前排老婆身體開始差，起初以為係普通傷風感冒，點知睇極醫生都唔好，最後病情愈嚟愈惡化。我阿媽就帶咗個老師父嚟我屋企睇，順便幫我地睇相，老師父話我老婆中咗降頭，要醫好佢，我需要有兩個老婆。
起初我覺得好荒謬，但眼見老婆愈嚟愈辛苦，我真係咩方法都需要試。但喺香港法律上係實行「一夫一妻」制，如果再娶多個係會犯法，最後老師父建議我冥婚。
我聽到「冥婚」之後，我反而無咩咁抗拒，因為我知道我應該做下啲儀式就當娶咗老婆，對我嚟講應該無傷大雅，反正屋企又唔會多個人，而老婆亦都唔介意，於是我就開始積極咁投入呢場「冥婚」，希望做到足，幫到我老婆醫好個病。
老師父同我講解所謂嘅冥婚，其實可以叫配骨、陰婚、鬼婚、靈婚，係一種亞洲嘅民間習俗。通常為生前訂咗婚但已死或者未訂前已死嘅情侶而設，目的就係希望佢地可以結婚，完咗佢地心願，亦可以喺另一個世界入面以夫妻之名生活落去。
所以我需要一條女屍體作為我老婆。
喺香港係唔容許賣買屍體，所以我同家人聯同老師父一齊返咗大陸睇下賣屍市場，諗住執返一件女屍作為冥婚對象。
「點解要返中國搵?」雖然我知道中國地大物博咩都有，但都好奇老師父點解選擇中國嚟搵。
老師父就話中國不嬲都好盛行冥婚呢樣野，而且每件屍體都有價有市，加上每一日都有大量人死亡，基本上屍體呢個供給係大把「貨源」，而且價錢比較便宜，攪起上嚟都比較易入手。
我地先到陝西省西安市，搵咗一間專做冥婚嘅公司幫我地安排。原本我以為呢啲公司無論地點同營運方式都應該好似行偏門咁神神秘秘，但老師父竟然帶咗我去一間正正常常，整整齊齊嘅大廈到，門口仲有接待處同客戶服務員喺到我地登記，我順勢望一望周圍，原來都幾多人排緊隊。
「冥婚可以當成喜事，又可以有催運作用，所以無論有錢人或者窮人都會想用冥婚嚟令自己富貴起嚟，結果就變成一門生意。」老師父解釋。
聽完後都覺得呢種文化好荒謬。但我都好奇問下老師父點解有咁多屍體賣。
「一戶窮人，要富貴有兩種方法，第一，將自己仔女殺咗，然後作為屍體賣咗佢，通常十幾歲至廿幾歲頭呢類年紀個價錢最好，太細或者太大年紀嘅價錢都係一般般，所以好多父母好似養豬一樣，養到佢地肥肥白白就可以拎去賣咁。」
「嘩!咁變態都做得出?」我驚訝地說。
「你覺得變態係因為你未窮過，人窮起上嚟咩都做得出。不過，好多殺人要填命，加上好多父母都落唔到手，所以都造成咗另一門生意，就係搵人買兇殺自己仔女。不過亦都因為咁，好多正值青年嘅人都比人買兇或者比人睇中，殺咗佢地嚟冥婚。」
「嘖......真係好恐怖。咁第二個方法呢?」
「第二個方法咪好似你呢家咁，買屍體嚟冥婚催運。」
聽完老師父咁講，諗起呢啲事出現喺中國只能夠話符合國情，只係無諗過可以荒唐到呢個地步。
老師父仲拍一拍我講，佢話:「岩岩我講係窮人手法，如果係有錢人，隨時可以買鬼佬鬼妹個屍體，甚至係我地呢啲香港人都可以買到。」
「吓? 邊得呀?」
「唏，成日有香港人失蹤架喇!你估真係失蹤咩!肯定比人賣豬仔喇!唔賣屍體剩賣器官都好好賺架!」
講講下，有個一副陸軍裝髮型，粗眉細眼嘅職員走嚟招呼我地。我普通話唔係咁好，所以一切都交比老師父去作主，而我阿媽不時都加插把咀落去，佢地你一言我一語，攪到我都有啲心煩。自從踏入呢間公司之後，感覺唔係咁舒服，不過可能係水肚不服引起。
當佢地傾好價錢之後，老師父叫我地食完晚飯就跟車去揀屍體。我聽到後有啲唔係好願意，點解一定要夜晚去揀，就算我唔迷信唔怕鬼都好，但始終唔係咁好。我話可唔可以日光日白嘅時候揀，我阿媽就即刻捉緊我隻手，話我老婆唔知可以捱到幾時，呢啲事梗係有得快就快架喇!
