慘叫
在房間的牆身中，突然出現了一線裂縫，一隻眼從裂縫中小心翼翼的望出來。
「呼！好彩終於走咗，差啲畀佢發現，嚇死我喇。」性感少女驚魂甫定，從牆身的暗格中走出來，這暗格是用作房間遮醜的，喉管電線全都藏在裏面，非常狹窄，身形不苗條纖瘦根本不可能藏在裏面。
「要快啲揾到錦囊，要快啲贏，要快啲攞到獎金，咁就唔駛再出嚟做。」自從她聽到勝出遊戲會有獎金後，整個人也變得積極起來，開始盤算着如何能成為最終勝利者。
她決定在房間內逗留和尋找錦囊的蹤跡，畢竟這間房現在已經變成了最安全的地方，她可以放心尋找，短時間內不必擔心鬼會再回來。
「但係錦囊其實係點嘅呢？會唔會見到都唔知嗰個係錦囊？」她逐個逐個玩偶查看，但三百個玩偶也實在是太多了，要全都找一遍恐怕要花上不少時間。
「如果有人幫手就好。」她自言自語道︰「不過又點會有人先得？都係靠自己最穩陣，呢個世界無人係信得過。」
就在她全神貫注埋首在玩偶堆的時候，一個龐大的身影悄然走近，躡手躡腳的走到她身後，朝她背脊輕輕一拍，她立即嚇得跳起並大叫，叫聲連在地下也能清楚聽到。
+×+×+×+×+×+×+×+×+×+×+
在地下的廚房，有一個人正在東翻西找。
「既然鬼唔喺度，我動靜大啲都無問題啦。」青秀男自言自語道︰「明明話有錦囊喺呢度，點解揾極都揾唔到？」
他逐個廚櫃打開查看，還是找不到錦囊，開始有點急躁，此時，他留意到焗爐內似乎有東西在烤着，走近一看，不是甚麼，正是他要尋找的錦囊。
「踏破鐵鞋無覓處，得來全不費功夫。」他自滿的笑道。
正當他想打開焗爐之際，在儀表板前，竟有一道鎖，鎖連接着一個數獨遊戲，而焗爐此時還餘下五分鐘左右的時間。
「麻鬼煩，時間已經咁緊絀，仲搞埋啲咁嘅嘢，真係惡趣味。」他憤怒道，但還是乖乖的去完成這數獨。
「啊！」此時樓上傳來一聲慘叫。
「睇嚟已經有第一個犧牲者，聽把聲似係嗰條女，不過都抵佢死，鬼叫佢做雞，唔抵可憐。」他冷冷的說，之後補上一句︰「搞掂。」手裏便拿着一個紅色的錦囊。
他打開錦囊，裏面裝着的是數個滾燙的小鐵球。他立即拿去洗手盤沖水，待它們冷卻後，拿上手納悶的說︰「咁嘅嘢可以有乜用？點解唔可以畀啲有用啲嘅嘢我？又細粒，同粒波子差唔多size，仲要我嘥咁多時間嚟解呢個數獨，shit！」
此時，他聽到遠處有動靜，謹慎的他立即躲在廚櫃內，以大大小小的廚具遮着自己。
不消一分鐘，人已經進到廚房，由腳步聲判斷，只有一個人，他一邊亂翻廚房，一邊碎碎唸︰「頂，呢度都無，究竟邊叉度先有？」
他走到青秀男躲藏的廚櫃前停下，正想打開廚櫃之際，發現了一些有趣的東西，而青秀男也立即意會到些甚麼，手握平底鍋準備攻擊。
「喂放心出嚟啦，我唔Q係鬼，我同你一樣都係要匿埋嘅人，我係老鬼呀。我知你喺度嘅，見到你個吉嘅錦囊，出嚟喇，我哋一齊從長計議。」腳步聲的主人自稱老鬼，而憑他的聲和說話，青秀男知道此人正是粗魯男。
可是青秀男並未現身相認，老鬼喊了數次，眼見依然沒有人走出來，認為廚房應該無人躲藏，於是失望離去，走到其他地方繼續尋找錦囊。
「可惡，竟然留低咗呢個證據，好彩佢唔係鬼，唔係實畀佢揾到。」青秀男責備自己的大意，隨着腳步聲遠離，他亦放心離開廚櫃，繼續尋找錦囊。
「下一個要去嘅地方係洗衣房，入面都有錦囊。」他看着走火通道地圖自言自語。
+×+×+×+×+×+×+×+×+×+×+
