「你對我已經唔係好似以前咁，追我果陣，九十九朵玫瑰，依加呢？得番九朵！」
唔使寫名，你都估到，呢句一定係我女朋友講，但你應該估唔到，呢個係乜野場合。
唔係清算男友大會，而係我捉到Vivian同第個男人send曖昧訊息。
依加我戴綠帽，妳鬧番我轉頭？
「Stephen對我好好，乜都送畀我，你呢？」
我初初夠對妳好啦，但妳幾時見過人跑步，過咗終點仲繼續跑？
我唯有答：「Ok，我有做得唔好，但妳唔應該畀帽我戴。」
Vivian撇撇嘴：「你辜負咗我嘅愛，我對你好失望，我地分手啦。」

一對情侶嘈交，永遠都係想分手果個贏，因為佢可以講晒所有難聽說話，
然後輕輕的走，連雲彩一片也沒帶走......
總之，我地就咁分咗手。

我痛定思痛，對住下一個女友，我日日on call 36小時，就算幾攰都堅持。
點知，都係俾人飛，
「送黎送去都係果啲野，你可唔可以有創意啲？」
如果我咁有創意，我去咗做創意產業啦，
但辯駁都無用，分手就係分手，唔係辯論比賽。

再下一次，我決定一開始就唔對個女仔咁殷勤，咁拍拖果陣就無「你對我已經唔係好似以前咁」嘅煩惱，
結果，無分到手，因為我根本追唔到個女仔。
我去請教我表哥，表哥係一個科學家，但唔係宅男，而係好有錢好多女果種。
表哥意味深長：「愛情嘅關鍵，係細節。」
我好似明白：「即係小事對佢好啲？出街要幫佢推門？」
「唔係，係你銀行戶口多番兩個零，腰圍細番兩個碼......」

講咗等於無講啫，我掉頭想走，表哥拉住我，塞咗隻手錶畀我：

「我認真架，呢隻係我岩岩研發嘅『正確手錶』，
每次你做決定，佢會幫你計算後果同成功率，如果你嘅決定係錯，就會扣住你唔畀你做。
咁你咪唔驚追女仔／拍拖果陣做錯事囉。」
曾經有個專家講過，如果你一生人做嘅決定，有六成係正確，咁你已經係人生勝利組，
嘿，如果百份百正確呢？

戴咗手錶，我第一時間去買股票，是但揀一隻，打算買升，
撳「確定」前，手腕一緊，哦，即係買升係錯。
好，咁我買跌，手腕又一緊。
我轉咗幾隻股票都係咁，咩意思？股票唔係升就係跌架啦，點會兩樣都錯。
手錶屏幕上彈出一行字：「主人缺乏投資觀念，胡亂買賣，屬於錯誤行為。」
得，唔畀我搵錢，我去溝女。

下集：https://post.shikoto.com/posts/116742-你對我已經唔係好似以前咁（下）