就係一個白痴咩? 「其實詐蠢,全為你付出的機智。」

當然我冇唱比個職員聽,我話無錯架啦,我比個AC佢幫我買,佢就收左線。幾日之後,我中左六合彩,但 係仆佢個街,唔知咩運黎,竟然兩注中,分得三百萬……係就係夠比首期,但之後供樓一個月至少計埋息都要兩皮幾野,供到你退休,加埋佢地都有雙親要養,莫講 話生仔,連想去下日本都未必得。

我唔想佢咁辛苦,營營役役,就咁比左個人生地產商,於是同佢講話唔中,佢都冇乜野,仲話下次比番十蚊我。我問佢近排點,佢都係答冇乜野,愈係咁愈有野。

我決定同芷怡講你不如買多注轉轉運啦,佢都冇咩所謂。於是我用多七千萬,冒著比職員鬧多次嘅風險,買多次必中六合彩。今次終於正常番啲,一注獨中,頭獎八百萬。

見到一注中個刻我跳左起身,八百萬呢個銀碼真係Fit哂!一來八字係傳統中國嘅幸運數字,二來八百萬係東涌啱啱好可以買到層幾百呎私樓,話唔定仲有幾十萬剩底。

我興奮左一輪之後拿拿臨打比芷怡︰「芷怡!」「咩事?」「你中左六合彩!」「吓?安慰獎?」「哈哈!係頭獎呀!」佢隔左一陣冇講野,又講︰「咪玩啦,我而家忙緊陣間開會啲野,遲下先傾,拜拜。嘟嘟嘟……」

而家科技進步,買六合彩係唔洗出飛,馬會AC有哂紀錄,啲錢一攪完珠已經入左落個登記左嘅銀行戶口到,所以我銀行戶口即刻多左八百萬。

但我特登print番中獎個張飛。我揸實張飛,開左張支票,去左芷怡公司樓下等。

我諗住比個驚喜佢,所以冇同佢講會黎,等到七點幾,佢終於落黎,應該啱啱O完T,睇個樣咁灰都係冇補水個隻。我走左上前,大叫︰「芷怡!」芷怡呆左一呆,話︰「你做咩係到嘅?」呢個時候一個幾斯文嘅中年男人走左過黎,話︰「呀怡。」之後行左過黎,企左係芷怡隔離。

個男人問︰「佢係?」芷怡話︰「佢係我中同,叫陳天歸。」跟手指住個男人又話︰「呢個我男朋友Martin。」我伸手出去同佢握左握,客氣左一番。Martin捉實芷怡隻手,話︰「我地去食飯,一齊?」

我諗佢對我好似有少少敵意,都係嘅,我外表的確係會令人有危機感,不過我都唔介意,只係話︰「唔啦,我食左野。今次想還番啲野比芷怡啫。」遞左張飛出黎。

芷怡呆左,問︰「做咩?」「你托我買嘅六合彩,真係中左。」我塞左張飛比佢睇,佢尖叫左一聲,開心到傻左︰「真係中左!真係中左!我地一人一半都有四百萬分啊!YeahYeahYeah!」Martin都呆左,唔係好識反應。

我見佢咁開心,我覺得好滿足,拎張支票出黎,同佢講︰「我今期冇買呀,得你中左咋。」佢見到上面係八百萬,唔敢接,話︰「你叫我買但係自己冇買?」「我自己不嬲有買開一條飛,買左幾十期架啦,所以呢注係你架,雖然多錢,但我都唔好意思要,畢竟唔係我嘅。」

我見佢唔肯接,塞左張票比Martin,Martin接過張票,話︰「你都幾好人喎,比著係其他人,幫人買中左唔吞哂都至少分一半啦。」「我自己玩股票,好信邪架,如果我拎左啲唔係自己嘅錢,最後一定嘔番哂出黎,話唔定蝕凸。」

我講左聲拜拜,轉身就走,聽到Martin細細聲咁問芷怡︰「你個FD好有錢架?有八百萬都唔貪。」「佢的確係一個好人黎……」「有左呢八百萬,我地有錢買番層樓啦,之後結婚生仔……」「嗯。」