在二樓的健身房內，戴着鴨舌帽的滄桑老人面紅耳赤、氣喘如牛、汗流浹背，他正在嘗試翻滾二百磅的車軚，拿出壓在下面的錦囊，他已經嘗試了十分鐘。
此時，健身房的門打開，走進來的是高大帥哥。他一進門便發現到滄桑老人，看到他獨自搬車軚，便立即上前幫忙︰「阿伯，小心啲呀，呢啲粗重嘢留返畀後生做啦，一陣整親條腰呀。」
「乜係你呀？嚟得啱喇，幫我手搬開佢，下面有個錦囊。」滄桑老人讓出了半個身位，好讓高大帥哥來幫忙。
「準備，一、二、三，用力！」滄桑老人發號司令，終於合兩人之力總算把車軚翻開，拿到錦囊。
「唔該哂你啊後生仔，你咁靚仔，成個明星咁，叫咩名呀？」滄桑老人邊打開錦囊邊問，錦囊是綠色，裏面放了一張字條。
「我叫KT，你呢阿伯？」KT有禮貌的答。
「呵呵，KT，好名好名，而家啲後生仔都唔用中文名囉，你叫我福伯啦。」福伯笑呵呵的說︰「啱啱喺房見你，仲以為你好難相處，但原來都唔係。」
「頭先係我個人太亂先會咁，嚇親你唔好意思，對唔住。」KT誠心道歉，然後問︰「福伯，個錦囊入面有啲乜？」
福伯拿出錦囊內的字條，調整好老花鏡的角度，把內容朗讀出來︰「遊戲一開始的時候會有一隻鬼負責捉九個人。但隨着遊戲的進行，鬼可能會多於一隻。」
「睇嚟係遊戲規則。」KT說︰「但最少知道而家應該仲係得一隻鬼，而且唔係我哋九個之一。」
「我哋而家應該揾個地方匿埋先，我估隻鬼應該就快揾到呢層。」福伯擔憂道。
「啊！」此時樓上傳來一聲慘叫。
福伯聽到後立即緊張起來，並惶恐道︰「死喇死喇，有人畀隻鬼捉到喇，我哋真係要快啲揾地方匿埋先得。」
與福伯的緊張相比，KT反而十分淡定，他搖頭並持相反意見︰「啱啱聲慘叫聲喺上一層傳過嚟，即係隻鬼喺上面，咁應該無咁快落到嚟，畢竟遊戲都係開始咗幾分鐘，佢應該仲未揾哂上一層，所以我哋仲可以再喺度揾多陣先，只要我哋之後離落嚟嘅樓梯遠啲，就算咁啱撞到正，我哋都仲有成層距離嘅時間可以逃走。」
雖然KT分析得頭頭是道，福伯也認同他的看法，但還是堅持要先躲起來︰「KT，福伯老喇，已經跑唔郁，隻鬼喺樓梯見到我哋再追過嚟，我未落到下一層就已經畀佢捉到，我都係匿埋先。」
KT拍心口道︰「唔會嘅，最多到時我保護你，幫你擋住佢，等你有時間走佬。」
福伯聽到雖然高興，但還是拒絕了他的好意，堅持自己先找地方躲起來，KT也只好無奈接受，畢竟人有自由意志，不能控制對方的行動，不過他最後還是答應福伯一定會把鬼引走，不讓他有危險。
雙方達成共識後繼續一起行動，依然待在二樓探索，只是一個探索錦囊，一個探索藏身之處。
+×+×+×+×+×+×+×+×+×+×+
「我哋去邊層？」野仔問。
「去二樓，通常人嘅習慣，揾嘢都係順住揾，所以喺呢個情況之下，揾人唔係由最高開始就係由最低開始，我哋賭佢一次由地下開始揾起，咁我哋就多啲時間揾錦囊同揾地方匿埋。」樂哥詳細解釋，這令野仔十分佩服，想不到決定去哪裏也有學問。
他倆走到二樓後，開始逐間房查看。這層有五間套房，每間房也有不同的主題，分別是鏡子、盆栽、泡泡、蠟燭和陶瓷，另外有兩間娛樂房，分別是健身房和藏書閣。
「呢五間房要匿埋都好似好多地方可以匿咁，我哋可以唔駛分開匿，至於另外兩間娛樂房，我哋唔駛考慮都得。」野仔提議。
樂哥仔細看過五間套房後，都同意他的提議，決定要躲藏的話，就一起躲在鏡子房。決定了藏身地點後，便是找錦囊的時間，他們由鏡子房開始尋找。
