第二幕
時間：傍晚
地點：Ming爺的書房
人物：Terence、Ming爺
場景：兩人討論灰姑娘計劃的細節
「你上次講嗰個灰姑娘計劃，我Brainstorm咗啲嘢出嚟，你睇吓覺得點。」Ming爺在抽屜拿出數張A4紙遞給Terence，手指則在手機上快速跳動。
Terence邊吃著Ming爺家主廚準備的英式下午茶，邊仔細看Ming爺的成果。基本上每次有任何想法和行動，流程都是這幾個步驟：Terence提供點子、Ming爺想執行細節、Terence給意見完善、兩人落實執行。
「我覺得成件事可以再盡啲爆啲，喺你呢個Idea上面再去盡啲，唔係唔會有個反差大嘅戲劇效果。」Terence向Ming爺描述自己心目中嘅灰姑娘計劃：「呢度我覺得用法拉利好啲，仲要白色嘅，咁先係白馬王子；另外晏晝Lunch我覺得去你屋企嗰間餐廳好啲，有格調夠高檔，而且午市一向唔做，可以話我包咗場，效果仲好；最後完嘅時候我唔想喺舞會度，而係喺山頂，咁會好玩好多，哈哈。」
Ming爺聽完Terence的瘋狂建議後，放下手機，在腦內分析整理一頓，露出若有所思的樣子，Terence一眼看穿他的表情背後的含意，畢竟相識已二十逾年，於是斬釘截鐵的說：「放心喎，唔駛擔心你屋企人嗰方面，佢哋從來都無逆過你意，你一向品學兼優、文武雙全，佢哋對你愛護有加，你開口佢哋實肯，理由我都幫你諗好嘅喇，一定得。」
Ming爺聽完雖然放下了心頭大石，但依然有些少猶疑，於是Terence又再發功：「你就當幫吓我份FYP囉，骷髏骨佢Say咗Yes嘅喇，你都想我順利畢業，可以同你一齊影畢業相嘅嘛。」
面對Terence的軟攻，Ming爺每次也會敗陣：「好喇，睇在係幫你畢業份上，我試吓同阿爸講喇，你嗰個咩理由嚟，講嚟聽吓睇吓Work唔Work？」
「你話學生會打算係完Sem前搞次One Day大型活動，等大家開開心心咁過暑假，而你本身係學生會嘅P，又係負責呢個活動嘅Committe之一，所以就想搞得好好睇睇，要借場地同借車，最後仲想搞個Ball，所以要借埋屋企。」Terence編這些理由真是一個天才，一般人很難找到破綻。
「但個Ball要有多啲人先得，唔係點似？」但Ming爺不算一般人，通常很容易突破盲點：「除非我哋真係用學生會名義搞一個完Sem Ball，咁就會好多人嚟參與，唔駛我哋請人嚟客串，而成件事又唔駛呃我阿爸咁多，我會好過啲。」
Terence吃完最後一口蛋糕，用餐巾抹嘴後，對Ming爺做了一個讚好手勢，一來讚賞下午茶的美味，二來讚賞Ming爺的周全。
「不過仲有一個更加重要嘅問題我哋未解決，」Ming爺特登壓低聲線，令懸疑感大增，而Terence也探頭前來，用鎖眉表示疑問，Ming爺也不打算賣關子：「女主角人選！」
「啊！係喎，你唔講我都真係唔記得，你真係一言驚醒洛克人，女主角揾邊個好？有無人選？」Terence又再問Ming爺，就像Ming爺是多啦A夢，所有問題也能解決。
「你咁問我，一時之間我都無咩人選，不過我哋唔會畀佢知佢係灰姑娘同埋我哋拍緊佢，不如我哋揾啲乎合灰姑娘條件嘅人嚟做。」Ming爺提議。
「唔好，我啱啱諗到，我哋可以後學校揾個窮人，畀佢有飛上枝頭變鳳凰嘅機會一日，然後再將佢狠狠咁撻返落地，呢個心理變化對我做FYP好有幫助。」Terence壞壞的笑說。
Ming爺聽完覺得這樣做很惡趣味，但知道Terence不會聽他說，所以只有無奈點頭，而手指又再次在手機螢幕上飛舞。