我番到屋企,成件事搞掂哂,人都鬆哂。隔左一排,我見戶口個八百萬已經過走左,得番五十幾萬,係我全副身家。

我冇講錯你都冇睇錯,我而家成副身家其實得番銀行呢五十幾萬,之前買兩次必中六合彩要億幾,我賣哂股票資產加埋第一次頭獎個三百萬真係幾乎啱啱好,啲錢比哂馬會咁濟。

而家租緊嘅六百呎私樓係短期租約,所要都成兩萬三一個月,加上有幾條呀哥結婚嘅數黎緊就要找,我諗已經冇能力住落去,於是完左呢一個月,我就執齊野,番左去老豆老母到住。

佢地唔知我已經冇哂錢,以為我想孝順佢地所以番黎一齊住,其實都啱,佢地年紀都大,呀哥有個未來老婆,我就單身一個,陪下兩老都係好應份。

隔左兩個月,找埋幾條數,我戶口得番二十幾萬,係時候要投入番呢個社會嘅大齒輪入面。如果我做番Ibank,一個月十萬應該都唔難,但係我唔想再成為金錢嘅奴隸,浪費時間係一啲自己唔鍾意做嘅野上面,我要做自己鍾意做嘅野。

我鍾意做嘅野唔多,得打波踢波、寫野打機,但我呢個年紀,再練番球技已經遲左,況且係香港運動員嘅出路同支援實在太少,好似鳳凰計畫咁,只係比班仆街抽水自High以為自己做左野,而近幾年政府亦不斷拆球場起樓,香港已經冇運動。打機我細係好鍾意嘅,不過而家覺得好浪費時間,根本唔會令你得到真正心裏面笑出黎個種快樂,得閒玩下就算啦。

所以我決定寫文,埋頭苦寫,打算寫出一個令人拍案叫絕、驚天地泣鬼神嘅經典故事出黎,可惜當然唔成功啦,一來我寫得唔係幾好,二來香港文化衰落,已經冇咩人睇書,而家啲人小學個陣開始已經要讀勁多書,日日對住一大堆英文中文生字,個個眼鏡成寸厚,十幾年對住一堆書,想搵下娛樂個陣仲點會再睇文字?禁電話打下機唔好?

寫左一排冇咩突破,終於去到呀哥結婚個日。當晚我做伴郎,呢日等左好耐,見到呀哥臉上個種滿足,對婚後生活嘅冀盼出哂黎,我好開心,亦好羨慕,唔知我幾時可以有呢一日?

我認識左其中一個伴娘,叫Jancy,佢份人都幾好,成日主動Whatsapp我搞傾婚禮嘅事,叫做係近排嘅一個熟朋友,佢得22歲,聽講係大嫂個師妹黎,就快大學畢業,所以我只係當自己係大哥哥咁。完左婚禮之後,我地間唔中都有約出黎,有次就去左starbucks飲野。

我早到左一個鐘,帶埋部手提電腦,飲住凍朱古力寫故,寫左一陣,見Jancy係門口眼望望,我收埋部機,打電話叫佢入黎。佢今日唔知係咪故意,佢著得幾性感,白色背心仔,兩條黑色Bra帶,仲要露左少少事業線出黎,加埋一條熱褲,好青春少女,搞到我有少少邪念。

傾左一陣,佢講起搵工嘅煩惱,叭左係張台到,心口谷左條深坑出黎,話唔知CV點寫。我差啲想講︰「你影張相上去,露條事業線,如果係男Hr實有Interview。」

當然我冇講,控制自己唔望佢個胸,講左少少自己嘅心得︰「總之資料唔洗多,一版起兩版止,清晰係最緊要,Hr唔係傻嘅,睇得出邊啲野係冇料到但係你吹到好大。」其實都係廢話。

講左一陣,佢問︰「聽師姐講你以前係做Ibank架?」唔通大嫂見我單身所以周圍同我宣傳?唔係點會無啦啦講我以前做咩?「係呀,做左幾年。」「咁你咪會識好多人?」「識少少啦。」「你可唔可以幫手Refer我?你知啦,而家競爭咁激烈,有人Refer點都好啲。」佢谷起面豬登,一副又可憐又可愛咁嘅款。

我心入面嘆左口氣,估唔到原來呢個妹妹仔接近我係有咁嘅目的,我唯有講番個事實出黎,話我無做好耐,佢好堅持咁話冇所謂啦,最多唔得啫。我見佢咁堅持,睇在大嫂份上,都唯有答應幫一幫手,寫左封Email比以前個呀head。

