畢業之後只不過做咗幾年嘢，就連女朋友都係無幾耐之前識，我以為呢個階段大家都應該處於搏殺期，不過有唔少舊同學竟然相繼結婚，仲有唔少做埋人哋阿媽。
係我眼中，愛情向來都只係兩個人嘅事，不過婚宴就完全唔關嗰兩個人事，而係兩個家族嘅事。
為咗做一場SHOW，有人要去借錢、有人要去打多幾份工、有人要放棄生活……
值得咩？
值得！
至少我舊同學阿Jess值得。
我同阿Jess唔係好熟，其實話唔熟都唔係好啱，我直情唔知有呢個女同學存在。
話說一年前，某一日我去拎信個陣見到有封粉紅炸彈，經歷過朋友、同學之間大大小小嘅婚宴，我已經見怪不怪，不過當我拎起封信個陣當堂嚇一跳。
「Jess？邊鬼個嚟架？」我以為寄錯信，差啲就順手將封信放入垃圾筒。
嗰晚我同舊同學係Facebook傾開計，先知阿Jess係我中二嗰陣嘅同學，其實我就唔係好信，不過我老死阿強竟然搵返中二嗰年張大合照，仲圈埋畀我睇佢係邊度。
望住電話嗰張相，我都係唔認得佢到底係邊個。
不過既然人哋咁神通廣大咁都可以搵到我地址寄封炸彈畀我，我未當做善事益吓佢，順便可以見吓班舊同學，又可以一齊笑佢為咗錢，三九唔識七都可以請去飲。
嗰晚發生咩事我唔太記得，只係記得同檯啲人原來係Jess啲幼稚園同學，阿Jess嘅面皮果然好厚。
換一個角度睇，其實Jess都幾有商業頭腦，起碼佢夠薑寄信已經嬴咗一半，就算事後你哋點唱佢，啲錢都已經入咗佢袋。
眨吓眼又一年，某日我係信箱入面又搵到封粉紅炸彈，而且同樣係Jess寄嚟。
我承認係嗰一秒我係想一手撕爛封請帖，不過我最終都無做到，而且仲好準時去咗飲添。
翻頭嫁都仲請你去飲只有一個原因，就係想呃多次你份人情，不過我去得就預咗畀佢，最令我意想唔到嘅係佢個菜單上面竟然有乳豬！
乳豬，一碟好神聖嘅菜式，佢唔單止係其中一個主菜，仲係一個訊息。
「我老婆係處女。」
（離題：其實乳豬好殘忍，大家可以考慮SKIP呢碟菜或者轉做燒肉）
無錯，只有處女先可以係婚宴嗰陣上乳豬或者燒豬，呢一個習俗係源自廣東：
古時新娘出嫁之後第三日會返去娘家嗰度，亦即係「回門」，如果新郎哥係洞房夜確定咗新娘係處，就會叫老婆帶多隻乳豬或者帶啲燒肉返去，代表同岳母講你個女係處。經過多年發展，呢個習俗已經慢慢失傳，取而代之係將乳豬或者燒肉放係婚宴菜色度，成為一個主菜。
因此，大家都會假設新郎婚宴嗰陣係未同新娘發生性行為，所以理應唔知佢係唔係處，按照傳統點都會上乳豬/燒肉去假設新娘係處，不過，假如你翻頭嫁，你就肯肯定唔會係處女，既然唔係處女又點會上乳豬？
當我見到隻乳豬嗰陣，我好嬲，我好嬲點解佢可以咁厚顏無恥，用隻乳豬去呃在席嘉賓！
最後我無食到佢隻豬，因為佢根本就無豬。
（再強調：其實乳豬好殘忍，大家唔好訂呢個菜式）
