收到一個投訴，話有一位女住客個電話俾清潔工偷左，而家響度大吵大鬧，作為一個物業經理，我當然即刻出去處理。
出到去村巴位置，只見一個穿著全身名牌既女人以君臨天下既姿態鬧緊個清潔工人，旁邊仲有村巴司機同一位管業主任響度，佢地不發一言，只係頭耷耷咁響到聽個女住客訓示。
被人話偷電話既清潔工人叫群姐，六十幾歲，每一日返工都好似笑口果咁同住客講早晨，我仲記得上年端午節佢仲送左親手做既粽俾我食，而佢響屋苑已經工作左五年。
我上前理解發生咩事，同事話我知個女住客話坐完村巴之後返屋企，發現部電話唔見左，落去村巴既時候發現群姐啱啱清潔完車廂，上去村巴既時候就發現電話唔見左，所以一口咬定群姐偷左部電話，
女住客潑婦罵街咁話：「呢啲咁既清潔工，每個月搵得嗰幾千蚊，佢偷左我部電話賣出去就成個月唔駛做，而且我仲親眼睇住佢響架村巴落黎，之後部電話就唔見左，仲唔係佢偷！？」
群姐欲言又止，我唔知佢係受到委屈定點，只見佢雙眼通紅，眼淚係咁流落黎，佢只係耍手擰頭咁講：「我冇….我真係冇…..」講完，喊得仲勁。
女住客得勢不饒人咁話：「你以為喊就有用咩？我部電話俾你偷左都未喊，呢度幾萬蚊一尺，我買一個廁所等於你做幾年野，你窮咪窮囉！做人做到你咁cheap，我要搜你身！你快啲攞返部電話出黎！」
講完，個女住客已經撲去群姐度，想夾硬除低群姐個腰包。

當時我唔知係其他人呆左冇反應，定係同事已經慣左被住客罵到一文不值，認為管理處或者係屋苑員工，就要俾住客為所欲為。
只見群姐塊面紅晒，我唔知佢係覺得反抗冇用定係覺得反抗會攪到件事更加複雜，佢冇作任何反抗，任由女住客強取佢身上既腰包。群姐眼淚一滴一滴咁響佢眼眶裡面流左出黎，我感受到佢既委屈，感受到佢因為窮而被所謂的有錢人羞辱得一文不值。
或許，呢一刻佢認為自己窮係原罪；
或許，呢一刻佢認為自己係清潔工就可以被所謂既有錢人羞辱。
響嗰下，我個心好痛，確切感受咩叫做忍氣吞聲，委曲求全。當時我情緒有小小失控，我一手響個女住客既手上面搶返個腰包返黎還俾群姐，村巴司機同管業主任見到我呢個行為都呆左響度。
個女住客好大聲咁鬧我：「你癲左呀！」
我冇理個女住客，我只係行去群姐前面問佢有冇偷電話，群姐好激動咁講話自己真係冇偷，仲對天發誓話如果偷電話就不得好死。我問群姐如果我報警去證明佢既清白，佢介唔介意，群姐只係講一句：「我唔介意，我只係怕報警麻煩到經理仔你。」
經理仔？我笑了一下，感覺有點甜。
我同女住客講，話佢冇資格去搶群姐既腰包，佢亦都冇證據證明電話係群姐偷，我而家報警交俾警察處理，如果警察都證明唔到電話係群姐偷既，就要求女住客要對剛才搶群姐既腰包行為道歉。
女住客聽完之後用電話拍低條片，話我包庇下屬，狼狽為奸，仲話會去總公司投訴我。
群姐聽到之後立刻走出黎，話佢願意俾腰包個女住客搜查，我知道群姐咁做係想保護我，不過我想群姐知道既係呢個唔係有冇偷野既問題，群姐可以自願攞腰包出黎俾人搜，但唔代表可以被人強搶剝奪自己意願既情況下被人搜查。
警察CID 黎到落口供，攪左成日，睇返村巴入面既閉路電視，發現原來女住客上村巴時跌左部電話響街度，最後俾途人執到，交左個電話俾商場既保安員（村巴站響商場，其他公司管理）。
最後，女住客當然冇同群姐道歉，佢只係好心急咁乘的士去商場攞返部電話，之後就冇再理我地。
群姐好開心咁同我講：「多謝你信我呀，經理仔！我未見過有經理咁保住我地…」
我笑住答群姐：「我信你唔係因為我係屋苑經理，而係因為我癲架！哈哈！」
群姐好開心咁笑左一下，到呢刻，我仲記得群姐笑到見牙唔見眼既樣係幾咁甜。
做我地物管呢行的確成日俾人羞辱，俾人問候祖墳十八代更加係家常便飯，我地可以選擇唯唯諾諾或者一笑置之，做得呢行預左冇得怨。
人窮心唔可以窮，我情願守護自己既正義被人投訴，都唔想因為貪生怕死而午夜夢迴。