我一路都係佢頭馬,所以佢好相信我眼光,仲叫我番去做,我諗左一陣,發覺寫文都唔係自己嘅強項,加上近排窮困,於是應承左佢。而最後Jancy畢左業無幾耐都入左我以前間公司去做,只不過因為一啲事,我飲完呢杯凍朱古力之後已經冇機會再見佢。

佢走左,我飲完杯野,咁啱寫完最後一個故事。本來想走架啦,但係竟然撞到芷怡嘅男朋友Martin,撞到Martin都唔係問題,我竟然見到佢同一個女人前後腳入黎,坐係角落頭,個女人衣著仲暴露過Jancy,目測C cup以上,兩個人好親暱好甜蜜咁,攬頭攬頸。

我個刻好嬲,佢同芷怡應該明年就要結婚,點解身邊會有第二個女人?但即刻冷靜自己,話唔定呢個只係佢呀妹?佢家姐?但之後Martin竟然錫左落個女人到,個女人冇避開,同佢嘴對嘴錫左一陣。

仆街你對姦夫淫婦,我忍唔住,衝到Martin隔離,一拳車左落去,質問佢︰「呢個女人邊個黎?你咁樣對得住芷怡?」我打爛左佢副眼鏡,遺憾嘅係冇打到佢爆缸。Martin好似唔多驚,反而笑住咁講︰「你條仆街咪走呀,我報警。」

我呆左,本來以為佢唔會搞大件事,因為就算唔驚動雙方家長都一定會驚動芷怡。打人始終係刑事,心裏面有啲淆底,只係把口唔服輸,話︰「你個柒頭都咪撚走,我打比芷怡。」

佢一啲都唔在乎,話︰「打啦打啦,叫佢去差館搵你呀。」我屌佢老母,但佢講得無錯,警察好快黎到車哂我地三個番差館。

本身個差佬話︰「朋友之間打一拳啫,你地咪搞咁撚多啦,拉你地番去又要落口供,開fi佬,乜乜柒柒咁,握個手和解啦。」但Martin企硬話要告鳩我,如果警佬咁都唔做野一定唱出去同去投訴科投訴。雖然去投訴科冇乜用,但個差人見他咁有決心,唯有叫哂我地上車。

大家都去哂差館,落完口供,我交埋保釋金,出到去見到芷怡。佢喊得好勁,Martin同個女人講︰「你番去先,遲下再搵你。」「屌你老母見唔到芷怡係到?你仲話番去搵隻臭雞?」我前所未有咁嬲,幾乎想衝上去執多佢一劑,不過隔離兩個差佬禁住左我。

Martin唔理我,同芷怡講︰「你走唔走?唔走我番去先。」芷怡喊住咁衝左出差館,我追左出去,之後芷怡喊住咁講哂成件事出黎,我先明白原來係自己連累到佢地而家咁樣。

個日我比左八百萬佢地之後,Martin一路都冇乜野,仲好開心,點知有一日,Martin追問芷怡我嘅背景,先知原來我係芷怡嘅初戀男友,仲要知道我而家失埋業,亦都以為我住係葵涌公屋。

佢即刻好嬲咁質問︰「你係咪同佢扑左野?唔係中左六合彩佢會肯讓番個八百萬出黎?」原來佢覺得芷怡為左拎番中左六合彩嘅錢而同我扑野,比左帽佢戴。芷怡喊住口咁話冇,但Martin唔信。

當晚Martin趕走左芷怡,叫佢自己番屋企訓,唔想見到佢。後來Whatsapp仲話︰「你唔係上床哄佢,一個失左業嘅人會連揸到上手嘅八百萬都唔要?你到底同佢扑左幾多獲先拎番啲錢?你係愛我嘅就老實同我講。」我望住佢地嘅Whatsapp對話,嘆左口氣,呢件事的確係令人幾難相信。

