上集:https://post.shikoto.com/posts/116613-你對我已經唔係好似以前咁(上)

得,唔畀我搵錢,我去溝女。
喺街頭見到個靚女,我細細聲講:「依加我打算讚佢靚,得唔得?」
手錶否決,「咁我用王家衛電影對白搭訕?」
手錶否決,我有啲嬲:「即係點?」
「計算主人與目標外貌值,無論用任何方法,搭訕成功率為零。」
佢有道理,我之前啲女友都唔算靚女,咁我揀個普通啲嘅,
「計算主人耐性及條件,搭訕即使成功,估計沒多久,你倆就分手。」

股票唔買得,女又溝唔到,我死死氣氣番屋企,
正想打下機,手錶否決,「根據計算,主人正在浪費光陰。」
食薯片,「每100克高達500卡路里,會減低主人健康值及外貌值。」

到底點做先係岩?我突然諗到一件事,我伸手想除隻手錶。

手錶無阻止我,證明我做呢件事係岩!
我明白啦,正確手錶係想話我知,我根本唔需要手錶,都可以成功!
做人要靠自己努力,溝女要真心,無得不勞而獲。
我將隻錶還番畀表哥,報咗幾個進修課程,展開人生新一頁。

過咗兩年,我變得更失敗。
想追嘅女仔,追唔到;
退而求其次,都係畀人飛;
進修完,無加人工,仲用晒積蓄。
我大惑不解,又去搵表哥:「可唔可以借多次隻錶黎?我已經領悟到人生嘅真理,點解仲未成功?要更長時間?」
「隻錶我借咗畀個投資專家,佢風生水起,帶埋我賺大錢喎。」表哥奇怪:「正確手錶做決定,應該唔會錯架。」

於是,我地一齊去搵個投資專家,

「咁我除隻錶畀你試下。」專家好爽快,但除極都除唔甩,
手錶屏幕彈出一行字:「此行為錯誤,請勿脫下本產品。」
我忍唔住問:「點解我除錶就得,佢就唔除得?」
「根據計算,前任主人是廢物,不會成功。為本產品未來著想,本產品作出最正確的決定:另投明主。」
「你隻錶咁刻薄嘅。」我望向表哥。
表哥撓撓頭:「隻錶會做最正確嘅決定,但無話過,係對佢最正確,定對你最正確啵。
跟住你,無前途,佢走佬都好合理。」

果一刻,我突然領悟到,點解我一直都俾人飛。
乜野「你對我已經唔係好似以前咁」、九十九朵玫瑰,都唔係重點,
重點係「跟住我,無前途,走佬都好合理」。
我地成日話人做錯,其實無論錶定女人,都識作出最正確嘅決定,
對自己最正確嘅決定。

-完-