數字遊戲
黃色的燈光轉為藍色，仍然在生的二十位參加者已經知道傳媒準備說話了。
「以下落嚟，大家有十五分鐘時間討論，被告朱Ling，你可以為自己辯護，其他人都可以發表意見，不過大家記住，人數對勝負至關重要，哈哈哈哈。」傳媒的笑聲在密室中不停迴盪，好像不會消失一樣，與此同時，燈光由藍再次轉為黃。
眾人的目光聚焦在G鋒朱Ling身上，他沉著得令人猜不透，他先笑露出燦爛微笑，然後自信的說︰「我係藍營其中一個，啱啱傳媒先講完，人數好重要，而家黃營少咗個人，我哋藍營佔緊絕對優勢，你哋無理由投死我㗎？我哋應該槍口向外，殺哂班黃營人，贏咗個遊戲，生存落去！」他說完後，立即觀察各人的神情。
「好笑，你話你係藍就真係藍？有咩證據？你係咩身份？」PoPo Fanny第一個駁斥他。
「我點會開身份咁蠢，唔驚下次被人針殺咩？至於證據，我都無，我只係得個計劃，一個我哋必贏嘅計劃。」朱Ling趾高氣昂的說。
「咩計劃？係點嘅？」藍絲阿偉問。
「秘密，講出嚟仲點會進行到？不過跟住我做就實掂。」朱Ling故作神秘的回答。
此時燈光轉藍，正當大家以為傳媒要開口說話時，聲音卻不是從小丑傳來，而是從桌子的其中一邊、柒婆Vanlee口中傳來︰「我作為黃絲，都要多謝你呢番言論，令我對各人嘅陣營有個初步了解。」她說完後,燈光又變回黃色了。
「切。」朱Ling不自覺的真情流露，心想︰「估唔到都有人同我一樣，趁啱啱嘅表情同答話已經對其他人嘅陣營有初步了解，呢個女人要小心啲應付。」
「睇嚟呢隻Game都唔係咁易玩。」維基Annie說。
「以命相搏嘅遊戲從來都唔會易玩。」另一位PoPo高軒小聲嘟嚷。
「想贏就要快啲估到其他人係咩牌，但而家資訊量太少，根本就判斷唔到。」鄺神Shirley心裡謀劃著︰「但可惜無留意到啲表情，只可以判斷到最先開口答嘢嗰兩個人係藍。」
「呢隻Game對黃營人真係超級唔友善，基本上都係等死，反制嘅機會少之又少，就連啱啱朱Ling有意無意創造出嚟嘅機會都極速被識穿拆解埋，究竟點贏？」手握大台牌的馬仔說得七情上面。
在聽到她的言論後，在坐的某些人表情上有輕微的變化，而這亦看在誠哥Andy眼裡，為免被其他人發現，他立刻轉移話題︰「其實各位而家對其他人嘅身份都仲未係好清楚，我哋係咪應該唔好亂殺無辜呢？我覺得應該盡快揾出離開嘅方法，而唔係喺度自相殘殺，多個人多個腦。」
「屌，咪咁天真喇！」醫護Harry破口大罵︰「你睇唔到啱啱條友咩？佢畀人爆頭，係個眼罩做嘅，即係我哋而家人人頭上戴住嗰個，呢個唔係普通Game，真係會死人，我理得佢咩陣營，人越少我生存嘅機率就越高，我就點都揀佢有罪。」
「你黐咗線？雖然我唔知你咩陣營，但如果我哋係同一陣營，你親手投死一個盟友，等於將自己推向懸崖，自己諗啦。」朱Ling氣急敗壞的說。
Vanlee再度開腔，燈光亦變藍︰「我Buy你Harry，多隻香爐多隻鬼，不斷剷除其他人，剩低我一個就肯定贏。」
「唔係咁㗎！」大律師公會阿綺加入戰團，燈光又變回黃︰「要贏係要留低越多人越好，雖然唔想屈服，但睇嚟唔KO哂敵對陣營係無得離開，所以要好謹慎咁確認朱Ling身份先得，殺定留對雙方影響太巨大。」
「我……我都認同。」氣若游絲的起底組阿Moon說出她的見解︰「我認為呢，其實而家邊個講嘢都唔係可信嘅，因為每個人都係為自己生存作出打算，所以講嘅嘢都一定係以自己可以繼續生存為大前題，所以呢……我哋要好小心咁投。」
「你意思係我哋所有人都講緊大話？」Fanny不友善的挑戰道。
「我……我唔係咁嘅意思……」阿Moon膽怯的答，小聲得差點聽不到「思」字。
「好喇，時間都差唔多。」藍光再現，這次真的是傳媒開口了︰「而家開始投票，朱Ling嘅死活，全憑大家手上一票，記住投票掣喺櫈柄度，睇清楚先好㩒。」語畢，燈光轉為第一次出現的紅色。
眾人先後按下投票鍵，除了被告朱Ling外，而很快地，投票結果已經顯示在桌面上，而燈光又再度轉為藍色。
「十三票無罪，八票有罪，朱Ling無罪釋放。」傳媒宣布結果。
「Yes。」朱Ling情不自禁露出勝利的笑容，同時心裡暗喜︰「今鋪賭贏咗，連個天都幫埋我，呢個情況講自己係藍果然超大機會唔駛死。雖然最差情況係中立撚係黃營，而柒婆知我係G鋒，咁我就會以十一票被判有罪死，但睇嚟柒婆唔知我身份，咁藍營有十人，黃營都係十人，但我無得投票，所以實際得九人，然後雙方而家都係各自有個人有兩票，所以最後結果都係藍營比黃營多一票，我唔駛死。而且以目前投票結果睇嚟，中立撚喺藍營，睇嚟黃營真係好危，我要快啲摸清仲有邊啲人係藍營，好彩啱啱討論得咁激烈，我嘅真正身份先無曝光，趁我仲扮到藍嘅時候好快啲做嘢先得。」
「解決完一單案之後，黑夜又再嚟。時間嚟到二零一九年六月十五號，一個女人宣布暫緩修例，一個男人決定用生命喚醒裝睡嘅人，呢一晚，注定不平凡。」傳媒特意把「不平凡」三字加重語氣並逐個字吐出來，密室的各人也感受到所帶來的凝重。