芷怡用盡辦法解釋,甚至話如果Martin唔信嘅話死比佢睇,Martin先冷靜落黎,話︰「好啦,以後嘅事我唔計較啦,我地即刻買樓結婚。」芷怡以為自己終於哄番掂佢。

之後佢地兩個雖然一齊住,但已經唔係以前個種關係,Martin只係會同佢扑野,滿足完性慾就算,完全冇感情,咩都唔理,飯都唔會一齊食,出面仲識左啱先果個女人。有時仲帶個女人番去,要逼走芷怡,話︰「呢間屋係我嘅,我同你又未真係結婚,我帶邊個番黎唔關你事,你唔鍾意可以走。」

原來當初張八百萬支票雖然我係寫比芷怡,但Martin拎哂啲錢話佢去睇樓,睇啱就買,唔洗芷怡操心,點知佢偷偷地買個陣淨係落左自己個名,而芷怡有嘅只係一條匙,佢講哂啲野出黎,喊得好交關,我唔知點安慰佢,唯有講對唔住。

芷怡梗係話唔關我事,係Martin誤會左,不過我的確好不安好難過,見到芷怡咁慘,我攬實佢,同佢講︰「離開Martin,我會比更好嘅生活你,對你好好,唔會再比任何人傷害你。」係個一晚,我地一齊左。

可惜,我嘅諾言根本兌現唔到,我本來答應左呀head番舊公司做,一個月十萬,可以唔愁生活,照顧到佢芷怡好好。但之後我被控告普通襲擊罪,雖然認左罪,賠左錢,唔洗坐監,但係留左案底,公司已經唔肯請番我。我無怪人,離職短短兩年,番黎突然多左個傷人案底,邊個知我變成點?

呢個世代,啱啱畢業出黎嘅大學生平均仲係萬五萬六一個月,而我只係搵到份萬二蚊嘅寫字樓工,好彩芷怡搬左黎同我同老豆老母住,唔洗交租,生活都冇咩問題。老豆老母仲一啲都唔介意,好開心咁話多個新抱仔陪佢地,不知幾熱鬧。

我本來以為一切都好好,直到去芷怡屋企見家長……我以前同芷怡拍拖個陣,已經知佢老豆難搞,我地一齊個陣係中五,一路拖得好地地,點知升到中六佢老豆唔知發咩神經,無啦啦叫我地分手。

佢同芷怡講︰「你唔洗考DSE呀?上唔到大學冇哂前途呀!」又同我講︰「你呀,考唔到做醫生律師唔好搵我個女。」我就不嬲鍾意講事實,同Uncle講︰「咦?Uncle原來你都係醫生律師黎?唔知邊間醫院或者邊間律師行?我得閒可以買啲生果上去探下你。」

其實佢咪又係地盤佬一個,醫乜撚野生,香港九百萬人,個撚個都係醫生律師?呢啲老屎忽真係唔化。不過我講左呢句之後佢就趕左我出去,唔比我再見佢個女,日日check芷怡手機同電腦,見我地有傾計就鬧。

時日長左,我地都頂唔順,加上專心溫書,好自然就冇再搵對方,之後大家入左唔同U,隔左成年再聯絡番,就只係做番朋友。而家隔左十年,又要見佢老豆,唔知佢記唔記得我?

去到芷怡屋企,同以前差唔多,佢老豆老母個樣冇咩變,只係老左,但佢老豆似乎唔係好認得我,講埋叫陳天歸都唔記得我係邊個,但一食飯就黎料。

Uncle問︰「你做緊邊行?一個月搵幾多?」事無不可對人言,而且錢只要係靠自己搵嘅,乜野工都值得尊重,我直接講︰「我係寫字樓做文員,一個月搵萬二。」Uncle哼左一聲,全晚冇再問我野,只係最後同芷怡講佢唔會同意我地結婚。

芷怡好愛佢屋企人,要排名次我最多都係第二位,其實我都係一樣,家人係最重要。所以一段得唔到屋企人祝福嘅感情真係唔知點算。我地默默咁攬住對方,感受對方嘅體溫,我攬到佢好實,就好似呢一晚就係我地嘅最後一晚咁,無錯,我要當每一日都係最後一日咁過,我唔會亦唔敢放開佢,怕一放開左就好似十年前咁,再捉唔番。

