【配圖佢影嘅！配圖佢影嘅！配圖佢影嘅！<3】
如果話秘書係一間公司最識收風嘅人，咁樹洞一定係一個圈子入面，知道得最多嘢嘅人。
當人向樹洞透露出心嗰句，同時佢就會背對住世界，甚至係自己。
到咗星期六，Rebecca佢哋知道阿邦都嚟，本身都嘰嘰趷趷，但一聽到佢話「張單我負責吧」，就收晒口。
阿邦買晒刺身、壽司同啤酒上嚟Party Room，一坐低就話：「唉！呢排公司接咗單大生意好鬼忙呀，我日日瞓得兩個鐘，今日行得開，你哋真係好彩喇。」
除咗阿蚊，我哋幾個女人交換咗個眼神，當堂反晒胃。
阿邦開咗Turbo，係咁講上司點踩住佢，唔俾佢上位，啲同事又點衰點衰。
我忍唔住苦笑，原來有啲人係有能力搿硬將全世界變晒做樹洞。係呢方面，阿邦同阿蚊都幾襯呀。
可能呢排我太落力練習，唔覺意出招：「咁唔滿意咪轉工囉！」
我敢肯定，我幫呢度嘅樹洞講出咗心聲，但講真話嘅結果係，全場嘅空氣好似一下子抽乾咗咁款。
我紅都臉晒，平時細細聲，大家聽唔到我講乜就試得多，好少可個個望實我。
阿邦大笑一聲，好似好得戚咁，「唔係啩，我份人工有成七皮嘢。你叫我辭工，我瞓天橋底咩？」
而家先知佢咁有錢途，唔耐煩嘅人即刻好提子。我隊啤酒，冇再出聲，默默望住大家。
阿Fi面上閃過一下藐嘴，佢老公做餐死都搵唔到阿邦三分一人工。Rebecca笑咗笑，佢暗啞底成日笑阿蚊戇居，搵個咁嘅男人綁住自己一世。阿怡表面上最冇嘢，實則好唏噓，佢同女友拍咗拖年幾，不過一直得我知（好似係）。佢話廢事講出嚟，令大家有咩避忌喎。
女人嘅友誼可以有幾脆弱，我明嘅。
「大佬邦有料到喎。」阿Fi笑住打完場。
阿邦露出勝利笑容，「其實你老公好似我咁，肯搏肯捱肯擦鞋，包保佢下年就升職啦。」
嘩！乜咁Hihi嘅？人哋好心派高帽，佢就真係當自己係寶？
阿Fi嘅笑容硬晒軚，阿蚊即刻兜：「阿輝錫老婆嘛，升咗職咪少咗時間陪阿Fi囉。」
阿Fi條氣順返，笑得好甜，「我呢排越嚟越頂佢唔順，鬼死咁痴身。佢本身今日都想一齊嚟㗎，係我唔俾佢做電燈膽咋。嗱阿邦，我唔係話你呀吓。」
係咩？咁上個月佢做乜捉住我呻，話佢老公對佢已經唔係好似以前咁？又好返喇？
Rebecca反晒白眼，超大聲嘆氣，「真係冤氣，有冇諗過單身嘅人係咩感受㗎？」
「好似你而家咁叻，又自由又開心，我都想單身。」阿Fi呢句嘢好熟口面。
呢一刻，我忽然覺得，人向樹洞呻到樹葉都落，某程度上係想「貶低」自己嚟晒命。
我淨係聽，忽然覺得大家都講緊嘢，但冇一個人聆聽緊對方。
「呀單身筍盤，我有個同事又有型又有樓，駛唔駛介紹你哋識呀。」
「喂阿怡，型男搵你喎。」
「有幾型先？冇圖冇真相喎。」
阿邦問阿蚊：「證人，你話Derek係咪型呀？」
「哦……係呀，都幾好仔添。」阿蚊眼都唔眨，係囉可，唔成日拉阿邦去劈酒、踢波、打機就更加好仔喇。
原來啲刺身未夠赤裸，啲壽司飯都有醋味，但好食咪得囉。
食完嘢，望住佢哋將話題東拉西扯，嘻嘻哈哈玩呢樣玩嗰樣，間中互寸下，好似返返去中學咁。
阿Fi呻女女報唔到某間出名嘅Play Group，阿邦就話嗰度校長都係佢Client，可以幫佢搭下線喎，阿Fi開心到老公搵幾錢都唔記得喇。
我差啲忘記咗今日嘅目的，提議：「不如玩Truth Or Dare？」
大家一聽到就反晒白眼，但咁耐冇玩又心思思。我灌晒支酒，就用個樽嚟轉。第一次就中咗阿邦，我食住個勢問：「咁你公司有冇啲靚女同事呀？」
全世界再一次將目光放喺我身上。
（待續）
鍾意嘅，請LIKE & SHARE！FOLLOW埋我FB就係最大嘅鼓勵 :D
〈個天話我涼薄，要收返我有嘅嘢！〉：https://goo.gl/t6s3fG
重申：配圖佢影嘅！配圖佢影嘅！配圖佢影嘅！
佢成日問，我寫嘅故仔有冇佢。
所以我偷偷地咁玩，而家我哋一人影一相做封面，咁咪有你有我囉 :D
我以前唔開心成日會搭叮叮，所以叮叮係我嘅樹洞。
#余該隱 #短篇 #小說 #廣東話 #短篇狂想 #短篇小說 #樹洞 #報復
