最近同男朋友玩緊long d，講真，唔好玩，都幾驚下。
大家分隔兩地，對方做咩都得啦，加上大家生活圈子見聞節奏都唔同，兩個人愈行愈遠，熱情好易慢慢冷卻。
唔係得long d得人驚架，男朋友冇追你果陣咁熱情，你會懷疑佢係咪唔再愛你；男朋友出夜街同人飲野得人驚，點知會唔會有靚女大波妹對佢飛摛大咬；男朋友同舊情人或紅顏知己密密傾都幾令人擔心，唔同佢地有野？
驚好正常好合理。我地唔係下下都對自己既吸引力咁有自信。人性係貪圖新鮮既，外面世界太精彩，周街都係各式各樣既靚女，我係男人都未必有定力啦。自己已經投放左咁多感情咁多心思係個男人上，冇左佢好似真係會被抽空一樣。
但驚係冇用架。
如果你冇帶眼識人遇着個玩家，佢出軌係遲早既事，你恨不得佢快啲，等你睇清楚個人早日甩身，唔好浪費你青春。
如果你地因為際遇唔同而愈黎愈大分歧，又或者佢出完國轉左工變左第二個人，呢啲係你控制唔到既意外。人生充滿意外，可能我過過下馬路俾個醉駕司機撞死。我地唔需要為意外而擔心，萬一發生左就唯有接受。
如果你驚冇左一個人，又要重新適應單身生活，請記住你唔係要擁有愛情，而係要享受愛情，讓愛情令你生活更豐富。如果你着眼於擁有，你註定要擔心失去。終日提心弔膽，你冇辨法享受真正既愛情。
我唔會同你講真正既愛情可以經得起時間，地點，誘惑等既考驗。咁諗太天真，現實殘酷，人性醜陋，係不容忽視既。
但我地着眼點應該係我地可以控制既事情。Long d既，我地可以同對方約好regular既skype時間，唔好因為生活忙碌而唔懶左去關心對方。
驚吸引力不足既，我地可以去健身，學化妝學著衫，投入自己既興趣令自己成為一個有火有活力既人。
驚一個人孤獨既話，請擴大自己生活圈子，請肯定自己有其他心靈寄託，唔係成個心得佢一個。
控制唔到既只有坦然接受，人從來就好身不由己。呢啲人生大道理係愛情同樣適用。
有時都會擔心既，但我大部分時間都專注我可以做到既野，各位姊妹一齊努力啦！
.jpg)