有人可能講︰「第二日你咪又係要死死氣氣咁放開人隻手走去番工,扮乜撚野情聖。」對唔住,令你地失望,我第二朝就去辭左份寫字樓工。

我諗得好清楚,只有大疊大疊銀紙放係佢老豆面前,證明我有能力照顧佢個女,佢先會同意我地結婚,而一份萬二蚊嘅寫字樓工唔會令我做到呢樣野。

我怕芷怡擔心,係瞞住佢先偷偷地辭左份工,然後重操故業,即係炒股票。我而家得廿萬係身,可以點炒?一定要搵本錢,唔係嘅話好易一輸就翻唔到身,個陣仆街都唔掂。

我去左問呀哥,一世人兩兄弟,佢如果知我有急事,一定會借比我,不過佢好擔心,知我本身發達,應該唔愁錢銀問題,而家居然搞到要問佢借錢,一定出左大件事。

我唔講拎啲錢係去炒股票,只係同佢講我要少少啲錢同芷怡結婚,唔洗多,十萬就夠,呀哥即刻答應,話聽日比廿萬我,唔洗還。我好感動,發誓賺左錢之後一定會十倍還比大哥。

點知去到第二日,大嫂趁住老豆老母出左去飲茶個陣,突然衝左上黎,質問我︰「做咩無啦啦問你大佬借錢,仲要廿萬咁多,係咪撈唔掂?你唔係好有錢架咩?」我唯有講番個句︰「我要一筆錢結婚。」

大嫂繼續鬧我︰「冇錢你學咩人結婚?仲要問你大佬借錢?你估你大佬而家好有錢?我地兩公婆夾埋搵得個三四萬,第日仲要養細路哥,你堂堂Ibanker,十萬一個月啦,洗唔洗走過黎呃你我地啲血汗錢呀?」最後我唯有同呀哥講番,我唔需要筆錢啦,自己搞得掂。呀哥唔知大嫂上過黎鬧我,仲以為我解決左個問題。

廿萬……我而家得廿萬,而且冇穩定工作,已經唔可以好似以前咁問銀行貸款,按樓我係一定唔會咁做,唯有問以前嘅老死借錢,軒少、俊哥同幾個熟嘅大學朋友佢地夾夾埋埋都只係借到四五萬比我,佢地本身唔係咩有錢人,我唔怪佢地借咁少,反而好感激。

之後我去左問財仔借錢,半年後還Double,按慣例我比左屋企地址佢地,但我唔驚佢地第日搵我老豆老母麻煩,因為我根本唔會蝕錢,一定會賺番幾百萬黎娶芷怡過門。

我而家足足有二百萬,搵啱時機就入左市,點知三個月時間,雖然冇咩金融危機,但市場仲係極度不景氣,我買嘅幾隻股票全部冇賺過,反而平均每隻都跌左十幾個%,過左半年,放哂啲股票,得百七萬,反而倒蝕三十萬,我知道自己已經輸到一敗塗地,第一時間還錢比借錢比我嘅老友。

之後拎住百六萬去還比財仔,但仲差成百幾萬先夠數,佢地話五日內死都要死番黎,唔係仆硬街。個一刻,我覺得自己係個白痴,點解當初咁自以為是?股票市場邊有話贏硬?仲要借大耳窿,而家真係唔知可以點。

個晚,我攬住芷怡,佢見我好似有啲唔妥,問︰「你近排做咩?唔洗擔心喎,總有日會說服到呀爸比我地一齊。」我錫左佢一淡,同佢講︰「我一定會唔會令你難受,唔會令所有愛我嘅人難受。」芷怡笑左一笑︰「我知你唔會呀。」

第二日,我知道自己唔會再有能力扭轉局面,而最驚嘅就係比財仔追數,好似Martin個細佬咁連累家人連層樓都冇埋,我唔會咁做,於是去左申請破產,法庭可以保護我唔洗比人追數,但係日後所有收入除了四千五百蚊可以自用,全部都要用黎還債,根本已經毫無生活可言,但係我無後悔,呢個係對我家人同芷怡黎講,最好嘅選擇。

申請破產嘅一晚,老豆老母唔係屋企,芷怡話要親自下廚,係屋企煮燭光牛排餐同我食。枱上面係兩塊心型嘅牛排、兩杯紅酒、兩枝長燭。我聽佢話,著左最好睇嘅西裝,gel埋頭先坐低。

芷怡今晚梳左一個髮髻,一身黑色嘅薄紗長裙,係燭光嘅映襯之下雙眼一眨一眨,好似天上嘅星星一樣,笑笑口咁望住我,問︰「我煮得好唔好?我特登問個做西餐廳嘅朋友點整架。」