見阿媽拎老婆嚟講，我都無奈接受。
基本上夜晚餐飯我係無咩胃口，加上間餐廳真係好殘舊，感覺唔係咁衛生，加上我望住啲野食真係諗起呢啲野係人肉或者人骨煮成，一諗起我就想作嘔。老師父話我係咪聽完佢所講嘅野係咪好驚，就叫我唔好諗咁多，啲野食絕對安全。
但我心諗，又係你話人窮起嚟咩都做得出，我點知呢啲野食點整出嚟......
明明約咗九點出發，但間Agent公司嘅人又遲大到，最後攪到十點半先出發。本身我都開始燥燥地，但身體開始有啲想作嘔，出少句聲暖下肚好過。喺架車到，個大陸佬好緊張咁滔滔不絕咁同老師父講野，雖然我聽唔明佢講咩，但大概係講緊點解遲到，好似遇到一啲麻煩野。
我就問下老師父我地要去邊。
佢話我地要去營頭鎮。
我就問佢頭先個大陸佬做咩咁緊張激氣。
佢話:「本來我地要去竹峪鎮，已經有岩我地嘅屍體，但呢排近國慶，公安嚴打呢啲事，所以鎮入面嘅人都急急腳埋咗啲屍體同燒咗佢。所以呢家安排比較遠嘅營頭鎮比我地揀屍體，但就未必睇岩，而且......」老師父講到呢度有啲欲言又止咁。
我話講就講喇。
佢話:「呢間Agent公司都算大公司，都會搵法師攪一攪啲屍體，作下法先比人揀。但呢家我地急要，所以都無時間搵法師作法。」
我仲以為咩大事，作唔作法有咩所謂，反正我又唔洗帶條屍返香港，求求其其攪完個儀式咪算。
不過，由決定買屍體嗰刻開始，我就覺得呢種事好唔道德同人道，人已經死咗都不得安寧，仲要娶或嫁比一個唔識嘅人奪去名份，生前已經決定唔到自己命運，估唔到連死都話唔到事。呢家啲屍體竟然比人拎去亂咁埋.....亂咁燒......
一路上，我都維持一個半睡半醒嘅狀態，天色已經昏暗得有點恐怖，大陸街燈又嚴重不足，基本上我見到司機係靠車頭燈嘅燈光嚟睇路揸車。
瞓到唔知幾時，突然感覺到架車好似停咗，身邊嘅人都用一把似大非大嘅聲線去溝通，好似竊竊私語咁。我望下手錶，原來已經零晨三點幾。
司機急急腳叫我落車，呢個時侯感覺到所有人都好緊張，唯獨我仲係迷迷糊糊咁。阿媽全程喺我隔離捉住我隻手，叫我定啲。老師父都叫我之後落嚟一定要記住佢所講嘅野，我都比佢攪到有啲緊張。
個大陸佬又滔滔不絕咁圍住老師父同我阿媽喺到講野，又不時望一望我，攪到我真係唔咁舒服。
直至所有人都圍住我好緊張咁講野，咩 「蜘蛛」、「蜘蛛」都唔知佢講咩。
老師父就同我解釋，佢話:「你要記住!記住! 一陣入到去揀，憑感覺去揀，愈靚愈唔好揀!記住!揀個醜!靚嘅唔好揀!知唔知道?」
雖然我心入面唔係好明，揀老婆梗係揀個靚，點解愈靚愈唔好揀，而揀個醜?
身邊嘅人又不斷圍住我講，「蜘蛛」、「蜘蛛」、「知道嗎?」
接著，佢地就開始帶我行，全程叫我唔好出聲。
當行到一間屋時，佢叫我用左腳踏入去，我都照做。
當我入到間屋時......竟然......
