AMY有日同我講，佢鍾意咗阿強。

原因好簡單，就係話阿強成日口花花FLIRT佢。

我心諗，算鳩數啦，阿強一定唔係鍾意你。

因為所謂雄性，就係對住自己心儀嗰位嘅時候，個腦一定好似食咗屎咁。

明明平時OVER 9000轉，當望住佢對眼，當見到佢微微一笑……

嘟——輕機。

所以計我話，阿強一定唔係鍾意AMY ，而係鍾意嗰個佢對住剩係講到一句起兩句止嘅MARY 。

因為鍾意，所以語塞。

到底點先可以打開對話匣子、

到底點先可以將自己幽默嘅一面表現俾佢睇、

到底點先可以令佢發現自己嘅溫柔、

到底ADD 佢FACEBOOK佢會唔會ACCEPT、

到底LIKE佢啲POST佢會唔會察覺到自己鍾意佢……

又想俾佢知，又唔想俾佢知。

點解唔想俾佢知？好簡單，就係因為嗰次阿強問我，MARY 有無男朋友。

可惜，我愛莫能助。

望住笨拙嘅阿強，每次見到MARY 去斟水就拿拿林飲晒自己嗰杯跟住去，

每次見到MARY 去PANTRY亦都拿拿林飲晒杯水去沖咖啡，

我就不禁心諗，大膽啲啦不如。

不過，男人就係咁，越鍾意，就越無膽，越唔鍾意，就越放膽。

「咦，你啲頭髮好香喎！」
「咦，換咗新香水喎！」
「咦，你個頭咁紥好睇喎！」
「咦，呢隻色襯你喎！」
「咦，你戴眼鏡都幾好睇喎，唔使日日戴CON 啦！」
「咦，你把聲沙沙哋喎，唔舒服要飲多啲水呀！」

越係無關痛癢，就越係難講出口。

好多人都話，男人，靚仔其次，最緊要識講嘢。

其實，最緊要係夠膽講嘢。

偏偏大部分男人，一係就無膽講嘢，一係一講就自殺。

之係咩？之係表白囉。

對住鍾意嘅人，唔知點解，就係無耐性。

無耐性播種，無耐性淋花，一嚟就想摘取果實。

但偏偏好多女性，被呢種唐突嘅表白嚇怕，明明個心覺得有發展空間，但又覺得「佢都無FLIRT過我，一嚟就表白，點知係唔係玩玩吓架……」

如此這般嘅猜忌，葬送咗一段關係。

我想講，偏偏係呢種突如其來嘅表白，先係最真摯，最唔修飾，最真心。

因為佢對你嘅愛，已經唔容許自己再多等。

阿強話，聽日就同MARY 表白。

我話，佢可能有男朋友喎。

「咁又點？」

我望到嘅，係一個視死如歸嘅背影。