係呢一刻,我知道呢一生都將會欠左呢個女人,忍唔住流左眼淚。芷怡問我︰「做咩喊呀?煮餐飯啫,唔洗咁感動喎,我今日有好消息話你聽呀。」

我忍住眼淚,同佢講我地已經唔可以再一齊,我已經破左產。佢首先呆左,似乎想喊,但諗左一陣之後又笑左出黎,話︰「咪玩啦,破乜鬼野產呀,食野啦衰人。」

我好認真咁講哂成件事出來︰「我偷偷地問左財務公司借錢去炒股票,但係炒燶左,無辦法唔申請破產。」之後拎埋張破產申請表副本出黎。

佢一路聽,一路喊,雙手掩住塊面,係咁講︰「點解你要咁做?點解你要咁做?點解?」我都好傷心,一邊流眼淚一邊講︰「我只係想賺好多錢,等你爸爸知道我有能力照顧你,咁佢就會同意我地結婚。」

佢喊到個成塊臉都係淚水,坐係地下好傷心咁講︰「賺錢係咪一定要問人借錢?你知唔知今日呀爸同我講乜野?」「乜野?」「佢話佢已經諗清楚,我年紀唔細,如果遇到一個真心鍾意我,對我好嘅人,佢就會同意我地一齊。點解你而家……點解呀!」芷怡拎起個手袋,就喊住咁樣衝左出門口。

呢一刻,我好似比雷劈中左,呆左係到,只係不斷諗︰「我係咪聽錯,個天係咪要咁樣玩弄我?」破左產我仙都唔仙下,就算Uncle同意結婚,我都已經冇呢個能力。

如果我唔借大耳窿嘅話,過左今晚,我地可能已經去左註冊,攬住大家互相講我地有幾愛對方,要為對方生幾個小朋友。但一切嘅幸福畫面,係呢刻,已經全部變做虛無。

我好似痴左線咁,將自己僕係枕頭到喊,直到聲嘶力竭,喉嚨已經痛到發唔到聲。我由細到大,一遇到傷心嘅事個陣就會用枕頭焗住自己塊臉,然後好大聲咁嗌同喊,抒發自己嘅痛苦。對上一次咁做,已經係六七年前大學時期分手個陣。

呢一刻屋企冇人,我喊到成件西裝都係眼淚鼻涕,我從未試過咁傷心,覺得個心好似就快要碎咁樣。努力咁耐想得到嘅野,原本已經可以得到左,但因為自己嘅白痴同無能,將我地一生嘅幸福斷送左。

我辜負左芷怡,辜負左所有人。我竟然起左一個人生從未有過嘅念頭,自殺。我真係想一死以謝天下,但呢個時候老豆老母番左黎,見到我咁嘅樣,嚇到樣都變埋,係咁問我咩事。

我望住呀爸呀媽,喊得更加西利,將一切都講哂出黎。呀媽心腸好軟,聽到我破產即刻喊左出黎,話︰「唔得,我唔可以比你破產,我地賣左呢間屋佢。」我即刻話唔得︰「呢間屋寫嘅係你地個名,留比你地養老用,唔賣得!」呀爸比較堅強,諗緊點應付,但都話點都唔可以比芷怡走左去。

呀哥知道我破左產之後,本來想按左自己層樓幫我還債,撤銷左破產先講,但我冇接受到,一來呀嫂本身都好唔贊成,再嘈落去真係家變,二來我由欠街外人債變做欠自己大佬,即係破壞緊佢而家嘅生活,甚至破壞埋佢未來嘅打算,我唔想其他人幫我執手尾,自己闖出嘅禍好應該自己解決。

計埋息我計過,做番個文員仔一個月還一皮野都要還二十幾三十年,不過我冇介意,我仲有地方住,仲有屋企人,只要慳住洗,債遲早可以還清,但我最痛苦嘅係芷怡親手比我自己激走左。

就咁過左兩個月。有日我係中環放工,見到個天變左做紅霞咁嘅色,呢種顏色嘅天空芷怡係最鍾意,可惜我已經唔可以同佢一齊欣賞。係我逼完地鐵出閘個一刻,突然有個人叫停左我,係Martin,我無理佢,繼續行自己嘅路。

我本身好嬲佢當初咁對芷怡,但我自己又好得去邊?係佢最有希望準備迎接幸福嘅時候,係我親手將呢個希望扼殺,我有咩質格話其他人對芷怡差?我反而唔敢面對Martin,因為我已經無辦法理直氣壯咁鬧佢。

但Martin衝過黎截住左我,佢好似有啲唔同左,對我冇咁有敵意,佢話︰「我等左幾日先撞到你放工架,唔好咁快走,聽我講兩句。」竟然等左我兩日,唔知佢有咩急事?

