口頭蟬呢家野我覺得係當我同某啲人講野既時候一定總會咁樣回應，而唔係總是將呢句句子掛在嘴邊。
是咁的，每當我坐係電腦前打機，最憎就係聽到屋企電話響，我一定會食哂波兵或者打埋條龍b反屋企先會沖出廳拎起個電話0.9秒9沖反房：喂？
通常都一定係丫媽打黎，問你食左飯未
：食左啦
：食左咩啊

：咪又係果啲（知丫媽覺得食m記唔健康就會咁答）
：記住幫我收衫啊
：得啦得啦
其實10次有6次叫我做既野我都轉個頭會唔記得。
夜晚最憎係咩？就係佢地收工明明自己有鎖匙都要你開門俾佢地。 唔好話收工，每一次出門反黎都一定要你開門， 然後幫佢地開完門又0.9秒9沖反入房。 叫你得閒摺衫又會應：得啦得啦，陣間咪摺囉。 叫你飲多啲水你又會應：得啦，有飲啊。問你食唔食咩都好例如生果，你都會答：唔食啦，咁夜仲食咩生果啊。
早啲訓啦：得啦，你訓先啦。
當你熄左部電腦，訓前去個洗手間既時候，你發現媽媽幫你切好既生果用保鮮紙封好放係枱上面。
當你想上床訓既時候，你會發現電腦枱旁多左杯水。
當你上到床既時候，發現原本亂糟糟既衫已經摺好放好哂。
當你望出窗外會發現原本我要收既衫媽媽收工反黎已經收哂。

試下放低果個令你同家人拒絕‘溝通‘既耳機，用個心聽下周圍既聲音。
你會發現佢地一直都係圍住你轉，係你身邊經過想同你講兩句野。
點解想你開門？因為只有果一刻先會見到你既正面，然而只有0.9秒9。