當我入到間屋時，完全係漆黑一片，透唔出半點光。突然間，我本能反應即刻用手掩住口鼻，由開門嗰一刻開始，一陣屍臭味道一下子衝入我鼻到，即使我掩住個鼻但都無用，陣味難頂到即時想反胃作嘔。
「快!快點!」隔離個大陸佬似乎都頂唔順呢陣屍臭味，不斷催我快啲揀。於是佢拎住個電筒由近門口開始幫我照啲屍體比我揀。
嘩!真係頂唔順，陣屍臭味真係極級難頂，就好似將舊豬肉放入室溫幾個月一樣，嗰種臭完全令你難以想像得到，永世都忘記唔到呢陣味。
為咗想快啲走，我就開始揀。當個大陸佬照第一條女屍時，我嚇到即刻嘔出嚟，好再我一早用手掩住，嘔吐物從我手指罅之中慢慢滲出嚟，我谷盡力大大力吞返落肚。我再望一望條屍，個女仔有半邊臉腐爛哂，仲隱約見到好多條細細地嘅虫走嚟走去......好明顯呢個女仔生前係比人用硬物打頭打死。
我即時揮揮手，示意唔要。
大陸佬再帶我入去前啲揀，嘩!究竟間屋有幾多條女屍? 愈行入愈難受!我實在揀唔到落去，我隨手指住第二條女屍，望都無望就話要呢個算。說罷，我就即刻衝出門口，然後大嘔特嘔，連夜晚食過嘅野、黃膽水都通通嘔返哂出嚟，呢種辛苦簡直難受到想死。
阿媽見到我咁，於是係咁捉班大陸佬問咩事，大陸佬係咁話:「沒事沒事!第一次是這樣呀!沒事沒事!」
老師父即刻拎咗扎香嚟燒，叫我吸啲燒香味道，話可以辟走啲屍臭味。同時話聽朝好多儀式攪，叫阿媽扶我上車抖下先。我不斷拎住扎香嚟索......外人睇以為我變咗隻鬼喺到開餐咁。不知不覺間，我嘔到虛脫咁濟，最後慢慢瞓著咗。
直到朝早，天光了。老師父打開車門，拎咗幾件用紙造嘅結婚服裝叫我換咗佢。終於到咗最後一步，我拍一拍自己塊臉，為咗老婆，唯有頂硬上。
落車後，仍然感到一陣寒意。老師父一直帶住我走，佢話條屍係某戶人家個女嚟，如今去佢屋企做埋冥婚儀式。一直行，我留意到村上都有唔少戶人家，佢地一身破舊爛衫咁呆呆望住我地。
去到女家門口，好多大陸佬好忙咁攪嚟攪去，仲見到幾個睇落似道士嘅人喺到念經。老師父喺我耳邊解釋一陣會請兩家嘅祖先上嚟，燒化牒上奏天庭，又擲筊又施食......我完全唔知咩嚟，唯有成隻扯線公仔咁任佢地擺佈。
幸好，等吉時時侯，仲有一段時間比我抖下氣，我就走到門口呆呆咁坐低休息。
呢個時侯，有個大約八歲嘅妹妹走到我面前。
「哥哥，可不可以娶我喇?」妹妹呆呆咁同我講。
我一時之間比唔到反應，以半涌水嘅普通話回應:「不可以喇!你還小呀!」
「但是，如果你不娶我，我會死的。」
「會死? 為什麼?」
「我家窮，沒飯吃，爸媽會殺掉我然後去賣喇。」估唔到呢番說話出自喺一個細路女把口，而且佢仲講得好淡定。
「不行喇! 我不可以娶你......」
「為什麼你可以娶我姐姐，但不可以娶我嗎?」個妹妹指住屋內。原來我冥婚對象就係佢家姐。
唉，本來攪著人地屍體我已經覺得好不安，如今見到佢家人淪落到咁......呢個細路女仲咁細已經知道自己遲早會死，如果我繼續無視佢嘅話，我呢世人都唔會安樂。
於是我將身上嘅大部份錢都比咗佢家人，我叮囑千萬不要將佢賣掉，好好利用呢筆錢過活。
最後我摸摸個細路女個頭，苦口婆心咁講:「答應我，將來你要找一個你喜歡的老公，知道嗎?」
「那我不用死嗎?」
「不用喇。」
「哥哥.....不!姐夫!謝謝你喇!」細路女感激地說，終於見到佢有番笑容。
後來，老師父比咗條鏈我，話琴晚已經燒咗條女屍，鏈入面啲珠有骨灰，話我拎住會帶來好運。我對好唔好運無意見，我由頭到尾目的只有一個，就係醫返我老婆個病。
不過，返到香港後，老婆身體依然一日比一日差，不但完全無好到，而且仲惡劣過冥婚之前，究竟出咗咩事呢?