我都好奇心起,問佢咩事,點知佢居然同我道歉,話佢當初唔應該懷疑我地兩個,好後悔,仲話好想追番芷怡。我唔知佢做咩突然有咁嘅轉變,但係而家對我黎講已經冇咩所謂。

佢有層樓有份工,同芷怡又有幾年感情,而家仲變番好,浪子回頭金不換,如果由佢去照顧芷怡,點都好過我呢條破左產嘅廢柴,所以聽到佢話想追番芷怡,我心入面都祝福佢地。

我番到屋企,見到門口有對陌生嘅女人鞋,唔通係大嫂黎左?我推開門入去,老豆老母唔係到,大哥大嫂都唔係到,只有一個人企係到望實我,呢個人竟然係芷怡。

我冇勇氣面對佢,唔知講咩好,講對唔住?如果講對唔住可以減輕痛苦,咁呢個世界就變得簡單美好得多。我唯有打招呼︰「你黎左呀?」「嗯。」

我唔敢望佢對眼,放底公事包,入房換衫,出到黎佢仲係企係到望住我。我問佢︰「你……係咪上番黎執走啲野?」芷怡係到住左好耐,走個陣有好多野冇拎。

點知佢突然問我︰「陳天歸,你想呃我呃到幾時?」「呃你?所有野我都講哂出黎啦,我的確係破左產,對你唔住。」

「我唔係指破產呢件事,你自己聽下。」佢遞部手機比我,上面有段錄音,我禁左入去聽……

「唔該我想買六合彩,要哂四十九個冧巴,同我出哂咁多條飛。」「又係你呀先生?上次已經買左一次全中今次又買?你係咪咁有錢呀。」「呢件事關乎我朋友嘅終生幸福,我知辛苦你架啦,幫幫手啦,最緊要同我出哂咁多條飛。」「得啦仆街。嘟嘟嘟……」

我臉色變左一變,問︰「呢段野你點得番黎?」「呢段錄音而家係Facebook瘋傳緊,有個人話佢做馬會,幫人買六合彩個陣有個痴線佬叫佢買哂四十九個冧巴,點知無FD信佢,之後佢又遇多一次呢個痴線佬,仲偷埋段馬會錄音,post出黎做證據,證明佢冇講大話,呢個世界真係……真係有肯用七千萬去換一個頭獎嘅白痴!」佢講到後尾已經鼻哥都紅埋,一個好想喊嘅樣。

唔怪得Martin無啦啦同我道歉,原來都係因為呢段錄音。但我同佢講︰「咁又點?而家我已經……已經破左產,再唔係當日果個可以用七千萬買頭獎嘅……有錢人。」但講完呢一句,我已經眼都紅埋。

芷怡突然衝過黎攬住我,同我講︰「你為左我嘅幸福,由有錢變到冇哂錢,為左我嘅幸福,再由冇哂錢變到欠債破產,但你知唔知道,我最想要嘅幸福……我想要嘅幸福好簡單,就係一個愛我錫我,為我不顧一切嘅男人。」

我眼淚好似決堤咁,停唔到落黎︰「我破左產,之後嘅生活會好辛苦,我……」「我唔怕辛苦,只要有個人係我辛苦個陣錫我,講笑話我聽,陪我睇電視,我已經好滿足。」我唔知前世積左咩陰德,遇到一個咁好嘅女仔。

「而家我地之間得番一個問題咋。」「乜野?」「就係你肯唔肯比我陪你行落去,一齊面對所有野。」我抹乾眼淚,好堅定咁答佢︰「肯,我肯。」雙手將佢攬到好實,係呢一刻,我覺得我係全世界最幸福嘅男人。

-完-