鏡子房顧名思義是整間房都以鏡子裝飾，除了床上用品外，其他都是能清楚照出影像的鏡子，所以整間房的面積感覺比實際大出很多，而且只需一丁點光，整間房便會非常光亮，置身其中，目眩神迷，會分不清真假虛實。
他們仔細搜索房間，但始終找不到錦囊，於是便到旁邊的盆栽房尋找。這間房擺滿了盆栽，各種花草樹木交錯叢生，仿如置身森林之內。他們小心翼翼的關上門後，便開始尋找錦囊，由床、到衣櫃、書枱、牆身，始終都找不着，最後還餘下套廁。
「睇埋入面，睇吓有無。」樂哥說。
野仔照着辦，扭門打開。
「咦？」打不開，他再扭另一面。
「咦！」還是打不開，他覺得奇怪，為甚麼會打不開呢？
「樂哥，道門好似鎖咗喎，開極都開唔到。」他跟樂哥報告。
「等我試試。」樂哥上前嘗試，還是開不到，正想敲門之際，裏面傳來了一把女聲。
「你哋快啲走，我唔會開門畀你哋匿入嚟。」女聲說。
野仔認得出這聲音的主人，他跟樂哥耳語道︰「係嗰個肥肥哋、講電影劇情嘅人。」
樂哥「哦」的一聲後，便想到應對方法，隔着門對她說︰「你匿喺入面唔開門，係咪又係因為啲電影劇情呀？一開門隻鬼就會出現，最後三個一齊慘死？但其實喺啲戲入面，通常第一個死嘅都係啲自私，以為自己留咗喺最安全嘅地方嘅人。你諗吓，做得鬼嘅，見道門鎖咗，真係會就咁走人咩？肯定知入面係有人啦。」
聽完樂哥的一番話，胖女生態度似乎軟化了，她猶疑的問︰「隻鬼真係唔喺你哋後面？你哋真係唔係鬼？」
「啊！」此時樓上傳來一聲慘叫。
胖女生立即嚇得魂不附體，跌坐在地，撞跌了廁所內的雜物，發出了「乒鈴𠾴唥」的聲音。
「冷靜啲冷靜啲冷靜啲，唔駛咁驚，好明顯啲聲係樓上傳嚟，證明咗我哋唔係鬼，同埋呢層暫時仲好安全。」樂哥安慰她後續道︰「其實都係一場遊戲啫，點解你咁驚咁嘅？」
胖女生聽到樂哥指「只是一場遊戲」後更加激動，歇斯底里道︰「呢場唔係一場遊戲，唔係一場遊戲呀！」
野仔聽到她如此激動，也加入安撫︰「係，知道，唔係一場遊戲，我哋講錯，應該係一場實驗先啱，我哋更正返。不過你唔好叫得咁大聲，咁樣好易引隻鬼過嚟。」
胖女生聽到野仔說是「實驗」，反應也沒有變小，依然大吼︰「唔係實驗！你哋乜都唔知！」
他倆都被她的反應弄得糊塗了，不是遊戲又不是實驗，哪是甚麼？野仔好奇的問︰「咁呢場係咩？」
「係死亡邀請！係被捉到要死嘅捉伊因！」胖女生瘋了，她想不到這種只有電影才會有的事情，竟然降臨到自己身上。
「咩話？」他倆以為自己聽錯了，再確認一次︰「捉到會死？邊個講㗎？Sigmund Freud無講過喎，係咪你自己腦補喳？」
「錦囊講嘅，佢話捉到就會死！所以你哋快啲離開，唔好累我！」胖女生因太驚慌而哭了。
聽到這個驚人的訊息，他倆着實也未能消化，但若果是真的話，那胖女生現在的狀態和藏身地點是必死無疑的，本着人多好辦事的宗旨，必須拯救她。
「聽我講，而家呢層暫時都仲好安全，隻鬼仲喺上面，所以你可以冷靜返先。」樂哥繼續遊說她道︰「你頭先都同意，你身處呢個廁所係必定畀隻鬼揾到，所以一定要走，正所謂人多好辦事，我有個建議，嗯……應該點稱呼你？」
「Joyce，你有咩建議？」Joyce問，看來她還是保持着理智。
「Joyce，個名幾好聽，我哋可以set個trap畀隻鬼，用呢個廁所，咁就可以幫我哋爭取到逃生同揾錦囊嘅時間。」樂哥提議道。
「咁有用咩？」Joyce懷疑道。
「有，你記唔記得Sigmund Freud喺開場時講過啲乜？」樂哥問。
