無啦啦收到舊同學電話，邀請自己出席飯局。

本來滿心歡喜，小鹿亂撞，準備同你詳談人生嘅不如意，細數公司嘅八卦事。

點知……

「我最近返新工呀，呃……咪做保險囉，點呀，咁耐無見唔係唔俾面下話！」

當然，可能佢約我食飯，同佢投身左保險完全無關係，但個心總係有條刺，覺得段友誼已經唔再純潔。

我硬係凝住凝住，佢要SELL我保險，凝住凝住，佢會變到積極樂觀，對人生好有規劃。

然後同我講一堆佢對人生嘅抱負之後，再帶出係多得依家間公司。

到左飯局當日，基本上，佢都按我劇本上演。

昔日中學嘅兩三事只係輕輕帶過。

最後當然派張卡片，講句you deserve better，然後叫我買保險CALL佢。

我知佢可能只係整個保險業界嘅少數，我亦都另外識做保險嘅無SELL過自己朋友。

只係概嘆，點解社會可以令人轉變咁多。

我唔係介意你SELL我，只係介意，點解你因為要SELL我先搵我出黎食飯？

唔通，我同你食飯呢段時間嘅價值，只可以用張保單黎衡量？

我想我地嘅友情，可以返去以前，乜都唔講，都可以一齊HEA一日嘅以前。