於是阿媽再搵個老師父嚟睇下，老師父話老婆中嘅降頭好勁，冥婚嘅效果好似無用，呢家唯有送上大陸一間道觀休養。
但眼見老婆真係好辛苦，阿媽勸我試埋呢一次，於是我就答應了。沿途我陪住老婆，佢仲叫我唔好嬲阿媽，話阿媽為咗醫佢都辛苦。雖然我心入面仲係好不安，感覺到呢一次將會同老婆分離得更遠，於是我話不如留低陪佢。
但老師父拒絕，話道觀唔容許，而且阻礙到老婆休養，如果真係想佢快啲好，就忍一段時間。於是我亦都答應了。
我去附近一間酒店住住先，由於道觀地方都幾僻，手機訊號收唔到，我都唔可以同佢傾Whatsapp。
就係呢個時侯，之前聞過嘅屍臭味突然又再出現，反胃嘅感覺即刻湧現，我急急跑去廁所嘔，但呢陣味一直喺我身邊。我心諗係咪間房有人死咗? 但搵極都無發現，最後我發覺到原來係條鏈發出，我即刻除咗落嚟掉去床到。
怪事就發生了。
我見到床上面，出現咗個半透明嘅女人，而且身穿當日冥婚嘅禮服，我大概知道佢就係我冥婚嘅老婆。我嚇到個心離一離，做人做咗廿幾年都未見過鬼，如今竟然見到。
「恩公，我不是來害你的，我是來告訴你，你的老婆有危險。」女鬼說。
我定一定神，本來好驚嘅心情下，一聽到我老婆有危險，我就清醒返專注聽佢講。
「我老婆? 為什麼你那樣說?」
「恩公，冥婚可以對你幫助，但是對你身邊的老婆是有害的，我知道你很愛她才和我結婚，但這太不對了.....他們騙你的，你老婆的降頭是你媽下的，她知道你老婆三十歲後會對你運程不好，你媽不想你有事，才想辦法除掉你老婆。這都是我聽到你媽和老師父的對話!」
「你說什麼? 你說的是真的?」我實在唔敢相信呢件事實。
「你是我恩公，你救了我妹妹，我為什麼還騙你? 你老婆很快就會被殺掉，然後去賣!你趕快去救她呀!」
雖然鬼嘅說話唔應該盡信，但我的確救咗佢細妹，我諗佢唔會害我.....於是我就拎返起條鏈就趕去道觀睇下發生咩事。
當我去到道觀門外時，我發現有好多架車泊咗喺到，岩岩都唔覺咁多車架? 我心知不妙，即刻衝入去!
只見一大班大陸佬圍住我老婆，在場仲有我阿媽同老師父。
「我屌你地老母呀!全部同我行撚開!」我推開哂班大陸佬，行到老婆身旁，佢仲清醒不過就嚇到喊哂口。在場所有人都嚇一嚇，包括我阿媽。
「老婆!我帶你走!」於是我慢慢扶起老婆。
「不!放下!」班大陸佬喺到喝住我。我理佢地都On9!繼續扶我老婆走人，但班大陸佬即刻圍住我，仲開始郁手郁腳阻我地走。
「仔呀!個女人會害死你架!放低佢喇!佢地會處理架啦!」阿媽即刻勸我，但我已經覺得佢迷信到一個極端地步，簡直痴線。
「媽呀!你醒下喇!咪撚再比個師父洗腦喇!呢個係你新抱呀!」
「你識咩呀!總之同我即刻放低!」阿媽說罷，班大陸佬似乎想將我老婆殺咗拎去賣!見佢地雙眼發哂光就知我老婆值錢，我仲見佢地手上拎住支針!
我喺褲袋到拎咗預先帶定嘅餐刀出嚟，示意叫佢地行開!但班大陸佬無人性，郁手捉住我，仲打我將我禁落地。
我老婆身體虛弱，完全任佢地擺佈，只見一大班大陸佬禁住佢，然後慢慢將支針打落佢條頸到。
「你班仆街!!!!!!!!放開佢呀!!!!!!!!我殺咗你地呀!!!!!!!!!」我竭斯底里地大叫，但毫無作用，只見老婆反抗得愈嚟愈小，最後靜咗落嚟，我就知道佢地殺咗我老婆。
「快快快快!快送上車!」班大陸佬四散，急急腳咁安排送我老婆走。阿媽就係隔離扶住我，喊住口講:「我咁做為你好咋!個女人三十歲之後就會克住你!我唔會比呢個女人害死我呢粒仔架!」
我呆呆望住阿媽，我搖搖頭，然後起身行到老婆身邊，說一句:「對唔住。」說罷，我將把餐刀直插心臟自殺。
身邊嘅人即刻想救我，但我用盡所有力氣捉住把刀插住唔比人拎走......我忍痛地望住老婆.....然後.....慢慢....無知覺.....老婆.....下面見。
.......
.......
「那怎麼辦?」
「還用說? 快送走!」
「那個男怎麼辦?」
「拿去賣喇!還等什麼?」
.......
.......
" 嘻......你終於下來陪我啦。 "
《完》