「佢講過好多嘢喎……」Joyce有點無言以對。
「無錯，佢係講咗好多嘢，但佢入面提過一個重點，佢話『希望大家可以留到最後，成為勝利者』，即係話我哋係有機會贏，唔係淨係被捉，係可以反抗，只係我哋未知個方法係點樣。」樂哥引述Sigmund Freud的說話，再加以推測。
「所以先要去揾錦囊！」野仔衝口而出。
「Exactly！果然話頭醒尾。」樂哥讚許道。
「你意思即係話，我哋用呢個廁所做陷阱，拖延隻鬼嘅時間，等我哋可以盡量揾多啲錦囊？」Joyce在腦內整理好所有資訊後問。
「Bingo！我就係想咁做。」樂哥興奮的說。
「噠」，套廁的門打開了，Joyce走出來對着他倆說︰「咁我明白喇，我同你哋一齊行動。」
「可唔可以畀我睇吓個錦囊？我想知係咩樣。」野仔問Joyce，她毫不吝嗇的把綠色錦囊遞給他，連同裏面的紙條也一併附上。
「哦，原來個錦囊咁普通，只係一個純綠色嘅束口袋仔。」野仔有點失望。
樂哥看了一眼套廁內部，做了一個簡單機關，利用故意滴水的水龍頭，做了一個像日本庭園水池竹筒的機關，每隔十分鐘便會因水累積太多而倒掉，其間會發出細小的聲音，加上緊鎖的門，鬼一定會闖進去。
機關設置好之後，Joyce把所有沐浴露、洗頭水和護髮素全都倒在地上，使地面極度濕滑。她一面得意，鎖上門便離開盆栽房，與樂哥和野仔一同到泡泡房尋找錦囊。
+×+×+×+×+×+×+×+×+×+×+
阿雲依然心心念念那個在玩偶房未被找到的人，他已經再找了三間房，無論是床下底、被窩內、衣櫃內、房門後、窗簾後，一間房能夠藏身的地方都已經找過，但還是找不到半個人影。
「唔通呢層無人？」他腦內突然冒出了這個想法︰「或者去突擊下其他層數都好，呢層嘅人都應該有警剔匿得好埋。」
於是，遵循自己的想法，他開始落樓梯到二樓，但正當走到樓梯一半的時候，身後傳來了一聲慘叫︰「啊！」
「哼，間房果然有人，究竟佢啱啱匿埋咗喺邊？」他興奮的往回跑，但同時還有一個疑問︰「明明鬼得我一個，佢慘叫啲乜？咁係咪即係證明啱啱其實佢真係喺房，同我撞到正，只係我揾佢唔到，而家有第二個人揾到佢，就以為係我，所以慘叫？」這疑問揮之不去，抱着疑問的他，不消一會便再次抵達玩偶房。
與離開時相比，房間的玩偶明顯被移動過，排列整齊，他苦笑了一下，笑的是自己的天真和大意，明明剛才獵物近在咫尺，但自己卻把他親自放生，實在是太久無玩捉伊因所致的失誤。
「今次你無咁好彩㗎喇。」他露出凶悍的眼神，散發着獵人的氣息，就像肌腸轆轆的猛虎在搜捕小鹿。他掃視一眼之下，率先排除了地上的玩偶，轉而集中精力在房間的牆和地板上。
「成間房最有機會藏身嘅只得暗格，呢度一定有。」他憑着信念不斷左右拍打牆身和地板，終於發現了牆壁一處的回聲有不同，是空洞的聲音，證明內裏是空心的，而且整間房只有這一處，證明要躲藏的話，也只有這裏了。
他不自覺的嘴角上揚，信心十足，握着隱藏式手把奮力一拉，同時大叫︰「今次仲揾你唔到？」
房內一時之間鴉雀無聲，只有急促的呼吸聲在迴盪着，他瞪大雙眼看着暗格，然後忍不住大笑起來，接着額頭說︰「真係估你唔到，啱啱原來就係匿喺度，竟然一牆之隔都無留意到，到今次終於留意到喇，你又匿咗喺第二度，睇嚟今次我嘅對手一啲都唔簡單，唔可以單純靠體力就捉到。」
他興奮起來，轉身離開房間，赫然看到二樓有一個身影閃過，便立即跟上，到二樓捉這個可憐大意的獵物。
