話說有一次我同女朋友去某處旅行，成個旅程都玩得好開心，之後返嚟香港嗰陣係機場排隊終於Check in 放行李個陣就發生咗一件事……

係我哋前面有一個家庭，一對夫婦同佢哋個小朋友再加佢哋阿媽，夾埋四個人，咁夫婦同小朋友都企前啲，換言之我哋前面就係佢哋阿媽，亦即係一個阿婆。

本來排排吓隊都無咩事，但係我見到阿婆係度R頭，其實R頭係無問題，不過我覺得有啲唔妥，佢好似唔係R緊頭，而係喺度搵緊一啲嘢……無錯，佢係頭髮入面捉緊一啲嘢出嚟。

我同女朋友都畀佢嘅行為吸引住，然之後驚險一幕終於發生，佢右手兩指一夾，然後快速咁拉返出嚟，一隻飛蟲就畀佢夾咗出嚟。我見佢隨手掉隻飛蟲落地，再踩一腳整死佢，睇到我嘆為觀之。

我心諗：哦，一隻飛蟲唔小心入咗去啫。

點知我錯啦，我完全錯晒。

阿婆再伸隻手入頭髮度R，我同女朋友互望，雖然大家都無出聲，但係大家心入面一定諗緊同一樣嘢：嘩……唔係啊嘛，佢入面仲有蟲？

OMFG，真係有蟲，我見過，我真係見過！

佢一路R，頭入面啲飛蟲畀佢搞到開始爬出嚟，有啲係頭髮上面爬，有啲係度飛飛吓，如果唔知仲以為係度拍緊火影，佢就係油女志家族嘅人。

我同女朋友一齊慢慢退後，係嗰一刻我心入面只係驚緊一樣嘢，啲蟲到底會唔會傳染嫁呢？

係呢個時候，論到佢哋埋櫃檯，終於算係解除威脅。

我望一望女朋友，大家都畀阿婆嚇到魂不附體，諗吓諗吓大家都忍唔住笑。

「佢個頭竟然有蟲喎，仲要識飛！」

「咪係囉，畀佢嚇死啊，幾驚飛埋嚟啊！」

我哋唔係講笑，換轉係你你都會好驚，一隻又一隻飛蟲，係佢頭髮底下面爬出嚟，除咗係度蠕動之後仲識飛！！！

好彩，我哋終於完成Check in，之後入去候機區等返香港。

候機區度，又見到嗰個家庭，我哋當然坐開啲，仲係度睇吓有冇人坐係阿婆前後左右。

飛機嚟到，我哋排隊登機，估唔到阿婆佢哋排咗係我哋前面，又係我哋前面，唯有頂硬上最多行後少少。

上機一刻我好淆，因為個阿婆原來係分開坐！即係佢個仔同個女同埋個孫都唔同佢坐！阿婆自己一個坐未即係有機會坐我哋隔離！！！！！？？？？

好在，佢坐前面，我哋坐係好後，呢一次危機算係暫時解除。

呢一程機，我都係度諗緊，坐係阿婆隔離嘅人發現咗阿婆嘅秘密之後會有咩反應呢？？

——完——