從前...
都係唔好用從前,我唔想零分重作
是咁的,
我叫杜凌,人如其名,係一個毒撚,但我屋企好有錢,真係好有錢,
有錢到我住係三樓,可以足不出房七日七夜,打個內線電話就乜都會送上黎比我。
食物,飲品,遊戲等等
唯獨一樣野我得不到!就是「滑鼠」,我部手提電腦由屋企人送比我之後既哩四年都冇換過。
就係因為我哩四年都冇離開過哩部電腦,屋企人除左肯提供一個人類生存既所需比我之外,我任何有關電腦既佩件都得唔到。
不過唔緊要,身為一個毒撚,有部手提電腦係身邊,我仲需要乜野?
冇錯!係網絡,所以我係三年前絕食左七日七夜之後,我成功獲得每個月100GB無限上網。
哩個係我人生第一個成就,亦係我成功既第一步。我感受到我隻滑鼠又行近左我一小步。
有番網絡之後,我開始脫離左單機遊戲,「下古卷軸」全線通關已經滿足唔到我。
當時好盛行一隻叫「OLO」既遊戲,問題就黎喇!唔用滑鼠玩爆左「下古卷軸」既我。
雖則食指指尖與手提電腦觸控版長久以黎上下左右全方位既磨擦已經令我秘密練成左太陽之指。
但我哩隻太指之指,竟然只係可以係遊戲比賽第一季結算後,拎到「木牌V」哩個階級。
不過唔重要,重要既係,如果我可以拎到第二季團隊世界賽冠軍,獎品竟然係五隻「打機用滑鼠」!
係「滑鼠」!當時既我夢寐以求左兩年既「滑鼠」!
可惜.....可惜哩個世界賽冠軍要五個人參加,對於我哩個連滑鼠都冇既人,又點搵個耳機同咪出黎同四個隊友合作呢?
就係咁,我只可以係第二年,以個人賽冠軍得到左名貴跑車一部,同埋雙人來回日本連食宿套票兩張。
當然,亦都係獎品送到去我家門口就冇送上黎三樓,不過都係唔重要。
重要既係,今日,我杜凌。
終於,終於,終於診斷出「食指指尖癌尾期」!
成功拎屋企人訂購左一隻全新既「ＸＸＩＸＸ」型戰鬥用滑鼠比我。
謝謝!
