我仲清楚記得，第一次買樓響地產鋪簽署臨時買賣合約既時候，我覺得好感動，彷彿身邊既女人（現任太太）將會陪著自己白頭到老，而呢個名簽左之後，我同太太就可以有自己夢想既小天地。
簽名之後，我地已經開始幻想同居生活，我地可以互相挨著睇電視，在家玩煮飯仔，過時過節唔駛再出街同人迫……..只係我地忽略左一個更貼身既問題，我地買既係三十年既舊樓，亦即係話我地要諗下間屋點樣裝修設計。
老婆一直以黎都善解人意，基本上好多決策由我話事之後，佢都好少反對，點知黎到裝修呢個Moment，我先發現如來老婆對屋企既裝修設計係幾咁堅持，堅持到我以為太太有精神分裂。
就以地磚為例，我希望用木地板，太太卻堅持用白色地磚；我希望保留廚房，太太卻堅持要拆牆改裝成開放式廚房。
作為一個物業管理從業員，我一早已經知道屋企用白色地磚，好快磚與磚之間既掃口會積塵，成條坑黑晒好明顯，而且仲好難清理；如果屋企整開放式廚房一黎唔啱例，二黎煮飯既時候就算裝抽油煙機，屋企都會煙霧瀰漫，好大陣味。
我同老婆再三解釋，佢既結論就係阿邊個邊個間屋都冇問題，而且佢會勤力清潔，地板唔會有污漬，而且我地係無飯夫妻，更加唔存在有油煙既問題。
去到呢度，我已經知道冇野可以再講，講落去就變成嘈交，本來買樓係一件開心既事，變成咁我真係唔想。電影THE HEARTBREAK KID內有一句對白「Happy Wife, Happy Life」，老婆開心，咩都冇所謂。
我話：「間屋你想點搞就點搞，最緊要就係你鍾意！」
老婆好高興咁錫左我一啖，轉眼就拉左我去IKEA，無限輪迥重覆研究家居裝修佈置。
五年過去，地磚掃口污糟到反胃，一條條黑色既線話俾我知當日老婆既決定係幾咁錯，開放式廚房換黎既係我地冇點煮飯，又或者係煮飯既時候，冷氣開著唔熱仲夾住一陣陣油煙味。
老婆成日同我講好後悔當日冇聽我講，每次我都好瀟灑咁回答佢：「下次買第二層樓既時候，唔好再犯相同錯誤咪得囉！」老婆聽到，又係笑得甜絲絲。
兩公婆相處，有時候會有好多拗撬，大家可以堅持到底，唔讓步各執己見，又或者當對方犯錯之後，成日借機講「我一早講左」呢啲抽水說話，但老實爭贏講贏之後，我地得到啲咩?
我唔同老婆爭拗裝修，唔係因為我冇設計SENSE，而係我相信自己好快會換大屋，到時裝修設計將會由我話事。
幾時換樓？我唔知，不過我知道自己能力一定得，我有呢個信念，係咪好型先？
Photo from homebidder
