面聖
sorry咁多位，我啱啱先喺政府秘密扣留地點逃走出嚟，事態好嚴重，唔知幾時會連命都無，所以要趁早講埋件事。
上次講到我揾到個出入口，正火速返去同九龍皇帝報告，雖然我係帶罪之身，不過唔理得咁多，因為我唔想咁自私，但要揾到佢唔係易事，特別係啱啱打完仗分緊贓，都唔知佢係邊，所以最好嘅方法係等佢嚟揾我。
於是乎我去咗政府山政總，雖然曾港督被押走，但我相信呢度都仲會駐紮重兵，只要我喺入面大鬧一番就可以見到曾皇帝。當去到政府山想潛入政總時，我喺草叢入面被人發現咗，真失策，仲未大鬧一場就已經被捉住。佢哋鎖咗我去監倉，同其他戰俘鎖埋一齊。
呢鑊麻煩喇，呢班戰俘見到我衣著同佢哋唔同，立即知道我唔係香港島嘅人，好快將我圍住，拳打腳踢在所難免，慶幸無被人爆菊，不過都重傷，啲獄卒見住都無阻止，反而仲拎啲花生、瓜子出嚟邊食邊睇，直到我奄奄一息先出手阻止，然後將我帶咗去獨立監倉。
無醫生睇就預咗，但連飯都無得食就真係有點兒那個。我坐咗幾日監，餓到坐起身都無力，班獄卒就走嚟帶我出去，嗰刻嘅我個腦完全癱瘓，對接住落嚟嘅事無咩印象，我只係記得矇矓中聽到有人講「沉咗佢落維港」、「拎去餵老虎」、「做奴隸」等，之後我就繼續沉睡，到我醒返時就已經喺亂草堆成嘅床上，而4周嘅環境何其熟悉。
「你終於醒喇？」一把男人聲陰沉沉咁講，完全唔帶任何情感。
「係呀，皇帝。」我試圖起身，但發覺雙手被綁在床兩側嘅木柱度。
「本身逃走咗都特登走返嚟，係咪發現咗啲乜？」繼續用平穩無起伏嘅聲線問我，感覺更冷酷無情。
「可以咁講，但可唔可以鬆咗我先？」
「咁要視乎你講嘅嘢而定。」
「咁好喇，我發現咗個出入口。」
曾皇帝聽到呢句，成個人立即坐直，慢慢轉身面向我，再難以置信咁吐出一句：「你講咩話？」
「我話我揾到個出入口。」
「哈哈哈哈，太好喇！即係我哋可以返到去？」龍顏大悅我終於知道係點嘅樣。
「講啱1半，但我唔知點先開到道門。」
氣氛瞬間冷卻，曾皇帝又再次板起臉口。
「所以我先返嚟揾你，諗住同你商量吓。」
「商量啲咩？你覺得以呢度嘅科學水平，可以開到嗰個出入口？」
「我都知無咩可能，但都要試，唔通你想留喺度直到死？」
我講完呢句之後，恍惚成個空間靜止咗咁，有長達幾分鐘嘅靜寂，然後我感覺到綁住雙手嘅繩鬆開咗，我終於恢復自由。
「不如你同我去望吓個出入口先，然後再諗計。」
曾皇帝點頭示好，於是我就帶咗佢去我發現嘅地方。去到之後，唔駛等我開聲，佢都已經發現咗我發現嘅嘢──直徑兩米範圍內嘅植物都有整齊嘅切口，同埋中間啲泥土比較軟。
「呢個地方果然唔尋常，不過要開門睇嚟完全係靠我哋原來嘅世界。」曾皇帝總結。
「但係事前完全無先兆，而且我哋又唔知佢開門嘅pattern，唔通要日日係度守株待兔？」
「或者可以審問吓曾蔭權，呢度係佢嘅領地，佢可能都有發現呢個現象而做過研究調查。」
「我之前已經問過佢，佢話乜都唔知。」
「拷問嘅嘢，留畀我哋呢啲大人喇。」曾皇帝奸笑，跟住就去關住曾港督嘅牢房出發。
沉默咁行路，氣氛有啲尷尬，於是我努力揾話題，直到講到呢個話題，曾皇帝先應我。
「我覺得你要小心啲，雖然今次我哋同新界聯軍打香港島，但我覺得新界劉業強唔係咁簡單，佢野心好大，終有1日劉皇發會控制唔到佢，佢會反咬你一啖，吞併埋九龍。」
「呢啲嘢我都知，我都有派人暗中監視。」
「不過我怕嘅係佢暗中同曾蔭權勾結，畢竟呢場勝仗太多疑點，點解係我哋備戰期間佢不斷派兵騷擾尖沙咀同紅磡，但就係唔攻上嚟？點解呢場戰爭好似無咩抵抗，三兩下手勢就贏？我諗曾蔭權一定有啲陰謀。」
講講吓，我哋已經去到關押曾蔭權嘅地方，曾皇帝命人準備拷問工具，為我哋想知嘅答案作努力。
