我唔想同佢結婚（三）：條仔買唔起樓－求其花、B612

如果現實可以好似童話故事咁，唔洗理將來嘅事，你話幾好呢？

前日係你生日，我知你彈開結他，我特登去琴行買咗支電結他比你，三千幾蚊，我比錢嗰時，心情就好似比人挖咗忽肉咁。直到當晚約咗上你屋企食飯，我揹住支重到死嘅電結他，想俾個驚喜你，你打開門，個樣有啲尷尬。

「Surprise！你可以換結他啦！」上次食飯聽過你口噏噏，話支結他用咗兩三年，都係時候換。

我以為呢個係一個生日禮物嘅提示。

點知穿過門口，入到你房，見到你收都收唔切，原來你已經買咗另一支電結他，連埋旁邊一堆四四方方又大又硬又阻掟嘅物體，塞住間房嘅五份之一。你見我千辛萬苦揹晒嘢嚟俾驚喜你，一場空歡喜，你都唔好意思咁講：「你睇下我哋幾夾！諗嘅嘢都一樣。」

然後你打開我送比你嘅結他，呆咗一呆，我話：「三千幾蚊架……」我知道送禮物提住幾錢其實好掃興，但三千蚊……對我嚟講係一個月飯錢架啦，依家先嚟話白費心機……

「哦……三千姐……」你不自覺咁唸咗句，我聽得好清楚。
「你送嘢比我，我都開心架嘛！」之後你就開始安慰我，而女人嘅直覺話比我知，當中一定有問題！

於是我問佢買嗰個結他幾錢。

「萬四蚊！？」我激到走音，喂你人工得萬五蚊一個月渣喎，你一副勁唔好意思講嘅樣，咁我都唔洗問角落頭嗰堆一舊二舊幾錢啦？想問清楚係咩嚟，你又數一堆名詞咩Amplifier，Speakers同Effects，我完全聽唔明點解發聲工具都可以細分咁多類，總之你個重點就係啲嘢個價錢好合理啦！

「你可唔可以儲下錢？」其實我都淨係想問呢句。啲嘢加加埋埋兩萬蚊，如果依家我可以下個決定半價賣返晒出去，我願意一個女人仔抬返啲嘢包送貨。

「搵得萬五蚊，重講咩儲唔儲錢丫，點儲都唔會買到樓架啦！拎啲閒錢出嚟買下自己鍾意嘅嘢都唔俾咩。」呢個就係你嘅生活態度，乜嘢都活在當下，上個月行街見到個廣角鏡幾靚，幾千蚊話買就買。有時我覺得好迷惘，因為你呢種生活態度，我話想去邊，想買啲咩都好，你都會第一時間滿足咗我先。

你永遠都唔會待薄我，同時又唔會待薄自己，我哋可以一年去兩三次旅行，同時你又可以有閒錢買樂器、相機，就連手機game課金，你高興起上嚟都可以俾成千蚊。

如果唔洗諗將來，我真係信我哋係最幸福嘅情侶。

「唔好講呢啲住先！今日我生日，除咗買咗份大禮比自己，其實我仲有準備禮物比你架！」你笑得好神秘，喺櫃桶拎咗盒嘢出嚟，叫我攤大手板。

打開，係鑽石戒指。

粒石好細，但唔係我在意嘅嘢，你單膝跪地，捧起我拎住戒指盒嘅雙手話：「人哋話求婚一定要女人估唔到嘅時候，今日我生日，但係，你先係主角。」

我呆一呆，覺得面前嘅嘢有啲難以置信，你份人就係咁，乜嘢都無Plan，就算我呢頭先講完你亂洗錢，只要你高興，戒指可以照買，婚都可以照求。

我好鍾意你，但同時我覺得好無安全感。女人就係咁難以理解，只要開心，所有不安嘅因素都可以唔理；但一無安全感，好易鑽牛角尖。

「我哋以後住邊？」我問。

「搬過嚟一齊住，我日日唱歌你聽！」當初你就係靠好老土嘅自彈自唱嚟追女仔，我係其中一個比較蠢，易落疊嘅。

「……你起身先。」我望住呢間唔夠八十尺嘅房，一邊塞滿晒樂器，一邊就係衣櫃書櫃，依家重要放多個我落去……成間屋五百呎，同屋重要有你阿爸阿媽同兩個細妹……

「你唔應承，我唔起身架！今日我生日，送個老婆比我都唔得！？」你仲笑得好燦爛，完全唔知道我嘅憂慮。

求婚就係咁，女人永遠無時間考慮。今日你生日，我收咗隻戒指，你開心到企起身攬實我，我眼角餘光睇到呢間滿佈雜物嘅房，諗到我下半世都要住喺呢度，我好清楚我唔係港女……

但係，我真係唔想嫁。

＊＊＊＊＊＊＊＊＊＊＊＊

我雖然係個會考數學僅僅合格嘅廢柴文科生，但呢條數，我都仲識計。

兩個人月入兩萬幾，扣埋老強、交稅，一年實收唔夠三十萬。聽落好似好多，唔飲唔食練仙就係囉。每個月家用、車費、保險、手機月費、伙食，閒閒哋都萬幾銀。如果唔買衫褲鞋襪化妝品，唔換手機唔剪頭髮唔約人，一個月剩七、八千，一年都可能儲到十萬嘅。

