有一種人,佢地望落去軟淋淋咁,冇咩脾氣,唔會同人爭執,更加唔好指望佢當你同其他人嘈交,或者紮晒馬諗住講手既時候,佢地會企響你身邊幫手打埋一份;呢種人,最鍾意當和事佬,萬事都以和為貴,咩都話「算啦!大家唔好嘈!」
你會覺得呢種人冇火,冇做人既腰骨,亦都冇做人應有既堅持。俾人恰到上頭殼頂都忍氣吞聲,就好似一條濕水炮仗點極都唔會響。
好自然,你睇唔起呢種人,亦都好自然咁將佢地擺響一個下靶位置,肆意咁去攞佢地黎開玩笑,點佢地做野,又或者係問佢地借錢唔還,因為你知道呢一種人就算將佢地搓圓撳扁都好,佢地都好似海綿咁將所有野吸晒入去唔會反彈。
而其實,佢地心裡面諗緊既係……
.
.
.

.
.
.
.
.
我吊你老母!你以為我真係冇火?我癲起上黎,連我自己都驚呀!
你地知唔知我其實一直以黎都壓抑自己既心魔,我怕我有朝一日控制唔到自己既時候,我會走出去殺人!
你以為我好想做和事佬?你以為我真係俾人恰到上頭殼頂都唔出聲?
錯啦!死蠢!
我好清楚自己既能力,一隻手指已經可以插盲你對眼,一條鎖匙已經可以割斷你條頸動脈,用力一扭就已經可以扭斷你條頸椎。
我真係好怕大家講手既時候,我會唔小心殺左你呀!
我唔係冇火,更加唔係因為懦弱而唔敢去同人頂撞。我只係覺得人生在世,訴諸暴力既結果可以係超乎預期,我唔想被人傷害,更加唔想傷人。
只因為你係我朋友,係我生命裡面其中一個重要既人,我先用身教會話俾你知咩叫做忍一事風平浪靜,我呢種高尚情操,試問有誰共鳴?
我唔係冇脾氣,我只係唔發出黎!