呢個世界有幾多老闆？我唔知，我只係知香港人好多都係打工仔，營營役役打份工，返朝九晚十，我地想搵錢，但最重要其實係安穩。
無可否認，香港經濟真係差左好多，剩係落街行下就會發現好多店舖而家都係吉鋪，唔計大型連鎖店，只計一般屋苑商場，普遍租金減三成都冇人肯租，你就知道其實好多人到而家都睇唔透香港既將來。
零售旅遊業早幾年真係好好景，自由行瘋狂落黎香港，前線員工食份佣金都已經非常之和味，但如果經濟差，佢地一定係第一批受到衝擊，鋪頭結業，裁員，環環緊扣，你就會驚自己做緊份工都有機會保唔住。
遠我唔敢講，未來十年香港最有前景既行業一定係物業管理！你諗下，年年都有樓起，香港又有大大小小唔同類型既屋苑要我地管理，其實呢份工真係可以同公務員睇齊，因為經濟好唔好業主都要交管理費，而我地既人工就係由管理費去支付，咁我地又邊可能會失業？
人工方面，做到經理級月薪三至四萬真係走唔甩，主任級兩萬至三萬亦都係基本。 睇到呢度，我知道好多人已經心動想去應徵物業管理呢份工作，只要你符合以下要求即可以去各大管理公司應徵：
- 俾人日日問候祖宗十八代都面不改容（就算自己冇錯都好）
- 對工作沒有執著（太多cheap客搵著數）
- On Call 24 小時（停水停電，爆屎渠）
- 超強心理質素（預備隨時俾人拍片放上Youtube）
- 基本搏擊，功夫（不欲詳談）