佢成日話我唔儲錢。問題係，儲錢嚟做乜先？今日有五十萬首期，然後呢？打後三十年，每個月都要供皮幾嘢。人生匆匆，唔通就係為咗供層豆腐膶咁大嘅樓咋咩？我唔想做嗰啲日日食晏得一塊方包、行路返工放工嘅「上進青年」呀！

有錢，點解唔對自己好啲？我寧願買支平靚正結他玩下好過啦。但我都忍住手，兩三年都無換過。

成日話我無計劃，其實佢根本唔知我喺背後付出過啲乜。

我從來都唔敢買衫，一件又幾百，所以著嚟著去都係嗰幾件。以前好鍾意飲酒，男人老狗出嚟唔係打波就係飲嘢架啦，但而家我都扮怕女朋友唔鍾意所以唔去，一個禮拜兩次都慳到幾百架。我唔好錶，唔追手機電腦平板，唔儲紅酒威士忌，有錢都寧願留嚟同佢去旅行。

佢最鍾意就係周圍去。由上網睇blog諗去邊、買機票、plan行程到出發，足足兩三個月都處於長期亢奮狀態，一返到香港又即刻諗下次去邊。為咗滿足佢周圍去嘅慾望，我手機爆mon都唔捨得換，係mon貼都唔撚換嗰隻！。晚晚一唔洗OT就去幫啲DSE細路補習……其實咁大個人仲要靠補習秘撈，我都唔好意思同friend講。為咩呀？都係為咗佢鍾意成日去試新嘢食，咩窩夫、抹茶、海膽手卷呀咁。唔係佢埋單，佢梗係唔知次次幾舊水有幾重皮啦，我每次肉都赤埋。

咁但係，生活就係要取捨架啦！我想大家過得開心，食好啲、去旅行，自自然然就要放棄另一啲嘢。我一直都明。

其實半年前我就已經想同佢結婚。不過真係橫計掂計，就算按埋屋企層公屋，都無可能俾到首期，然後仲要負擔得起每個月供樓。如果搬出去住，一個月至少洗八九千，即係白白幫人供樓。

但我真係好想快啲同佢結婚，好想人哋可以叫佢黃太。

上一次求婚，用嘅都係同一隻戒指。嗰晚我一早留定張靜靜哋嘅枱，叫定餐廳喺個心太軟碟邊寫住「Marry Me」，上甜品嗰陣順便拎紮花出嚟。

一坐低食飯，佢就開始係咁呻：「今朝喺屯門公路塞咗成粒鐘，返到公司樓下撞到腦細以為已經夠黑，點知放工仲要再塞多一次！個半鐘呀！」。其實佢講咩我都無乜心機聽，成餐飯隻手一直插袋摸住隻戒指，諗緊應該咩位入。然後好似聽到一句：

「我公司啲同事，唔係自己揸車就係有男朋友車放工。旨意你草錢買車喎？死得啦！」旨意你就死得啦……旨意你就死得啦……旨意你就死得啦。

我係咪真係咁失禮佢呢？佢班同事，有幾多個可以一年去兩三次旅行架？為咗氹佢開心，玫瑰金iPhone 6、Pandora手鍊，有邊樣我無買俾佢？我自己連個穩定少少嘅相機腳架都唔敢買呀！

嗰句嘢佢可能只係隨口講下，但真係咩心情都無晒，仲講咩求婚。我拿拿臨扮去廁所，叫個侍應取消個甜品，往後幾個月都無再有想結婚嘅衝動。

但拖得一時亦唔拖得幾耐。兩口子嘅幸福生活，越快開始就越好。所以今次求婚，我早有準備。

「我哋以後住邊？」呢條問題嘅答案，我自己已經練咗不下三十次，先可以嬉皮笑臉咁講得出口。

「搬過嚟一齊住，我日日唱歌你聽！」一齊住佢可以幫手煮吓飯，慳返啲伙食費。到時大妹畢業，家用又少一筆。加上我報咗個課程，年尾合格就應該有幾千蚊人工加。兩三年之後升埋職，要上車我唔敢講，但要搵個舒服嘅地方搬出嚟住，應該都唔成問題嘅。

連阿爸阿媽都應承咗同我換房，大少少應該夠放張雙人床同書枱，起碼唔洗成日幾個人迫喺廳無晒兩公婆嘅私隱丫。香港地有邊個唔想住大屋？而家唔係港男質素問題，係土地問題丫嘛。你睇吓出面有幾多個男人唔靠父幹俾得起首期先？