初七，除咗假期綜合症未醫好，Johnny收咗工仲要趕返屋企迎敵——阿媽嗰邊班大陸親戚嚟拜年。
入到屋，Johnny以為自己去錯劏房。唔夠一百呎嘅公屋大廳竟然塞到七個大人加三個細路。迫成咁，平時扎扎跳嘅豆釘都好似雞場啲雞，淨係可以企定定、兩頭望。
「舅父，姨媽。」Johnny一邊叫長輩，一邊撳住道火，今次敵軍數目比佢想像嘅多咗一倍，阿媽明明話過冇細路㗎。
而且，細妹去咗韓國Exchange，今年得佢孤軍作戰。
「叫表舅啦。」表哥、表姐各自吩咐仔女。
「表舅。」三個四歲至七歲嘅高度危險人物學舌，Johnny虛偽地讚句「乖」，眼尾已經𥄫到五歲嘅𡃁仔吼實佢支結他。
「大個仔，應該要識唔好亂逗人哋啲嘢㗎喇。」Johnny一早排練好呢番說話，仲提醒自己要笑，唔好太掘，免得畀阿媽鬧返轉頭就霸氣盡失嘞。
點知個細路唔理Johnny，繼續搞搞震，表哥就笑笑口：「佢聽唔明㗎。」然後就用普通話係咁意話下：「不要碰表舅的東西。」
因為生多過一件，表哥為細仔買出世紙都用咗成十萬銀，自然錫到佢燶。平時做慣皇帝仔，當然睬你都傻啦。
Johnny真係失策，但今日食晏先知道親戚今晚殺上嚟，叫佢如何防備呢？佢索性塞支結他入房，鎖實門。
小魔怪轉戰細妹部鋼琴，Johnny唯有用武力撳實琴蓋，心諗：生個仔都咁疊水，好心就學下香港人，迫仔女學樂器，仲要日以繼夜練習，咁包保佢哋見到人哋嘅私伙嘢，避都避唔切嘞。
「飲多幾碗花膠湯啦，食咗鮑魚未呀？」Johnny媽笑到四萬咁口，摸摸百厭星個頭，完全無視Johnny嘅捍衛戰。
Johnny媽同好多香港人一樣，都係細個由大陸偷渡落嚟。啲人話女人為家庭付出得特別多，真係冇錯。廿幾年前返鄉下，佢會抬電視、玩具、衫褲，而呢十幾年嚟又因為「自己人」各種理由，不斷拎錢返去。
最令Johnny覺得可笑嘅係，佢成家人仲住緊公屋，但親戚就用阿媽拎返去嘅錢起咗間大屋，印印腳收租，嘆世界。
今時今日風水輪流轉，呢班親戚有錢過Johnny一家多多聲，但呢刻，Johnny媽依然喺屋企摷出Johnny同佢細妹嘅舊物，等班細路可以執二攤，唔講仲以為佢阿媽係環保大使。
見返小學用過嘅大口仔筆蓋、多啦A夢筆盒……Johnny無限懷念，但班細路已經接過佢曾經好愛惜嘅物件玩弄，跳跳虎無情情大戰比卡超，可愛嘅狗公仔忽然變咗怪獸。
Johnny心痛，稍一鬆懈，就畀個細路打開咗部琴，用其污糟嘅手指，亂彈一通，琴聲當中夾雜鄉下大人嘅特大嗓門，嘈到拆天。
「好喇，行得未？」Johnny媽主動分完贓畀班賊，就帶住大隊去茶樓食飯。
屋企冇受到咩破壞，Johnny鬆口氣，點知跟住仲有排受。
由屋企行去茶樓短短一段路，細路女忽然扭計喊，問清楚原來係急尿。
廁所只不過係數十步腳程，但表姐將個女抱到馬路邊，一手拿高佢條紅裙，除低白色襪褲，口中「Shu」「Shu」聲。
Johnny嚇到急急腳行快兩步，大陸人劣行無日無之，但主角忽然變成自己親戚，真係驚畀人拍片，咁自己都隨時沾染一身尿味嘞。
忽然，耳邊傳嚟一陣訕笑，原來係隔離屋嘅新移民師奶。佢一路行，一路高舉勝利，彷彿同胞嘅尿令佢臉上鋪金。
Johnny媽平時同呢個外省婆唔啱啞，成日嫌佢冇文化，亂放飛劍，煮餸用嘅鄉下醬料臭到冤。
「呢度係香港，唔係幾好嘅。」Johnny媽尷尬地避開鄰居目光，Johnny爸直頭唔敢望向女童。
「唏呀，細路女急起上嚟，邊忍到㗎。」舅父好緊張粒孫，語帶責怪。
姨媽賠個笑，同一對孫仔女坐喺石壆等待，「香港係咁㗎喇，多多規矩，我搭扶手電梯都唔知企左邊定右邊好呀。」
Johnny抖大氣，班親戚係咪由深圳沿路抹地抹到嚟呢區，再坐落佢屋企張梳化㗎？陣間要比年廿八更加徹底消毒屋企先得。
總算嚟到酒樓，點完菜，又再閒話家常。
Johnny低頭篤電話，忽然聽到阿媽問：「明仔申請咗落嚟未呀？」明仔即二舅父大仔，而二舅父當年跟住Johnny媽落咗嚟求存。
舅父答：「下個月拎得身分證喇。」
姨媽就話：「喺上面好地地，落嚟香港有排捱呀。」
Johnny媽話：「一家團聚好緊要嘅。」
「佢老豆叫佢快快趣買樓喎。」
Johnny嘆一句：「咁易買樓咩？」
姨媽依舊大大聲：「唏，佢賣咗大陸層樓咪得囉，不過就大屋換細屋，香港啲樓得幾百呎，佢實住唔慣。」
Johnny爸話：「叻仔呀，買樓實升值。」
講到呢度，Johnny夾咗粒瑤柱釀節瓜畀姨媽，務求塞住佢把口。
雖然茶樓人多嘈雜，但Johnny忽然覺得如果有人聽到呢段對話，肯定會打上Facebook呃嬲，咁自己一家，隨時變咗禍港幫兇。
Johnny已經開始諗定點為自己父母辯護。
佢阿媽睇隔離屋唔順眼就唔再講，仲怨每日一百五十個證太多。而佢阿爸就成日呻周街都係講普通話嘅細路，覺得公司要佢呢個中坑學煲冬瓜，好唔人道。
諗諗下，Johnny先發現，最愛嘅瑤柱釀節瓜一粒都冇食到，已經畀親戚夾晒喇。
而佢，係埋單嗰個。
（完）
鍾意嘅，請LIKE 我Facebook :D 你嘅支持推動到我繼續寫作 :D
〈夜半，被彈鐘的第一個人〉：https://goo.gl/XCre9p
